ជាតិ
នយោបាយជាតិ
លោក កែម ឡី ស្នើឲ្យអ្នកនយោបាយទៅដាំដំឡូង បើខ្លាចការរិះគន់
× ភ្នំពេញ៖ លោក កែម ឡី អ្នកវិភាគសង្គមនយោបាយនៅក្នុងប្រទេសកម្ពុជា បានបញ្ចេញទស្សនៈនៅថ្ងៃអង្គារ៍នេះ ដោយស្នើឲ្យអ្នកនយោបាយ ឬគណបក្សនយោបាយ ទៅដាំដំឡូងវិញទៅ ប្រសិនបើពួកគេខ្លាចការរិះគន់ ពីមហាជននោះ។ ការអត្ថាធិប្បាយរបស់អ្នកវិភាគមិនសំចៃមាត់រូបនេះ បានធ្វើឡើងក្នុងខណៈពេលដែលស្ថានភាពនយោបាយនៅក្នុងប្រទេសកម្ពុជា មានសភាពក្តៅគគុក ហើយមន្ត្រីជាន់ខ្ពស់ការពារសិទ្ធិមនុស្សមួយចំនួន និងអ្នកវិភាគមួយចំនួនកំពុងទទួលរងពាក្យបណ្តឹងជាបន្តបន្ទាប់។
ការរិះគន់, គំនិតខ្វែងគ្នា, គំនិតខុសគ្នា, បញ្ច្រាសគ្នា…។ ទាំងអស់នេះ សុទ្ធសឹងតែជាគោលការណ៍គ្រឹះនៃលទ្ធិប្រជាធិបតេយ្យ។ នៅក្នុងប្រទេសជឿនលឿនប្រជាធិបតេយ្យ គេឲ្យនិយមន័យថា មតិខុសគ្នា ឬមតិចម្រុះ ប្រៀបបានទៅនឹងសួនច្បារចម្រុះពណ៌ នៃគោលការណ៍ប្រជាធិបតេយ្យ។ និយាយបែបផ្សេង មានន័យថា មតិកាន់តែច្រើន ធ្វើឲ្យប្រជាធិបតេយ្យកាន់តែល្អ។
លោក កែម ឡី អ្នកវិភាគសង្គមនយោបាយនៅក្នុងប្រទេសកម្ពុជា ដែលរិះគន់រដ្ឋាភិបាលកម្ពុជាមិនសំចៃមាត់ បានអត្ថាធិប្បាយថា៖«អ្នកនយោបាយ ឬគណបក្សនយោបាយណាដែលខ្លាចការរិះគន់ គួរជ្រើសរើសមុខរបរដាំដំឡូងវិញល្អជាង»។ លោកបន្តទៀតថា ភ្នាក់ងាររដ្ឋ និងបុគ្គលសាធារណៈ ដែលមានទំនួលខុសត្រូវខ្ពស់ និងមានគណនេយ្យភាពសង្គមល្អ បុគ្គលនោះ អ្នកនយោបាយនោះ អ្នកផ្តល់សេវាសាធារណៈនោះ ត្រូវការចាំបាច់បំផុតនូវមតិចូលរួម ការរិះគន់ប្រកបដោយការគោរព និងផ្តល់តម្លៃខ្ពស់លើមតិរិះគន់ បើទោះជាមតិ ឬយោបល់នោះពិបាកស្តាប់ក៏ដោយ។
អ្នកវិភាគសង្គមនយោបាយដដែល បានបញ្ជាក់ទៀតថា រដ្ឋាភិបាលដែលមាននីតិរដ្ឋ និងស្ថាប័នដែលមានស្តង់ដារខ្ពស់ បានចំណាយថវិកាច្រើនណាស់ក្នុងមួយឆ្នាំៗ ដើម្បីជួលអ្នកជំនាញមកវាយតម្លៃ និងរិះគន់ប្រកបដោយវិជ្ជាជីវៈ ដើម្បីផ្តល់ឱកាសឲ្យម្ចាស់ស្ថាប័ន អ្នកដឹកនាំបានដឹងពីបញ្ហា មូលហេតុនៃបញ្ហា និងយុទ្ធសាស្ត្រល្អក្នុងការកែលម្អ។
នៅចុងបញ្ចប់នៃសំណេរនៅលើទំព័រហ្វេសប៊ុករបស់លោក លោក កែម ឡី បានអត្ថាធិប្បាយថា លោក រីករាយបំផុត នូវមតិចូលរួមប្រាប់ពីកំហុសរបស់លោក ហើយលោកគោរព ស្រឡាញ់មតិរិះគន់បំផុត បើទោះជាមតិរិះគន់នោះ ប្រកបដោយអសីលធម៌ក្តី ឬ មតិនោះបរិហារកេរ្តិ៍ បង្ខូចកិត្តិយស និងបះពាល់សេចក្តីថ្លៃថ្នូររបស់លោកយ៉ាណាក៏ដោយ។
សូមបញ្ជាក់ថា ការអត្ថាធិប្បាយរបស់អ្នកវិភាគមិនសំចៃមាត់រូបនេះ បានធ្វើឡើងក្នុងខណៈពេលដែលស្ថានភាពនយោបាយនៅក្នុងប្រទេសកម្ពុជាកំពុងមានសភាពក្តៅគគុក ហើយមន្ត្រីជាន់ខ្ពស់ការពារសិទ្ធិមនុស្សមួយចំនួន និងអ្នកវិភាគមួយចំនួនកំពុងទទួលរងពាក្យបណ្តឹងជាបន្តបន្ទាប់៕
© រក្សាសិទ្ធិដោយ thmeythmey.com