ប្រធានបក្សប្រឆាំងប្រាប់សកម្មជនខ្លួនកុំឲ្យគិតពីរឿងឥតប្រយោជន៍

ជាតិ

នយោបាយជាតិ

ប្រធានបក្សប្រឆាំងប្រាប់សកម្មជនខ្លួនកុំឲ្យគិតពីរឿងឥតប្រយោជន៍

06, Mar 2016 , 4:02 pm

រូបភាព

ដោយ: ថ្មីៗ

ភ្នំពេញ៖ ថ្លែងនៅក្នុងវេទិកាសកម្មជនមូលដ្ឋានក្នុងរាជធានីភ្នំពេញ នៅថ្ងៃទី០៦ មីនា ព្រឹកនេះ ឯកឧត្តម សម រង្ស៊ី ប្រធានគណបក្សសង្គ្រោះជាតិ បានប្រាប់សកម្មជនរបស់ខ្លួន កុំឲ្យគិតពីរឿងឥតប្រយោជន៍ និងកុំឆ្លើយតបនឹងរឿងទាំងនេះ គឺត្រូវគិតគូរពីរឿងបោះឆ្នោត។ ការថ្លែងរបស់ប្រធានគណបក្សសង្គ្រោះជាតិ ដែលកំពុងនិរទេសខ្លួននៅក្រៅប្រទេសរូបនេះ គឺបន្ទាប់ពីមានការចោទប្រកាន់ឯកឧត្តម កឹម សុខា ប្រធានស្តីទីគណបក្សសង្គ្រោះជាតិ ថាមានជាប់ពាក់ព័ន្ធនឹងខ្សែអាត់សំឡេងជុំវិញរឿងអាស្រូវស្នេហា។

«យើងកុំខ្វល់ខ្វាយ រឿងអត់ប្រយោជន៍ គេចង់អូសទាញយើង ឲ្យយើងទៅចូលរួម ទៅជជែក ទៅឆ្លើយឆ្លង ទៅដោះស្រាយ ចំពោះរឿងដែលអត់ប្រយោជន៍ អ្វីដែលមានប្រយោជន៍ គឺការបោះឆ្នោត ព្រោះមានតែការបោះឆ្នោតទេ ដែលអាចនាំមកការផ្លាស់ប្តូរ ដែលគោលដៅរបស់យើង» នេះជាការថ្លែងរបស់ឯកឧត្តម សម រង្ស៊ី ប្រធានគណបក្សសង្គ្រោះជាតិ តាមរយៈវីដេអូ Conference ក្នុងវេទិកាជួបសកម្មជនមូលដ្ឋាន នៅ ភូមិជាងទង សង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ នៅថ្ងៃអាទិត្យ ទី០៦ ព្រឹកមិញនេះ។

ទោះបីជាប្រធានគណបក្សប្រឆាំងធំជាងគេនៅកម្ពុជារូបនេះ មិនថ្លែងចំៗ ថាជារឿងអ្វីក៏ដោយ តែការថ្លែងនេះ គឺទំនងចង់ប្រាប់សកម្មជនរបស់ខ្លួន កុំឲ្យខ្វល់ខ្វាយជាមួយរឿងខ្សែអាត់សំឡេង ដែលជាគេសង្ស័យថា ជាសំឡេងទំនាក់ទំនងស្នេហា របស់ប្រធានស្តីទីគណបក្សសង្គ្រោះជាតិ ឯកឧត្តម កឹម សុខា ជាមួយស្ត្រីអនាមិកម្នាក់ ដែលប្រើគណនីហ្វេសប៊ុកឈ្មោះ «Mon Srey»។

គួរបញ្ជាក់ថា ជុំវិញរឿងអាស្រូវស្នេហានេះ កាលពីថ្ងៃទី០៤ មីនា មានយុវជនមួយក្រុម បានលើកគ្នាទៅមុខទីស្នាក់ការកណ្តាលគណបក្សសង្គ្រោះជាតិនៅរាជធានីភ្នំពេញ ដើម្បីដាក់ញត្តិទាមទារឲ្យ ឯកឧត្តម កឹម សុខា ឆ្លើយតបជាមួយពួកគេ ថា រឿងរ៉ាវស្នេហានេះ ពិត ឬមិនពិត។ ហើយនៅ ថ្ងៃទី០៥ មីនា ម្សិលមិញ យុវជនទាំងនេះ ក៏បានចូលរួមក្នុងវេទិការជួបសកម្មជនមូលដ្ឋាននៅខេត្តព្រះសីហនុផងដែរ។ ហើយនៅព្រឹកថ្ងៃអាទិត្យទី០៦ មីនា ពួកគេក៏បានចូលរួមក្នុងវេទិការបស់គណបក្សសង្គ្រោះជាតិនៅភ្នំពេញដែរ ដើម្បីទាមទារឲ្យឯកឧត្តម កឹម សុខា ឆ្លើយតបពីរឿងចចាមអារ៉ាមនេះ៕