អន្តរជាតិ
ជនភៀសខ្លួនម្នាក់បានអូសប្រពន្ធមានផ្ទៃពោះ និងកូនប្រុសតូចឲ្យទៅដេកលើផ្លូវរថភ្លើង ព្រោះរស់មិនប្រសើរជាងស្លាប់
×![]()
ដោយ: ធីតា
ឪពុកនៃគ្រួសារភៀសខ្លួនស៊ីរីម្នាក់បានអូសប្រពន្ធមានផ្ទៃពោះ ដែលឱបក្រសោបកូនប្រុសតូចជាប់នឹងទ្រូង ទៅដេកសម្លាប់ខ្លួននៅលើផ្លូវរថភ្លើង ព្រោះបុរសនេះយល់ថា ពួកគាត់រស់នៅមិនប្រសើរជាងស្លាប់ទេ។
Mohammed Bakkar បានបង្កភាពរំជើបរំជួលជាថ្មីម្តងទៀត ដោយបង្ហាញពីទុក្ខលំបាករបស់ជនភៀសខ្លួន តាមរយៈរូបភាពដ៏គួរឲ្យសោកសង្រែងដែលប៉ូលិសហុងគ្រីបានអូសរូបគាត់ ព្រមទាំងប្រពន្ធកូនចេញពីផ្លូវរថភ្លើងនៃក្រុង Budapest ។
ពេលនេះ ក្រុមគ្រួសារមួយនេះបានស្នាក់នៅក្នុងជំរំជនភៀសខ្លួនមួយនៅភាគខាងលិចទីក្រុងនេះ បន្ទាប់ពីចាកចេញពីប្រទេសស៊ីរីក្នុងគោលបំណងទៅកាន់ប្រទេសអូទ្រីស។ លោក Bakkar បាននិយាយដោយអស់សង្ឃឹមថា មុនពេលដែលគាត់សម្រេចចិត្តធ្វើបែបនេះ អាជ្ញាធរហុងគ្រីបានប្រាប់លោកថា ប្រពន្ធ និងកូនរបស់គាត់នឹងត្រូវបំបែកចេញពីគាត់។
លោកបានប្រាប់ Sky News ថា៖ « ខ្ញុំយល់ថា រស់មិនប្រសើរជាងស្លាប់ទេ។ មានតែសេចក្តីស្លាប់ទេ ទើបអាចឲ្យយើងរកសន្តិភាពបាន »។ ការសម្រេចចិត្តនេះគឺផ្សារភ្ជាប់នឹងការប្រព្រឹត្តរបស់អាជ្ញាធរចំពោះជនភៀសខ្លួន។ លោកបានបន្ថែមទៀតថា៖ « ស្ថានភាពមិនងាយស្រួលទេ។ អ្វីដែលពួកគេធ្វើ មិនមែនជាទង្វើមនុស្សឡើយ »។
គ្រួសាររបស់ Bakkar បានជិះរថភ្លើងនៅក្រុង Budapest កាលពីថ្ងៃព្រហស្បតិ៍ ជាមួយនឹងជនភៀសខ្លួនរាប់រយនាក់ផ្សេងទៀតដែលគិតថា ពួកគេនឹងបានចេញទៅកាន់ប្រទេសអូទ្រីស។ ប៉ុន្តែ រថភ្លើងបានឈប់នៅភាគខាងលិចទីក្រុងនេះ គឺនៅ Bicske ដែលមានជំរំជនភៀសខ្លួនមួយ។
ដោយភាពអស់សង្ឃឹម លោក Bakkar បាននាំប្រពន្ធ និងកូនទៅដេកលើផ្លូវរថភ្លើង ដើម្បីសម្លាប់ខ្លួន។ តែនៅទីបំផុត ពួកគេត្រូវប៉ូលិសចាប់ទាញចេញ។
ស្ថានីយ៍រថភ្លើងបានបិទពីរថ្ងៃ ដោយសារមានជនភៀសខ្លួន ២ ០០០ នាក់ធ្វើបាតុកម្មតវ៉ា។ ទន្ទឹមនឹងនោះ ស្ត្រីម្នាក់បានសម្រាលកូននៅផ្លូវក្រោមដីដែលមានមនុស្សណែនណាន់ ដោយសារតែរថយន្តសង្គ្រោះបន្ទាន់មិននាំស្ត្រីនោះទៅមន្ទីរពេទ្យ។
បច្ចុប្បន្ននេះ ជនភៀសខ្លួនរាប់ពាន់នាក់បានប្រថុយជីវិតរបស់ខ្លួនដើម្បីឆ្លងដែនទៅអឺរ៉ុប ក្នុងគោលបំណងគេចពីជម្លោះប្រដាប់អាវុធ និងការធ្វើទុក្ខបុកម្នេញនៅតំបន់មជ្ឈិមបូព៌ា និងទ្វីបអាហ្វ្រិក៕
© រក្សាសិទ្ធិដោយ thmeythmey.com
