ជាតិ
នយោបាយជាតិ
ចេញពី CNRP ទៅនៅសំបុកឃ្មុំបាន៣ខែ លោក អ៊ុក ស៊ុយ សម្រេចបង្កើតបក្សថ្មីមួយទៀត
× លោក ម៉ម សូណង់ដូ ប្រធានគណបក្សសំបុកឃ្មុំសង្គមប្រជាធិបតេយ្យ បានបាត់បង់ឥស្សរជននយោបាយម្នាក់ទៀតហើយ គឺលោក អ៊ុក ស៊ុយ ដែលជាអគ្គលេខាធិការគណបក្ស។ លោក អ៊ុក ស៊ុយ បានសម្រេចចិត្តលាលែងពីតំណែងអគ្គលេខាធិការគណបក្សសំបុកឃ្មុំសង្គមប្រជាធិបតេយ្យ កាលពីថ្ងៃទី៤ ខែកុម្ភៈ ឆ្នាំ២០១៦ ។ លោក អ៊ុក ស៊ុយ បានអះអាងថា ការដើរចេញពីជម្រកចុងក្រោយនេះ មិនមែនព្រោះតែលោក មានទំនាស់ជាមួយលោក ម៉ម សូណង់ដូ ឡើយ តែដោយសារតែអ្នកមានលុយនិងអំណាច កំពុងជះឥទ្ធិពលទៅក្នុងគណបក្ស។
គ្រាន់តែកាត់ផ្តាច់និស្ស័យនយោបាយជាមួយលោក ម៉ម សូណង់ដូ ប្រធានគណបក្សសំបុកឃ្មុំសង្គមប្រជាធិបតេយ្យ មិនទាន់បានមួយសប្តាហ៍ផង លោក អ៊ុក ស៊ុយ ក៏បានដាក់លិខិតទៅកាន់ក្រសួងមហាផ្ទៃភ្លាម នៅរសៀលថ្ងៃទី៧ ខែមីនា នេះ ដើម្បីសុំបង្កើតគណបក្សផ្ទាល់ខ្លួន ដែលមានឈ្មោះថា «គណបក្សខ្មែរដើម្បីខ្មែរ»។
មូលហេតុ ដែលបណ្តាលឲ្យ លោក អ៊ុក ស៊ុយ សម្រេចចិត្តចាកចេញពីគណបក្សសំបុកសង្គមប្រជាធិបតេយ្យ ហើយទៅបង្កើតគណបក្សថ្មី គឺដោយសារតែ អ្នកមានលុយ មានអំណាច កំពុងតែជ្រៀតជ្រែកចូលក្នុងដែនអធិបតេយ្យភាពនៃគណបក្សនេះ។ លោកថា គោលបំណងធំបំផុតក្នុងជីវិតនយោបាយ គឺលោកចង់ទទួលបានឯករាជ្យនិងសេរីភាពគ្រប់គ្រាន់ក្នុងការធ្វើកិច្ចការដើម្បីសម្រេចឧត្តមគតិរបស់ខ្លួននិងប្រយោជន៍ជាតិ ដោយគ្មានការបង្គាប់បញ្ជាពីបុគ្គលខាងក្រៅ។ ជាងនេះទៀត លោក ក៏បានបន្ថែមថា ការបង្កើតគណបក្សថ្មីនេះ គឺដើម្បីមានឱកាសពេញលេញនិងអធិបតេយ្យភាពបរិបូរក្នុងការធ្វើនយោបាយតាមការយល់ដឹងនិងឆន្ទៈរបស់ខ្លួន ផងដែរ។
លោក អ៊ុក ស៊ុយ បានបញ្ជាក់ប្រាប់សារព័ត៌ាមានថ្មីៗបែបនេះថា៖«តាំងពីខ្ញុំចូលជាមួយលោក ម៉ម សូណង់ដូ ខ្ញុំមិនដែលមានបញ្ហាអ្វីជាមួយគាត់នោះទេ។ តែខ្ញុំមិនពេញចិត្ត ត្រង់ចំណុចដែលមានអ្នកខាងក្រៅលូកដៃចូល ធ្វើឲ្យបក្សគ្មានភាពឯករាជ្យក្នុងការសម្រេចកិច្ចការ។ អ៊ីចឹងខ្ញុំនៅធ្វើអ្វីទៀត បើយើងគ្មានសិទ្ធិពេញលេញដើម្បីធ្វើកិច្ចការដែលយើងចង់ធ្វើផងហ្នឹង»។
យ៉ាងក៏ដោយចុះ លោកព្យាយាមមិនបំភ្លឺពីអ្នកមានលុយ មានអំណាច ដែលកំពុងដាក់ជើង លូកដៃចូលក្នុងបក្សនោះ ថាជាអ្នកណាឡើយ ដោយលោកអះអាងថា អ្វីៗនឹងត្រូវបានបកស្រាយលម្អិតក្នុងសន្និសីទសារព័ត៌មាន។ មេបក្សថ្មីរូបនេះ នឹងបើកសន្និសីទសារព័ត៌មាន ស្តីពីការបង្កើតគណបក្សរបស់ខ្លួន តែលោក មិនអាចប្រាប់ឲ្យច្បាស់ថា នៅពេលណានោះទេ។
សូមបញ្ជាក់ថា លោក អ៊ុក ស៊ុយ បានប្រឡូកក្នុងវិស័យនយោបាយជាលើកដំបូងក្នុងគណបក្សហ្វ៊ុនស៊ិនប៊ិច តាំងពីទសវត្សរ៍ទី៨០មកម្ល៉េះ។ ក្រោយមក លោកក៏បានបោះបង់គណបក្សដើមទីនេះចោល ហើយចូលរួម ជាមួយគណបក្សសិទ្ធិមនុស្សរបស់ លោក កឹម សុខា។ ក្នុងឆ្នាំ២០១២ លោក អ៊ុក ស៊ុយ បានបន្តជីវិតនយោបាយ ជាមួយគណបក្សសង្គ្រោះជាតិ ក្រោយពីលោក សម រង្ស៊ី និងលោក កឹម សុខា បង្រួបង្រួមគ្នា។ រហូតដល់ខែវិច្ឆិកា ឆ្នាំ២០១៥ លោក ក៏បានចាកចេញពីគណបក្សសង្គ្រោះជាតិ ហើយចូលរួមជាមួយលោក ម៉ម សូណង់ដូ ដោយទទួលបានតំណែងជាអគ្គលេខាធិការក្នុងបក្សចុងក្រោយនេះ។ នៅទីបំផុត លោក ក៏បានបោះបង់ចោលគណបក្សសំបុកឃ្មុំសង្គមប្រជាធិបតេយ្យ ហើយមកបង្កើតគណបក្សដោយខ្លួនឯង៕
Tag:
អ៊ុក ស៊ុយ
សំបុកឃ្មុំ
ខ្មែរដើម្បីខ្មែរ
© រក្សាសិទ្ធិដោយ thmeythmey.com