អន្តរជាតិ
ជំហររចិនលើសន្តិសុខនុយក្លេអ៊ែរ បង្ហាញពីការទទួលខុសត្រូវនិងឧត្តមគតិ ![](https://image.thmeythmey.com/pictures/2016/03/26/china-26-03.jpg)
×![]()
ប្រធានាធិបតីចិនលោក ស៊ី ជិនពីង នឹងទៅប្រជុំកំពូលសន្តិសុខនុយក្លេអ៊ែរលើកទី៤ នៅរដ្ឋធានីវ៉ាស៊ីនតោន ដែលចាប់ផ្ដើមនៅថ្ងៃទី៣១ ខែមីនាខាងមុខ។ កិច្ចប្រជុំនេះជាវេទិកាសំខាន់ដែលបង្ហាញពីតួនាទីរបស់ចិនក្នុងការកសាងប្រព័ន្ធសន្តិសុខនុយក្លេអ៊ែរពិភពលោក ក៏ដូចជាការគាំទ្ររបស់ចិនលើកិច្ចសហប្រតិបត្តិការពិភពលោកផងដែរ។
តបតាមការអញ្ជើញរបស់ប្រធានាធិបតី បារ៉ាក់ អូបាម៉ា ប្រធានាធិបតីចិនលោក ស៊ី ជិនពីង នឹងធ្វើដំណើរទៅវ៉ាស៊ីនតោនដើម្បីចូលរួមប្រជុំសន្តិសុខនុយក្លេអ៊ែរ (NSS) ខណៈប្រធានបទស្ដីពីសន្តិសុខនុយក្លេអ៊ែរ ក្លាយជាបញ្ហាដ៏សំខាន់ដែលត្រូវការដំណោះស្រាយបន្ទាន់។ គ្រោះថ្នាក់នៃអាវុធនុយក្លេអ៊ែរ ធ្វើឲ្យពិភពលោកបារម្ភយ៉ាងខ្លាំង ចាប់តាំងពីបញ្ហានេះលេចជារូបរាងឡើងនៅអំឡុងពេលសង្គ្រាមត្រជាក់។
នៅក្រោយព្រឹត្តិការណ៍ថ្ងៃទី១១ ខែកញ្ញារហូតដល់កិច្ចប្រជុំ NSS លើកទី១ក្នុងឆ្នាំ២០១០ សន្តិសុខនុយក្លេអ៊ែរ មិនមែនត្រឹមតែជារបៀបវារៈនយោបាយក្នុងប្រទេសទាំងអស់នោះទេ ប៉ុន្តែវាគឺជាការព្រួយបារម្ភជាសាធារណៈ។ មួយវិញទៀតនោះ វាជារឿងមិនអាចខ្វះបាននៃសន្តិសុខអន្តរជាតិ។ សន្តិសុខនុយក្លេអ៊ែរ ជាចំណុចសំខាន់ដែលធានាការអភិវឌ្ឍដោយចីរភាពរបស់ថាមពលនុយក្លេអ៊ែរ។
យ៉ាងណាមិញ អ្វីដែលគេត្រូវដឹងនោះគឺ ថាមពលប្រភេទនេះប្រៀបដូចជាកាំបិតមុខពីរដូច្នោះដែរ។ វាមានផលប្រយោជន៍ ប៉ុន្តែវាក៏មានការប្រថុយប្រថានដែលអាចបង្កផលប៉ះពាល់ដល់អនាគតមនុស្សលោក ដោយសារការប្រើប្រាស់វាផងដែរ។ ហេតុការណ៍កើតឡើងនៅ Chernobyl អ៊ុយក្រែន និងនៅThree Mile Island ព្រមទាំងមហន្តរាយនៅFukushima Daiichi ជប៉ុនកន្លងមក សុទ្ធតែជាភស្តុតាងបង្ហាញថា ការអភិវឌ្ឍថាមពលនុយក្លេអ៊ែរ និងសន្តិសុខនុយក្លេអ៊ែរ ត្រូវតែដើរជាមួយគ្នា។
លើសពីនោះទៅទៀត សន្តិសុខនុយក្លេអ៊ែរជាជញ្ជាំងភ្លើងប្រឆាំងនឹងភេរវកម្មនុយក្លេអ៊ែរ ដ្បិតការកាន់កាប់នុយក្លេអ៊ែរពីសំណាក់ក្រុមភេរវជន មិនមែនជារឿងល្អទេ ហើយពិតណាស់ថា វាត្រូវការវិធានការសុវត្ថិភាពដើម្បីការពារ។ ម្យ៉ាងទៀត សន្តិសុខនុយក្លេអ៊ែរក៏ជាកត្តាបង្កើនការទុកចិត្តក្នុងតំបន់ទៀតផង។ ផលប៉ះពាល់នុយក្លេអ៊ែរគឺមិនមានព្រំដែននោះទេ និងអាចប៉ះពាល់ដល់ប្រទេសជាច្រើន ដូច្នេះប្រទេសទាំងអស់ត្រូវជួយគ្នាលុបបំបាត់ការព្រួយបារម្ភនានា និងបង្កើនជំនឿជាក់រវាងគ្នានិងគ្នា។
ចាប់តាំងពីការបង្កើតនៅឆ្នាំ២០១០ កិច្ចប្រជុំកំពូលសន្តិសុខនុយក្លេអ៊ែរ បានដើរតួយ៉ាងសំខាន់ក្នុងការជំរុញកិច្ចសហប្រតិបត្តិការ និងការកសាងប្រព័ន្ធអន្តរជាតិមួយសម្រាប់សន្តិសុខនុយក្លេអ៊ែរ។ ទាក់ទិននឹងបញ្ហានេះ គេមិនអាចមើលរំលងពីតួនាទីរបស់ចិនបានទេ។ ក្នុងជំនួបនៅទីក្រុងឡាអេនៅឆ្នាំ២០១៤ ប្រធានាធិបតី ស៊ី ជិនពីង បានបញ្ជាក់ពីគោលជំហររបស់ចិនចំពោះបញ្ហានេះ ដោយបានឲ្យតម្លៃស្មើគ្នាលើការអភិវឌ្ឍនិងសន្តិសុខ សិទ្ធិនិងកាតព្វកិច្ច ព្រមទាំងចំណុចសំខាន់ផ្សេងៗទៀត។
ការប្រកាសរបស់លោក ស៊ី ជិនពីង បង្ហាញពីការប្ដេជ្ញាចិត្តរបស់ចិនក្នុងនាមជាមហាអំណាចមួយចំពោះសន្តិសុខនុយក្លេអ៊ែរ ប្រកបដោយការទទួលខុសត្រូវនិងពោរពេញដោយសកម្មភាព។ ជាមួយនឹងការមកដល់កិច្ចប្រជុំខាងមុខនៅទីក្រុងវ៉ាស៊ីនតោន គេជឿថា សហគមន៍អន្តរជាតិ នឹងប្រឹងប្រែងបន្តទៀតដើម្បីជំរុញសន្តិសុខនុយក្លេអ៊ែរ។ នេះមានន័យថា ប្រជាជនទូទាំងពិភពលោកនឹងកាន់តែទិកចិត្តលើចីរភាពនៃសន្តិសុខនុយក្លេអ៊ែរ និងផលប្រយោជន៍ដែលបានមកពីថាមពលនុយក្លេអ៊ែរ៕
© រក្សាសិទ្ធិដោយ thmeythmey.com