នៅថ្ងៃព្រហស្បតិ៍ ទី២៥ ខែកុម្ភៈ ឆ្នាំ២០១៦ អង្គការជនពិការអន្តរជាតិបានរៀបចំសិក្ខាសាលាប្រកាសបើកគម្រោង “ ការលើកកម្ពស់កិច្ចសហប្រតិបត្តិការរវាងសង្គមស៊ីវិល និងអាជ្ញាធរមូលដ្ឋានក្នុងការផ្តល់សេវាកម្មដល់ប្រជាពលរដ្ឋងាយរងគ្រោះ ” នៅសណ្ឋាគារ៧មករា ខេត្តកំពង់ចាម ដោយមានការចូលរួមជាគណៈអធិបតីពី លោក កែវ នាឬទ្ធិ នាយករងរដ្ឋបាល សាលាខេត្តកំពង់ចាមតំណាងដ៏ខ្ពង់ខ្ពស់នៃអភិបាលខេត្តកំពង់ចាម លោក ហ្សីល នូហ្សីយេ នាយកអង្គការជនពិការអន្តរជាតិ លោក ងិន សៅរ័ត្ន នាយកអង្គការជនពិការកម្ពុជា និង លោក សយ សុខន នាយកអង្គការតំណាងជនពិការជួយខ្លួនឯងស្រុកបាធាយ ។
សិក្ខាសាលានេះមានគោលបំណង៖ ១/ចែករំលែកពីការចាប់ផ្តើមបើកដំណើរការនៃគម្រោងអភិវឌ្ឍន៍មូលដ្ឋានសម្រាប់ទាំងអស់គ្នាដល់ភាគីពាក់ព័ន្ធទាំងឡាយនៅខេត្តកំពង់ចាម និងត្បូងឃ្មុំ ២/ដើម្បីលើកកម្ពស់កិច្ចសហប្រតិបត្តិការរវាងគ្នាក្នុងរយៈពេលនៃដំណើរការអនុវត្តគម្រោង ដែលនឹងចូលរួមអនុវត្តដោយអង្គការជនពិការអន្តរជាតិ ជាដៃគូជាមួយអង្គការជនពិការកម្ពុជា និងអង្គការតំណាងជនពិការជួយខ្លួនឯង ស្រុកបាធាយ ក្រោមការឧបត្ថម្ភថវិកាពីសហភាពអឺរ៉ុប (EU) ។
សិក្ខាសាលានេះក៏មានការអញ្ជើញចូលរួមពីអភិបាលស្រុក តំណាងក្រុមប្រឹក្សាឃុំ តំណាងជនពិការឃុំ នាយកទីចាត់ការផែនការនិងវិនិយាគ មន្ទីរសង្គមកិច្ច និងមន្ទីរកិច្ចការនារី
ខេត្តត្បូងឃ្មុំ និងកំពង់ចាម តំណាងអង្គការសង្គមស៊ីវិល និងអ្នកពាក់ព័ន្ធផ្សេងៗទៀត។
លោក ហ្សីល នូហ្សីយេ នាយកអង្គការជនពិការអន្តរជាតិបានមានប្រសាសន៍ឲ្យបានដឹងថា “ អង្គការជនពិការអន្តរជាតិ បានបង្កើតឡើង នៅប្រទេសកម្ពុជាតាំងពីឆ្នាំ១៩៨២ ជាអង្គការអន្តរជាតិ
មិនមែនរដ្ឋាភិបាល មិនចំណុះជាតិសាសន៍ មិនប្រកាន់គណៈបក្ស និងជាអង្គការមិនរកប្រាក់ចំណេញ ដែលមានជំនាញលើពិការភាព ហើយធ្វើការជាមួយជនពិការ ដើម្បីផ្តល់ជំនួយ និងការគាំទ្រក្នុងកិច្ចខិតខំប្រឹងប្រែងពង្រឹងសមត្ថភាពរបស់ពួកគេ។ សិក្ខាសាលាក្នុងថ្ងៃនេះមានគោលបំណងក្នុងការដោះស្រាយបញ្ហារបស់ជនពិការ ដោយមានការបង្ហាញពីសារៈសំខាន់នៃការចូលរួមរបស់ជនពិការនៅក្នុងដំណើរការនៃការនៃការអភិវឌ្ឍន៍ថ្នាក់មូលដ្ឋាន។ ក្រុមប្រឹក្សាឃុំ អ្នកផ្តល់សេវា និងសហគមន៍គួរតែយកចិត្តទុកដាក់នូវការលើកឡើងរបស់ជនពិការ ពីព្រោះសម្លេងរបស់ពួកគាត់ត្រូវបានរាប់បញ្ចូល”។
លោក កែវ នាឬទ្ធិ នាយករងរដ្ឋបាល សាលាខេត្តកំពង់ចាមបានក៏បានមានប្រសាសន៍ឲ្យដឹងដែរថា“ គម្រោងដែលនឹងបើកដំណើរការនាពេលនេះ បាននឹងកំពុងចូលរួមចំណែកបង្កើននូវទំនាក់ទំនងដ៏ល្អរវាងអាជ្ញាធរមូលដ្ឋាន និងសង្គមស៊ីវិលក្នុងការលើកកម្ពស់ ការដាក់បញ្ចូលបញ្ហានិងតម្រូវការរបស់បងប្អូនជនពិការទៅក្នុងផែនការវិនិយោគឃុំ ដែលអនុវត្តយុទ្ធសាស្ត្រអភិបាលកិច្ចល្អ និងគណនេយ្យភាពសង្គម ផ្អែកលើយន្តការ ផែនការអនុវត្តរយៈពេលបីឆ្នាំ ដំណាក់កាលទី២ របស់រាជរដ្ឋាភិបាលកម្ពុជា” ។
គួរបញ្ជាក់ឲ្យដឹងដែរថា គម្រោង“ ការលើកកម្ពស់កិច្ចសហប្រតិបត្តិការរវាងសង្គមស៊ីវិល និងអាជ្ញាធរមូលដ្ឋានក្នុងការផ្តល់សេវាកម្មដល់ប្រជាពលរដ្ឋងាយរងគ្រោះ ” នឹងអនុវត្តនៅស្រុកចំនួន៤ ឃុំចំនួន១៦ នៅខេត្តត្បូងឃ្មុំ និងកំពង់ចាម។
(អត្ថបទពាណិជ្ជកម្ម)