អន្តរជាតិ
×![]()
ដោយ: ថ្មីៗ
នៅតួកគី ថ្ងៃសៅរ៍ម្សិលមិញ ក្នុងជំនួបប្រទេសទាំង២០ដែលមានសេដ្ឋកិច្ចលូតលាស់ខ្លាំងជាងគេ គេក៏បានឆ្លៀតពិភាក្សាពីវិបត្តិជនភៀសខ្លួននៅអឺរ៉ុបខ្លះដែរ។ ឧបនាយករដ្ឋមន្ត្រីតួកគីបានលើកឡើងថា នឹងលើកយកប្រធានបទនេះទៅពិភាក្សាជាបែបនយោបាយ សម្រាប់ជំនួបមេដឹកនាំរដ្ឋាភិបាលប្រទេសG២០ នៅពាក់កណ្តាលខែវិច្ឆិកាខាងមុខ។ ម្សិលមិញ ជនភៀសខ្លួនរាប់ពាន់នាក់បានធ្វើដំណើរពីហុងគ្រី ទៅដល់អាល្លឺម៉ង់និងអូទ្រីសហើយ។
ត្បិតថា ជំនួបរដ្ឋមន្ត្រីហិរញ្ញវត្ថុG២០ នៅប្រទេសតួកគី ម្សិលមិញ ត្រូវបានគ្របដណ្តប់ដោយប្រធានបទទាក់ទងនឹងចិន ក៏ភាគីដែលចូលរួមប្រជុំមិនបានភ្លេចយកបញ្ហាជនភៀសខ្លួនមកដាក់សតិ គ្រប់ៗគ្នា ដែលជាតំណាងរដ្ឋនិមួយៗទេ។ ក្រៅពីការលើកឡើងរបស់លោកCevdet Yilmazជាឧបនាយករដ្ឋមន្ត្រីតួកគី ប្រធានមូលនិធិរូបិយវត្ថុអន្តរជាតិ លោកស្រីChristine Lagarde បានលើកឡើងពីអារម្មណ៍របស់លោកស្រី ដែលនៅតែនឹកភ្នកទៅរកមហន្តរាយនៅឆ្នេរសមុទ្រ។ លោកស្រីបានលើកឡើងថា នេះជាកិច្ចការរបស់គ្រប់គ្នា។
លោកChristian Noyer ជាប្រធានធនាគារបារាំងវិញ បានលើកឡើងថា នេះជាអ្វីដែលអាចជះឥទ្ធិពលលើស្ថានភាពសេដ្ឋកិច្ច ហើយក៏អាចប៉ះពាល់ជាយថាហេតុណាមួយទៅលើផ្នែកហិរញ្ញវត្ថុសាធារណៈដែរ។ លោកក៏បានគូសបញ្ជាក់ថា ការមកដល់នៃជនភៀសខ្លួនអាចនឹងក្លាយជាការពង្រឹងសក្តានុពលនៃកំណើនផងដែរ។
សម្រាប់ ការទទួលជនភៀសខ្លួនចូលស្រុក អាល្លឺម៉ង់បានបង្ហាញជំហរព្យាយាមធានាអោយថវិកាជាតិមានតុល្យភាព។ ក្នុងការទទួលយកជនភៀសខ្លួន អាល្លឺម៉ង់ប្រហែលជាអាចចាយវាយដល់ទៅ១០ពាន់លានអឺរ៉ូ ក្នុងឆ្នាំ២០១៥នេះ ពោលគឺច្រើនជាងឆ្នាំមុនដល់ទៅ ៤ដង។
ដោយឡែក ទាក់ទងនឹងប្រធានបទសេដ្ឋកិច្ច ក្នុងជំនួបកំពូលG២០វិញ សមាជិកG២០ សុទ្ធតែទទួលស្គាល់ថា ពិភពលោកគ្មានកំណើនស្របតាមការចង់បានរបស់ពួកគេទេ។ ការវិនិយោគមានតិចតួច ការធ្វើអាជីវកម្មក៏អន់ខ្សោយ ហើយបើនិយាយពីជនគ្មានការងារធ្វើវិញ ក៏មានច្រើន។ លើសពីនេះ ប្រទេសទាំងអស់កំពុងបារម្ភពីការបន្ថយល្បឿននៃកំណើនសេដ្ឋកិច្ចរបស់ចិន។ សមាជិកG២០បានព្រមព្រៀងគ្នាមិនបញ្ចុះថ្លៃរូបិយវត្ថុ ដើម្បីជំរុញអោយមានការប្រកួតប្រជែងគ្នាឡើយ។ មូលហេតុ គឺថា ក្នុងបទពិសោធន៍អាក្រក់ កន្លងមក ក្រុងប៉េកាំងបានបញ្ចុះថ្លៃប្រាក់យ័ន ធ្វើអោយប៉ះពាល់ខ្លាំងដល់ទីផ្សារហិរញ្ញវត្ថុ៕
Tag:
ជនភៀសខ្លួន
© រក្សាសិទ្ធិដោយ thmeythmey.com
