ជាតិ
សង្គមជាតិ
ក្រសួងរ៉ែ បើកឲ្យមានឡូត៍បូមខ្សាច់ថ្មីនៅទន្លេបាសាក់
× ក្រសួងរ៉ែ និងថាមពល បានចាប់ផ្តើមបើកឲ្យមានឡូត៍បូមខ្សាច់ស្របច្បាប់មួយចំនួន នៅតាមបណ្តោយដងទន្លេបាសាក់។ ការបើកឡូត៍បូមខ្សាច់ថ្មីបន្ថែមនេះ ដោយសារស្ថានផាពទន្លេបាសាក់ត្រង់ចំណុចមួយចំនួនមានខ្សាច់ដុះខ្ពស់ បណ្តាលឲ្យទន្លេគោករាក់ខ្លាំង ពិបាកធ្វើនាវាចរណ៍តាមផ្លូវទឹក និងប្រឈមនឹងការបាក់ច្រាំងដោយសារតែចរន្តទឹកហូរខុសប្រក្រតី។ នេះបើតាមលោក ឌិត ទីណា រដ្ឋលេខាធិការ និងជាអ្នកនាំពាក្យក្រសួងរ៉ែ និងថាមពល។
បើតាមលោក ឌិត ទីណា ដែលប្រាប់អ្នកសារព័ត៌មាននៅថ្ងៃទី១៧ខែកុម្ភៈ ការសិក្សាបឋម ដងទន្លេបាសាក់នេះ នឹងមានទីតាំងត្រូវស្តារខ្សាច់ច្រើនកន្លែងជាងទន្លេមេគង្គ និងទន្លេចតុមុខ ដោយសារតែទន្លេបាសាក់ មិនធ្លាប់បានបូមស្តារពីមុនមក។
ជាមួយនឹងការបើកឡូត៍បូមខ្សាច់ថ្មីនេះ ក្រសួងរ៉ែ និងថាមពល ក៏កំពុងសិក្សាពីក្រុមហ៊ុនដែលកំពុងធ្វើអាជីវកម្មខ្សាច់ ដើម្បីឲ្យមកចូលរួមដេញថ្លៃបូមខ្សាច់នៅឡូត៍បើកថ្មីនេះដែរ។ ដំណើរការដេញថ្លៃ នឹងចាប់ផ្តើមនៅពេលមន្ត្រីជំនាញរបស់ក្រសួងសិក្សាពីបច្ចេកទេស និងតំបន់ដែលត្រូវបូមរួចរាល់ជាមុនសិន។ នេះជាការបញ្ជាក់របស់មន្ត្រីជាន់ខ្ពស់របស់ក្រសួងរ៉ែដដែល មុននឹងលោកបន្តថា ក្រុមហ៊ុន ដែលមានសិទ្ធិចូលរួមដេញថ្លៃ ត្រូវតែឆ្លងកាត់ការត្រួតពិនិត្យទាំងបច្ចេកទេសសម្ភារ ដើម្បីឲ្យដំណើរការបូម ប្រព្រឹត្តិទៅតាមច្បាប់ មិនបង្កមហន្តរាយដល់បរិស្ថានធម្មជាតិ និងប៉ះពាល់ដល់ប្រយោជន៍ប្រជាពលរដ្ឋ។
សូមបញ្ជាក់ថា បច្ចុប្បន្នក្រុមហ៊ុនដែលមានអាជ្ញាបណ្ណបូមខ្សាច់នៅ ក្នុងទន្លេដោយស្របច្បាប់មានចំនួន៧ក្រុមហ៊ុន ក្នុងនោះតំបន់រកាកោងមានចំនួន៥ឡូត៍ នៅទន្លេចតុមុខត្រង់ចុងជ្រោយសណ្ឋាគារសុខា និងតំបន់ក្បែរកំពង់ផែស្វយ័តភ្នំពេញ រហូតដល់កៀនស្វាយ ខេត្តកណ្តាល។
កន្លងមកក្រសួងបានប្រើវិធានការក្តៅមួយចំនួនដើម្បីទប់ស្កាត់ការបូមខ្សាច់អនាធិបតេយ្យ ក្នុងនោះរួមមានការចុះត្រួតពិនិត្យជាប្រចាំរវាងឆ្នាំទន្លេ សហការជាមួយអាជ្ញាធរដែនដី និងកងកម្លាំងប្រដាប់អាវុធ។ លើសពីនេះ ក្រសួងក៏បានបង្កើតខ្សែទូរសព្ទទាន់ហេតុការណ៍ គឺលេខ០៩៥ ៧២៧ ៧២៧ ដែលដំណើរការ២៤ម៉ោង សម្រាប់ឲ្យប្រជាពលរដ្ឋរាយការណ៍ នៅពេលមានការបូមខ្សាច់លួចលាក់ នៅក្នុងតំបន់ដែលពួកគាត់រស់នៅផងដែរ៕
ប្រភព៖AKP
Tag:
បូមខ្សាច់
ឌិត ទីណា
© រក្សាសិទ្ធិដោយ thmeythmey.com