អន្តរជាតិ
ភ្នាក់ងារពន្លត់អគ្គិភ័យប៉ូឡូញម្នាក់រើសបានចិញ្ចៀនភ្ជាប់ពាក្យរបស់ Paris Hilton
×![]()
ដោយ: ធីតា
Paris Hilton បានវង្វេងដៃធ្វើឲ្យបាត់ចិញ្ចៀនភ្ជាប់ពាក្យរបស់នាងដែលមានតម្លៃ ១០ ម៉ឺនដុល្លារ។ សំណាងល្អ ភ្នាក់ងារពន្លត់អគ្គិភ័យជនជាតិប៉ូឡូញម្នាក់រើសបានចិញ្ចៀននេះ ហើយបានយកវាទៅដាក់នៅកន្លែងរក្សាទុកវត្ថុបាត់នៅព្រលានយន្តហោះទីក្រុង Lodz ប្រទេសប៉ូឡូញ។
សេដ្ឋីនីស្នងមរតកសណ្ឋាគារ Hilton បានមកកាន់ទីក្រុង Lodz កាលពីសប្តាហ៍មុន ដើម្បីចូលរួមក្នុងពិធីសមោសរពិភពលោកមួយ។ ចិញ្ចៀនដ៏ធំ ហើយធ្ងន់ដែលលម្អដោយគ្រាប់ពេជ្រយ៉ាងច្រើននោះ ត្រូវបានប្រទះឃើញនៅចន្លោះកៅអីនៃរថយន្តសម្រាប់ដឹកអ្នកដំណើរជាន់ខ្ពស់ ទៅកាន់យន្តហោះដែលពួកគេត្រូវជិះ នេះបើតាមការបញ្ជាក់របស់អ្នកនាំពាក្យព្រលានយន្តហោះទីក្រុង Lodz ទៅកាន់ទីភ្នាក់ងារ AFP ។
លោក Mierczyslaw Cieslaczyk ភ្នាក់ងារពន្លត់អគ្គិភ័យដែលរើសបានចិញ្ចៀននេះ មិនបានដឹងជាមុនទេថា វាគឺជារបស់តារាដ៏ល្បីល្បាញ Paris Hilton ។ ភ្នាក់ងារនេះអាចនឹងទទួលបានរង្វាន់លើកទឹកចិត្ត ដោយហេតុថា ក្រមរដ្ឋប្បវេណីប៉ូឡូញបានចែងថា រង្វាន់លើកទឹកចិត្តសម្រាប់ការរកឃើញវត្ថុដែលបាត់ ឲ្យម្ចាស់ដើមវិញ គឺត្រូវតបស្នងស្មើនឹង ១០% នៃតម្លៃវត្ថុបាត់។ ពេលនេះ គេនៅមិនទាន់ដឹងទេថា តើម្ចាស់ចិញ្ចៀនយល់ព្រមធ្វើតាមច្បាប់នេះឬយ៉ាងណា ?
តែសម្រាប់ភ្នាក់ងារនោះ គាត់បានស្រមៃទុកជាស្រេចទៅហើយថា តើគាត់ត្រូវចាយវាយប្រាក់រង្វាន់នោះយ៉ាងដូចម្តេចខ្លះ។ គាត់រំពឹងថា នឹងធ្វើដំណើរកម្សាន្តទៅកាន់ប្រទេសធាតុអាកាសក្តៅជាមួយនឹងភរិយារបស់គាត់៕
© រក្សាសិទ្ធិដោយ thmeythmey.com
