អន្តរជាតិ
ថៃ៖ ជនសង្ស័យបំផ្ទុះគ្រាប់បែកក្រុងបាងកកត្រូវបានចាប់ខ្លួននៅព្រំដែនកម្ពុជា ![រូបភាព៖ ពីបាងកកប៉ុស](https://image.thmeythmey.com/pictures/2015/09/01/thai_suspech.jpg)
រូបភាព៖ ពីបាងកកប៉ុស
×![]()
លោកនាយករដ្ឋមន្ត្រីថៃ ប្រាយុទ្ធ ចាន់អូចា បានឲ្យដឹងថាជនសង្ស័យជាជនបរទេសម្នាក់ពាក់ព័ន្ធការផ្ទុះគ្រាប់បែកនៅទីក្រុងបាងកក ត្រូវបានចាប់ខ្លួននៅព្រំដែនកម្ពុជា។ នេះបើយោងតាម បាងកកប៉ុស្តិ៍។
ប្រមុខរបបសឹកថៃលោក ប្រាយុទ្ធ ចាន់អូចា បានថ្លែងនៅល្ងាចថ្ងៃអង្គារនេះថា ជនសង្ស័យម្នាក់ត្រូវបានប៉ូលិសថៃចាប់ខ្លួនហើយនៅព្រំដែនកម្ពុជា។ ជនសង្ស័យជាជនបរទេសនេះត្រូវបានប៉ូលិសចាប់ខ្លួននៅ Ban Pa Rai ក្នុងស្រុក Aranyaprathet នៅក្នុងខេត្ត Sa Kaeo ក្នុងពេលដែលជននេះព្យាយាមរត់ឆ្លងដែនមកកាន់ប្រទេសកម្ពុជា។
លោក ប្រាយុទ្ធ បានអះអាងថា វាជាព័ត៌មានពិតដែលថាមានការចាប់ខ្លួនជនសង្ស័យសំខាន់ក្នុងការរៀបចំបំផ្ទុះគ្រាប់បែកនៅកណ្តាលក្រុងបាងកកកាលពីថ្ងៃ ១៧ ខែសីហាកន្លងមកនេះ នៅច្រកព្រំដែនកម្ពុជា-ថៃក្នុងខេត្ត Sa Kaeo។ លោកបានបន្ថែមដែរថា ជនដែលត្រូវចាប់ខ្លួននេះជាជនដែលស្ថិតក្នុងកាមេរ៉ាសុវត្ថិភាពដែលពាក់អាវយឺតព៌ណលឿង ហើយស្ពាយកាបូបទៅទម្លាក់ចោលនៅទីសក្ការហិណ្ឌូ Erawan ថ្ងៃកើតហេតុ។
ជនសង្ស័យដែលគេចាប់ខ្លួនបានហើយនេះ ត្រូវគេបញ្ជូនទៅមន្ទីរឃុំឃាំងនៅមូលដ្ឋានយោធាថៃនៅក្នុងខេត្ត Sa Kaeo មុនប៉ូលិសជំនាញថៃបញ្ជូនទៅសួរចម្លើយនៅបាងកក។ សូមទាញការចាប់អារម្មណ៍បន្តិចថា ការចាប់ខ្លួននេះកើតឡើងក្រោយពេលដែលអាជ្ញាធរថៃ អះអាងថា ជនសង្ស័យពីរនាក់ពាក់ព័ន្ធករណីបំផ្ទុះគ្រាប់បែកនៅទីសក្ការហិណ្ឌូ Erawan នោះបានឆ្លងដែនមកលាក់ខ្លួននៅក្នុងប្រទេសកម្ពុជា។ ហើយខាងស្ថាប័នប្រឆាំងឧក្រិដ្ឋកម្មថៃក៏បានបញ្ជាក់ផងដែរថា ខ្លួនបានស្នើសុំទៅកាន់អាជ្ញាធរកម្ពុជាដើម្បីមានការអន្តរាគមន៍ចាប់ខ្លួនជនទាំងពីរនាក់ផងដែរកាលពីព្រឹកមិញនេះ។ មានរបាយការណ៍ខ្លះថាជននេះត្រូវបានចាប់ខ្លួននៅក្នុងប្រទេសកម្ពុជាផង។
ប៉ុន្តែប្រភពខាងប៉ូលិសថៃ មិនបានផ្តល់ព័ត៌មានបន្ថែមទៀតឡើយ ជុំវិញពាក្យចរចាមអារ៉ាមថា ជនសង្ស័យត្រូវបានចាប់ខ្លួនក្នុងប្រទេសកម្ពុជា តែលួចបង្ហើបថាជននោះមានឈ្មោះថា Yusufu ។ ប្រព័ន្ធផ្សព្វផ្សាយថៃស្រាប់តែបង្ហាញរូបលិខិតឆ្លងដែនជនជាតិចិន ដែលមានភិនភាគត្រូវគ្នាជាមួយជនសង្ស័យនេះ។ ក្នុងលិខិតឆ្លងដែន នោះគេឃើញឈ្មោះ Yusufu Mieraili ហើយជននេះមកពីខេត្ត ស៊ីនជាំងប្រទេសចិន ដែលជាតំបន់ប្រជាជនអ៊ុយហ្គួររស់នៅ។
នៅល្ងាចម៉ោង៥នេះ នគរបាលជាតិថៃនឹងធ្វើសន្និសីទសារព័ត៌មាន ដើម្បីបង្ហាញមុខជនដែលត្រូវចាប់ខ្លួន និងផ្តល់ព័ត៌មានលម្អិតជុំវិញការចាប់ខ្លួននិង ព័ត៌មានផ្ទាល់របស់ជនសង្ស័យផង៕ © រក្សាសិទ្ធិដោយ thmeythmey.com