អន្តរជាតិ
នយោបាយអន្តរជាតិ
រដ្ឋាភិបាលមីយ៉ាន់ម៉ាថ្មីនៃបក្សលោកស្រីស៊ូជី ជាក្តីសង្ឃឹមនៃការកសាងសន្តិភាពសម្រាប់ក្រុមឧទ្ទាម ![](https://image.thmeythmey.com/pictures/2016/03/20/rtr4tcop11111.jpg)
×![]()
ការកសាងសន្តិភាពគឺជាវិស័យអាទិភាពមួយរបស់មីយ៉ាន់ម៉ាក្នុងដំណើរការអភិវឌ្ឍន៍ជាតិ ដ្បិតប្រទេស មួយនេះពោរពេញទៅដោយក្រុមឧទ្ទាមចម្រុះជាតិសាសន៍។ ស្របជាមួយនឹងការចាប់ផ្តើមនៃនីតិកាលរដ្ឋាភិបាលថ្មីរបស់បក្សសម្ព័ន្ធជាតិដើម្បីប្រជាធិបតេយ្យ តំណាងក្រុមឧទ្ទាមជនជាតិភាគតិចក៏កំពុងរង់ចាំក្នុងការសហការ និងចរចាដើម្បីស្តារសន្តិភាពឡើងវិញផងដែរ។
តំណាងក្រុមឧទ្ទាម បានប្រកាសនៅថ្ងៃទី១៩ ខែមីនា ម្សិលមិញថា ពួកគេពិតជាចង់កសាងសន្តិភាព ជាមួយនឹងរដ្ឋាភិបាលស៊ីវិលថ្មីដើម្បីដោះស្រាយលើបញ្ហានៃការប្រឈមមុខគ្នាជាច្រើនទសវត្សរ៍ ហើយនោះ។ សេចក្តីប្រកាសនេះ ធ្វើឡើងក្រោយពីការចរចាសន្តិភាពជាមួយនឹងរដ្ឋាភិបាលលោក ប្រធានាធិបតីជិតផុតអាណត្តិថេន សេន ហាក់ដូចជាមិនមានពន្លឺ ខណៈការប៉ះទង្គិចគ្នានៅតែបន្តកើត មាន។
តំណាងក្រុមទាហានរំដោះជាតិតាអាង(TNLA) ដែលជាក្រុមឧទ្ទាមមួយដ៏មានឥទ្ធិពលដែលត្រូវបានរដ្ឋាភិបាលលោកថេន សេន បដិសេធមិនឲ្យចុះហត្ថលេខាបទឈប់បាញ់កាលពីឆ្នាំ២០១៥កន្លងទៅ បានអះអាងថា ពួកគេ ពិតជានឿយហត់ចំពោះការប៉ះទង្គិចជាមួយនឹងកងកម្លាំងរបស់រដ្ឋាភិបាលយោធា។
បន្ថែមពីនេះ តំណាងឧទ្ទាម ក៏បានបញ្ជាក់ថា ពួកគេ បានត្រៀមលក្ខណៈជាស្រេចហើយក្នុងការធ្វើការជាមួយនឹងរដ្ឋាភិបាលស៊ីវិលថ្មីដែលនឹងត្រូវដឹកនាំដោយលោកប្រធានាធិបតីត្រៀមកាន់តំណែង ធិន ច។ លោក ធិន ច ដែលជាជំនិតរបស់ប្រមុខបក្សឈ្នះឆ្នោតលោកស្រីអ៊ុងសាន ស៊ូជី ត្រូវបានសភា មីយ៉ាន់ម៉ា បោះឆ្នោតគាំទ្រជាប្រធានាធិបតីថ្មីមីយ៉ាន់ម៉ា ជំនួសលោកថេន សេន។ លោក ធិន ច នឹងចាប់ផ្តើមដឹកនាំរដ្ឋាភិបាលថ្មីនៅថ្ងៃទី០១ ខែមេសា ខាងមុខនេះផងដែរ។
ជាមួយគ្នានេះ តំណាងក្រុមឧទ្ទាមក៏បានសង្កត់ធ្ងន់ថា « រដ្ឋាភិបាលថ្មីមិនត្រឹមតែជាក្តីសង្ឃឹមរបស់ក្រុម ប្រជាជនជាតិសាសន៍ភាគច្រើននោះទេ តែសម្រាប់ប្រជាជនទូទាំងប្រទេសតែម្តង»។ ហើយមានតែ រដ្ឋាភិបាលដែលកើតចេញពីការបោះឆ្នោតប៉ុណ្ណោះនោះទេ ដែលអាចដឹងពីសេចក្តីត្រូវការរបស់ប្រជា ជន។
សូមបញ្ជាក់ផងដែរ ក្នុងអាណត្តិរដ្ឋាភិបាលពាក់កណ្តាលយោធា-ស៊ីវិល ដែលចាប់ផ្តើមពីឆ្នាំ២០១១ លោក ថេន សេន ក៏បានព្យាយាមចរចាដើម្បីឈានទៅរកការចុះហត្ថលេខាលើកិច្ចព្រមព្រៀងសន្តិភា ពស្តីពីបទឈប់បាញ់ផងដែរ។ យ៉ាងណាមិញ ក្រោមការប្រឹងប្រែងនេះ មានតែតំណាងក្រុមជនជាតិ ភាគតិចតែមួយចំនួនប៉ុណ្ណោះដែលចុះហត្ថលេខា ហើយហេតុផលមួយចំនួននៃការអវត្តមាននៃតំណាងជនជាតិភាគតិចផ្សេងទៀត ដ្បិតរដ្ឋាភិបាលលោកថេន សេន បានបដិសេធមិនឲ្យពួកគេចូល រួមដោយសារក្រុមឧទ្ទាមប្រដាប់អាវុធទាំងនោះ ធ្លាប់ធ្វើសង្គ្រាមជាមួយនឹងរដ្ឋាភិបាល៕
© រក្សាសិទ្ធិដោយ thmeythmey.com