កីឡាអន្តរជាតិ
អន្តរជាតិ
UEFA ប្រជុំក្រុមប្រឹក្សាវិន័យដើម្បីដាក់ទណ្ឌកម្មរុស្ស៊ីទាក់ទងនឹងទង្វើរបស់អ្នកគាំទ្រ ក្រុមអ្នកគាំទ្ររុស្ស៊ី ត្រូវបានគេថតឃើញសកម្មភាពចូលទៅវាយក្រុមអ្នកគាំទ្រអង់គ្លេស។ រូបថត AFP
× សហព័ន្ធកីឡាបាល់ទាត់ទ្វីបអឺរ៉ុប (UEFA) បានបើកកិច្ចប្រជុំក្រុមប្រឹក្សាវិន័យដើម្បីដាក់ទណ្ឌកម្មប្រឆាំងនឹងសហភាពកីឡាបាល់ទាត់រុស្ស៊ី បន្ទាប់ពីក្រុមអ្នកគាំទ្របានបង្កចលាចលនៅទីក្រុង Marseille ក្រោយអង់គ្លេស និងរុស្ស៊ី បញ្ចប់ក្នុងលទ្ធផលស្មើ ១-១ នាការប្រកួត Euro ឆ្នាំ២០១៦ ។
យោងតាមការផ្សាយរបស់ BBC សហព័ន្ធកីឡាបាល់ទាត់ទ្វីបអឺរ៉ុប បានចោទប្រកាន់ទៅលើក្រុមអ្នកគាំទ្ររុស្ស៊ី ពីបទបង្កការរំខាន ឥរិយាបទរើសអើងជាតិសាសន៍ និងការដុតកាំជ្រួចយ៉ាងអាណាធិបតេយ្យ។
ដោយសារតែរូបភាពវីដេអូបង្ហាញថា ក្រុមអ្នកគាំទ្ររុស្ស៊ី បានចូលទៅរំខានក្រុមអ្នកគាំទ្រអង់គ្លេស UEFA មិនទាន់មានចំណាត់ការអ្វីឡើយលើសហព័ន្ធកីឡាបាល់ទាត់អង់គ្លេស (FA)។ នាពេលនេះ រុស្ស៊ី ត្រូវបង្ហាញភស្តុតាងពីភាពត្រឹមត្រូវរបស់ខ្លួនដល់ UEFA នៅមុនការប្រជុំសម្រេចផ្លូវការនៅថ្ងៃអង្គារ។
ការប៉ះទង្គិចគ្នាក្រោយការប្រកួតរុស្ស៊ី-អង់គ្លេស បានបណ្តាលឲ្យអ្នកគាំទ្រអង់គ្លេសមួយចំនួនត្រូវបញ្ជូនទៅកាន់មន្ទីរពេទ្យ។ នារយៈពេលបីថ្ងៃចុងក្រោយនេះ គេក៏សង្កេតឃើញថា អំពើហិង្សាបានកើតឡើងជាប់គ្នារវាងក្រុមអ្នកគាំទ្រជម្រើសជាតិអង់គ្លេស និងក្រុមអ្នកគាំទ្រជម្រើសជាតិផ្សេងទៀត រួមទាំងប៉ូលិសផងដែរ។
អង្គភាពកីឡាបាល់ទាត់ប្រចាំទ្វីបអឺរ៉ុប មិនទាន់ប្រកាសដាក់ពិន័យជាផ្លូវការណាមួយឡើយ ដោយពួកគេគ្រាន់តែព្យាយាមអំពាវនាវឲ្យមានការស្ងប់ស្ងៀមប៉ុណ្ណោះ៕
© រក្សាសិទ្ធិដោយ thmeythmey.com