ជាតិ
តុលាការនឹងបន្តសវនាការករណីឃាតកម្មលោក អ៊ឹង ម៉េងជឺ នៅថ្ងៃទី៨ សីហា ![](https://image.thmeythmey.com/pictures/2016/07/15/uong_mengchoeu.jpg)
×![]()
ភ្នំពេញ៖ ក្រុមប្រឹក្សាជំនុំជម្រះសាលាដំបូងរាជធានីភ្នំពេញ នឹងបន្តសវនាការជំនុំជម្រះករណីឃាតកម្មលោក អ៊ឹង ម៉េងជឺ ដែលកើតឡើងកាលពីខែវិច្ឆិកា ឆ្នាំ២០១៤ នៅថ្ងៃទី៨ ខែសីហា ឆ្នាំ២០១៦នេះទៀត។ នេះបើតាមលោក លី សុផាន់ណា អ្នកនាំពាក្យសាលាដំបូង រាជធានីភ្នំពេញ។
ក្រុមប្រឹក្សាជំនុំជម្រះសាលាដំបូងរាជធានីភ្នំពេញ រួមមាន លោក តុប ឈុនហេង លោក ហេង កេសរោ លោក ម៉េង តូនី និងលោក ហ៊ឹង ប៊ុនថន ជាតំណាងអយ្យការ បានបើកសវនាការជំនុំជម្រះរឿងក្តីឃាតកម្មលោក អ៊ឹង ម៉េងជឺ ដែលមានជនជាប់ ថោង សារ៉ាត់ និងជនជាប់ចោទ ៥នាក់ទៀត នៅថ្ងៃទី១៥ ខែកក្កដា ឆ្នាំ២០១៦។ នេះបើតាមអ្នកនាំពាក្យអយ្យការអមសាលាដំបូងរាជធានីភ្នំពេញ។
លោក លី សុផាន់ណា បានផ្ញើសារប្រាប់អ្នកសារព័ត៌មានតាមប្រព័ន្ធ Telegram ថា អង្គសវនាការបានដំណើរការសួរចម្លើយជនជាប់ចោទឈ្មោះ កូយ ចាន់ថុល ចំណោមជនជាប់ចោទទាំង ៦នាក់ ដោយសារជនជាប់ចោទ ថោង សារ៉ាត់ អវត្តមានដោយមូលហេតុមានជំងឺ រីឯជនជាប់ចោទម្នាក់គឺ ឈ្មោះ លី សៅ បានស្លាប់។
តែយ៉ាងណា លោកពុំទាន់អាចបញ្ជាក់លទ្ធផលលម្អិតនៃអង្គសវនាការពេញមួយព្រឹកដែលតុលាការសម្រេចផ្អាកវិញ នៅម៉ោង ១១ព្រឹកនេះឡើយ។ លោកលើកឡើងថា សវនាការនេះ នឹងបន្តនៅម៉ោង ៨ព្រឹកថ្ងៃទី៨ ខែសីហា ឆ្នាំ២០១៦ទៀត។
លោកឧកញ៉ា អ៊ឹង ម៉េងជឺ អាយុ ៥៣ ឆ្នាំ ជាថៅកែក្រុមហ៊ុន ស៊ីម៉ងត៍ត្បូងពេជ្រ និងជាប្រធានក្រុមហ៊ុន Shimmex Group ត្រូវខ្មាន់កាំភ្លើង (ឃាតករ) បាញ់សម្លាប់ កាលពីម៉ោង ៧យប់ថ្ងៃទី ២២ ខែវិច្ឆិកា ឆ្នាំ ២០១៤ នៅពេលលោកចុះពីរថយន្តឡិចស៊ីស ៥៧០ ទិញផ្លែឈើ នៅហាងលក់ផ្លែឈើមួយ ស្ថិតនៅផ្លូវលេខ ២៧៤ សង្កាត់ទួលស្វាយព្រៃទី ២ ខណ្ឌចំការមន។
ពាក់ព័ន្ធនឹងសំណុំរឿងឃាតកម្មដ៏ឃោរឃៅកណ្តាលរាជធានីភ្នំពេញនេះ តុលាការ កាលពីខែធ្នូ ឆ្នាំ២០១៤ បានសម្រេចឃុំខ្លួនជនជាប់ចោទចំនួន ៨ នាក់ រួមមាន ១, ឈ្មោះ សៀង វាសនា ភេទប្រុស អាយុ ៤៤ ឆ្នាំ (សង្ស័យជាខ្មាន់កាំភ្លើង) និង២, ឈ្មោះ លី សៅ ហៅ វី ភេទប្រុស អាយុ ៤៣ឆ្នាំ (សង្ស័យជាអ្នកបើកម៉ូតូឌុបឃាតករ) ពីបទ «ឃាតកម្មគិតទុកជាមុន» តាមមាត្រា ២០០ នៃក្រមព្រហ្មទណ្ឌ។ ចំណែកឯ ៣, ឈ្មោះ មាស សម្បត្តិ ភេទប្រុស អាយុ ២៧ឆ្នាំ (ជាអ្នកបើកម៉ូតូបិទគូទ) ទី៤, ឈ្មោះ កូយ ចាន់ថុល ភេទប្រុស អាយុ ២៩ ឆ្នាំ (ជាអ្នកជិះម៉ូតូពីក្រោយ) និងទី៥ ឈ្មោះ ឈុន ចិត្រា ភេទប្រុស អាយុ ៣៥ ឆ្នាំ (ម្ចាស់ម៉ូតូ) ត្រូវបានតុលាការចោទប្រកាន់ពីបទ «អ្នកសមគំនិតក្នុងអំពើឃាតកម្មគិតទុកជាមុន» តាមមាត្រា ២៩ នៃក្រមព្រហ្មទណ្ឌ។
រីឯ ជនជាប់ចោទទី៥ ឈ្មោះ ថោង សារ៉ាត់ ឧត្តមសេនីយ៍ទោនៃកងយោធពលខេមរភូមិន្ទ ជាថៅកែសាច់ប៉ាត់តេ ៩៩៩ ម្ចាស់បុរី ៩៩៩ និង ជាប្រធានក្រុមហ៊ុន Meanchey International Investment ត្រូវបានតំណាងអយ្យការសម្រេចចោទប្រកាន់ពីបទ «ផ្តើមគំនិត ក្នុងអំពើឃាតកម្ម គិតទុកជាមុន» តាមមាត្រា ២៨ និង ២០០ នៃក្រមព្រហ្មទណ្ឌ និងពីបទ «កាន់កាប់ដឹកជញ្ជូន ប្រើប្រាស់អាវុធគ្មានការអនុញ្ញាត» តាមមាត្រា ៤៩០ នៃក្រមព្រហ្មទណ្ឌ។
ចំណែកជនជាប់ចោទ ២ នាក់ទៀត ដែលត្រូវជាឪពុកម្តាយរបស់ ថោង សារ៉ាត់ គឺលោក ថោង ចំរើន ហៅតាន់ សុខ អាយុ ៦៥ ឆ្នាំ និងអ្នកស្រី កែវ សារី អាយុ ៥៥ ឆ្នាំ ត្រូវបានតំណាងអយ្យការចោទប្រកាន់ពីបទ «សមគំនិតក្នុងអំពើឃាតកម្មគិតទុកជាមុន បាញ់សម្លាប់ រារាំងកិច្ចប្រតិបត្តិការរបស់សមត្ថកិច្ច និងរក្សាទុកអាវុធខុសច្បាប់»។
តែយ៉ាងណា លោក ថោង សារ៉ាត់ បាននិយាយបដិសេធជាភាសាខ្មែរតុងវៀតណាម បង្ហោះសារសំឡេងរបស់ខ្លួនតាមហ្វេសប៊ុក ជាបន្តបន្ទាប់កន្លងមក អះអាងថា លោកស្គាល់ពុំមានទំនាក់ទំនងរកស៊ីអ្វីជាមួយលោក ឧកញ៉ា អ៊ឹង ម៉េងជឺ ឡើយ ដូច្នេះវាគ្មានហេតុផលអ្វី ដែលលោកទៅសម្លាប់លោក ម៉េង ជឺ នោះទេ។ លោកបានចាត់ទុកការចោទប្រកាន់លើលោកថា ជា ការមួលបង្កាច់៕
Tag:
ថោង សារ៉ាត់
អ៊ឹង ម៉េងជឺ
© រក្សាសិទ្ធិដោយ thmeythmey.com