អន្តរជាតិ
លោក ត្រាំ៖ អាមេរិក គ្មានសិទ្ធិទៅបង្រៀនគេឯងឡើយ ![](https://image.thmeythmey.com/pictures/2016/07/21/trump-ze.jpg)
×![]()
បន្ទាប់ពីក្លាយជាបេក្ខជនប្រធានាធិបតីរបស់បក្សសាធារណរដ្ឋ លោក ដូណាល់ ត្រាំ បានបង្ហាញពីគោលជំហររបស់លោក ទាក់ទិននឹងទំនាក់ទំនងជាមួយសម្ព័ន្ធមិត្តរបស់ខ្លួន នៅពេលលោកជាប់ឆ្នោតជាប្រធានាធិបតី។ បេក្ខជនរូបនេះ ទំនងជាមិនដាក់សម្ពាធអ្វីលើសម្ព័ន្ធមិត្ត ដែលប្រកាន់របបផ្ដាច់ការ ឲ្យផ្លាស់ប្ដូរឥរិយាបថអ្វីឡើយ ហើយលោកនឹងផ្ដោតលើការដោះស្រាយបញ្ហាកើតឡើងនៅអាមេរិកច្រើនជាងបញ្ហាខាងក្រៅស្រុក។
នៅក្នុងកិច្ចសម្ភាសន៍មួយ បេក្ខជនប្រធានាធិបតី លោក ដូណាល់ ត្រាំ បានលើកឡើងពីបញ្ហាជាច្រើន ដោយរាប់ទាំងបញ្ហាក្នុងស្រុក និងទំនាក់ទំនងជាមួយសម្ព័ន្ធមិត្តរបស់ខ្លួន ដែលរួមទាំងណាតូផងដែរ។ លោក ត្រាំ បាននិយាយនៅថ្ងៃទី២០ ខែកក្កដា ថា ប្រសិនបើលោកជាប់ឆ្នោតជាប្រធានាធិបតី លោកនឹងមិនដាក់សម្ពាធលើតួកគី ឬសម្ព័ន្ធមិត្តកាន់របបផ្ដាច់ការ ដែលរំលោភបំពានប្រជាជននោះឡើយ។ លោកបន្តថា អាមេរិក ត្រូវដោះស្រាយបញ្ហាខ្លួនឯងសិន មុននឹងទៅផ្លាស់ប្ដូរឥរិយាបថអ្នកដទៃ។
ក្នុងការសន្ទនានៅសណ្ឋាគារ បេក្ខជនប្រធានាធិបតីរូបនេះអះអាងថា លោកគិតថា អាមេរិកមិនមានសិទ្ធិអ្វីទៅបង្រៀនគេឯងនោះទេ។ ដោយលើកឡើងពីអ្វីដែលកំពុងកើតឡើងនៅអាមេរិក លោក ត្រាំ លើកជាសំណួរថា៖ «តើឲ្យទៅបង្រៀនគេយ៉ាងម៉េច នៅពេលប្រជាជន កំពុងបាញ់សម្លាប់គ្នាយ៉ាងនេះ?» នេះបើយោងតាមការផ្សាយរបស់សារព័ត៌មាន The New York Times។
ជាមួយគ្នានោះ សេដ្ឋីអចលនទ្រព្យរូបនេះ ក៏ប្រាប់ឲ្យប្រទេសផ្សេងទៀត ត្រូវរៀនសម្របខ្លួនតាមលោក។ លោកបកស្រាយថា លោកនៅតែបន្តកិច្ចព្រមព្រៀងដែលមានស្រាប់ ប៉ុន្តែសម្ព័ន្ធមិត្តទាំងអស់ ត្រូវបញ្ឈប់កេងចំណេញលើចិត្តទូលាយរបស់អាមេរិក ដែលឥឡូវនេះ មិនមានទៀតទេ។ លើសពីនេះ លោកបញ្ជាក់ច្បាស់ថា លោកនឹងលុបចោលកិច្ចព្រមព្រៀងណា ដែលលោកយល់ថា មិនអំណោយផល ក៏ដូចជាបង្ខំឲ្យសមាជិកណាតូ ជួយរ៉ាប់រងថ្លៃការពារ ដែលអាមេរិកធ្លាប់ចំណាយកន្លងមក។
ទាក់ទងនឹងទំនាក់ទំនងជាមូយសម្ព័ន្ធយោធាណាតូដែរ លោក ដូណាល់ ត្រាំ អះអាងថា លោក នឹងជួយប្រទេសជាសមាជិកណាតូ ទាំង២៨ ប្រសិនមានការវាយប្រហារពីរុស្សី។ ប៉ុន្តែ លោកបានដាក់លក្ខខណ្ឌថា អាមេរិកនឹងពិនិត្យជាមុនសិន ថាប្រទេសទាំងនោះ បានបំពេញកាត្វកិច្ចរបស់ខ្លួនដល់អាមេរិកឬទេ មុននឹងចេញទៅជួយ។ លោកសង្កត់ធ្ងន់ថា ប្រសិនបើពួកគេបានបំពេញកាត្វកិច្ចរបស់ពួកគេហើយ ចម្លើយគឺអាមេរិកនឹងជួយ។
លើសពីនេះ បេក្ខជនប្រធានាធិបតីបក្សសាធារណរដ្ឋនេះ បញ្ជាក់ទៀតថា លោកនឹងនយោបាយ «America First» គឺសំដៅគិតដល់ផលប្រយោជន៍អាមេរិកមុនគេ។ លោកបានព្រមានលុបចោលកិច្ចព្រមព្រៀងពាណិជ្ជកម្មសេរីអាមេរិកខាងជើង ជាមួយនឹងកាណាដា និងម៉ិកស៊ិក ប្រសិនបើលោកមិនទទួលលក្ខខណ្ឌល្អប្រសើរទេនោះ៕
Tag:
អាមេរិក
Donald Trump
© រក្សាសិទ្ធិដោយ thmeythmey.com