អន្តរជាតិ
ចិន ៖ បុរសចំណាស់ម្នាក់រស់នៅក្រោមស្ពាន ដើម្បីសន្សំប្រាក់ទិញចិញ្ចៀនពេជ្រ និងខ្សែកមាសឲ្យប្រពន្ធ
×![]()
ដោយ: ធីតា
រឿងរ៉ាវរបស់កម្មករចំណាស់ដ៏សែនរ៉ូមែនទិចម្នាក់មកពីទីក្រុង Chongqing ប្រទេសចិន ត្រូវបានចុះផ្សាយពាសពេញបណ្តាញព័ត៌មានក្នុងស្រុកកាលពីពេលថ្មីៗនេះ ដោយសារតែបុរសរូបនេះចង់បង្ហាញពីក្តីស្រឡាញ់ដែលគាត់មានចំពោះប្រពន្ធរបស់គាត់។ គាត់ព្យាយាមសន្សំប្រាក់ទិញខ្សែកមាស និងចិញ្ចៀនពេជ្រឲ្យប្រពន្ធ ហើយគាត់សុខចិត្តមករស់នៅក្រោមស្ពានដើម្បីកាត់បន្ថយការចំណាយប្រចាំថ្ងៃ។
កាលពីមុន លោក Xiong ធ្លាប់រស់នៅក្នុងផ្ទះដែលផ្តល់ដោយអាជ្ញាធរមូលដ្ឋាន។ ប៉ុន្តែ ដើម្បីកាត់បន្ថយការចំណាយលើមធ្យោបាយធ្វើដំណើរ គាត់សម្រេចចិត្តចាកចេញមករស់នៅក្រោមស្ពានវិញ ព្រោះថាវាស្ថិតនៅជិតកន្លែងធ្វើការរបស់គាត់។ បុរសរូបនេះបាននិយាយប្រាប់អ្នកយកព័ត៌មានថា៖ « មកនៅទីនេះ ខ្ញុំអាចសន្សំបានប្រមាណ ៥ យន់ (ស្មើនឹង ០,៧៨ ដុល្លារ) ក្នុងមួយថ្ងៃ។ ខ្ញុំចង់ទិញខ្សែកមាស និងចិញ្ចៀនពេជ្រមួយវង់ឲ្យប្រពន្ធខ្ញុំ នៅក្នុងហាងលក់គ្រឿងអលង្ការក្នុងអគារពាណិជ្ជកម្ម ដូចជាអ្នកទីក្រុងធ្វើដែរ »។
ក្រៅពីប្រាក់ដែលបានពីការងារប្រចាំថ្ងៃ គាត់ខិតខំដើររើសសំរាមនៅតំបន់ក្បែរនោះ ដើម្បីបានប្រាក់កម្រៃបន្ថែម និងឆាប់បានប្រាក់ទិញអំណោយឲ្យប្រពន្ធរបស់គាត់ដែលពេលនេះ មានអាយុជាង ៦០ ឆ្នាំទៅហើយ។ ប្រពន្ធរបស់គាត់រស់នៅឯស្រុកកំណើត ដោយចិញ្ចឹមសត្វ និងធ្វើស្រែចម្ការ។
បុរសជាប្តីរូបនេះខិតខំជារៀងរាល់ថ្ងៃ ដើម្បីទិញគ្រឿងអលង្ការដែលប្រពន្ធរបស់គាត់ប្រាថ្នាចង់បានជាយូរយារណាស់មកហើយ និងដើម្បីបង្ហាញឲ្យប្រពន្ធរបស់គាត់ដឹងថា មិនបានសម្រេចចិត្តខុសដែលជ្រើសរើសគាត់ជាប្តី៕
Tag:
ចិន
© រក្សាសិទ្ធិដោយ thmeythmey.com
