ទីក្រុងឡុងដ៍ របស់អង់គ្លេស ជាប់ចំណាត់ថ្នាក់ទីមួយក្នុងនាមជាទីក្រុងដែលពោរពេញទៅដោយឱកាស «World City of Opportunity» ជាលើកទីពីរ។ នេះបើយោងតាមលទ្ធផលនៃការសិក្សាប្រចាំឆ្នាំរបស់ PricewaterhouseCooper (PwC) ដែលក្រុមហ៊ុនសេវាកម្មវិជ្ជាជីវៈដ៏ធំបំផុតលើពិភពលោក។
«World City of Opportunity» ត្រូវបានចាត់ថ្នាក់ដោយផ្តោតលើទីតាំងនៃឱកាសជំនាញ ពាណិជ្ជកម្ម និងវប្បធម៌។ ក្រុងឡុងដ៍ មានចំណាត់ថ្នាក់នាំមុខ សិង្ហបុរី តូរ៉ុនតូ ប៉ារីស និងអាំស្ទែរដាម។ ទោះបីជាយ៉ាងណាក៏ដោយ ការព្យាយាមចាកចេញពីសហភាពអឺរ៉ុប (Brexit) នឹងជះឥទ្ធិពលអវិជ្ជមានលើចំណាត់ថ្នាក់របស់ក្រុងឡុងដ៍ សម្រាប់ការសិក្សាឆ្នាំបន្តបន្ទាប់ទៀត។
ការសិក្សាបានផ្តោតលើចំណុចសំខាន់ក្នុងទីក្រុង ដូចជា ធនធានបញ្ញា និងការច្នៃប្រឌិត, បច្ចេកវិទ្យា, ផ្លូវចេញ-ចូលក្រុង, ការដឹកជញ្ជូន និងហេដ្ឋារចនាសម្ព័ន្ធ, សុខភាព សុវត្ថិភាព និងសន្តិសុខ, នរន្តរភាព ធម្មជាតិ និងបរិស្ថាន, ប្រជាសាស្ត្រ និងការរស់នៅ, ឥទ្ធិពលសេដ្ឋកិច្ច, ភាពងាយស្រួលក្នុងការធ្វើជំនួញ និងការចាយវាយ។
ក្នុងចំណោមក្រុងទាំង៣០ដែលត្រូវបានសិក្សា ក្រុងឡុងដ៍នាំមុខគេស្ទើរគ្រប់ចំណុច ដោយទទួលបានពិន្ទុរួម ១៤៦៦ ខណៈសិង្ហបុរី បាន១៣៧៧ពិន្ទុ ស្ថិតក្នុងចំណាត់ថ្នាក់លេខ២។ ក្រុងដែលស្ថិតនៅចំណាត់ថ្នាក់ខ្ពស់ផ្សេងទៀតរួមមាន តូរ៉ុនតូ, ប៉ារីស, អាំស្ទែរដាម, ញូវយ៉ក, ស្កុតហូម, សាន់ហ្វ្រាន់ស៊ីសស្កូ, ហុងកុង និង ស៊ីដនី។
ក្រុងដែលមានចំណាត់ថ្នាក់មធ្យម មាន សេអ៊ូល, ប៊ែរឡាំង, ឈីកាហ្កោ, ឡូសអែនជឺលែស, តូក្យូ, ម៉ាឌ្រីត, ឌូបៃ, មីឡែន, ប៉េកាំង និងគួឡាឡាំពួរ។ ចំណែកក្រុងដែលមានចំណាត់ថ្នាក់ទាបក្នុងចំណោមក្រុមទាំង៣០មាន សៀងហៃ, មូស្គូ, ម៉ិកស៊ីកូ ស៊ីធី, ចូហានណែសប៊ើក, សៅប៉ូឡូ, បូហ្គោតា, រីយ៉ូ ដឺហ្សាណេរ៉ូ, ហ្សាការតា, ម៉ុមបៃ និងឡាហ្គោស៕