អន្តរជាតិ
លោក ប្រាយុទ្ធ ប្រើពេល២០ឆ្នាំបោសសម្អាតអំពើពុករលួយឲ្យអស់ពីថៃ ![](https://image.thmeythmey.com/pictures/2016/09/12/prayuth.jpg)
×![]()
នៅឆ្នាំ២០៣៦ ប្រទេសថៃ នឹងលែងមានអំពើពុករលួយទៀតហើយ។ នេះគឺជាគោលដៅរបស់នាយករដ្ឋមន្ត្រីថៃ លោកឧត្តមសេនីយ៍ ប្រាយុទ្ធ ចន្ទអូចា ក្នុងការបោសសម្អាតអំពើពុករលួយឲ្យអស់ពីសង្គមថៃ ខណៈដែលកម្រិតអំពើពុករលួយនៅប្រទេសនេះ ហាក់មានកម្រិតខ្ពស់នៅឡើយ បើប្រៀបធៀបនឹងប្រទេសដទៃទៀត។
នាយករដ្ឋមន្ត្រីថៃ លោក ប្រាយុទ្ធ ចន្ទអូចា នៅថ្ងៃទី១១ ខែកញ្ញា និយាយថា ប្រទេសថៃ នឹងអស់អំពើពុករលួយនៅរយៈពេល២០ឆ្នាំខាងមុខ។ ជាមួយនឹងការដាក់គោលដៅនេះ រដ្ឋាភិបាលថៃ ក៏ចេញជាគោលនយោបាយជាច្រើន ដើម្បីលុបបំបាត់អំពើពុករលួយ ដោយរួមទាំងការបោសសម្អាត និងការអប់រំប្រជាជនពីផលវិបាកនៃអំពើពុករលួយផងដែរ។
ថ្លែងទៅកាន់អ្នកចូលរួមក្នងថ្ងៃប្រឆាំងអំពើពុករលួយ នាយករដ្ឋមន្ត្រីថៃរូបនេះបញ្ជាក់ថា រដ្ឋាភិបាលរបស់លោក នឹងដាក់ចេញផែនការយុទ្ធសាស្ត្ររយៈពេលវែង ដើម្បីបំបាត់ឬសគល់របស់អំពើពុករលួយ។ ផែនការទាំងនោះនឹងផ្ដោតលើទិសដៅជាច្រើន រាប់ទាំងការបង្កើនការយល់ដឹងក្នុងចំណោមសិស្សនិស្សិត ក៏ដូចជាការបង្កើនវិធីសាស្ត្រក្នុងការបំបាត់ និងការដាក់ពិន័យអ្នកប្រព្រឹត្តផងដែរ។
«ជនពុករលួយ ត្រូវតែកម្ចាត់ចេញឲ្យអស់ពីថៃ។ ហើយយើងមិនត្រូវ ធ្វើខ្លួនជាជនរងគ្រោះនៅថ្ងៃអនាគតទៀតឡើយ។» នេះជាការលើកឡើងរបស់មេដឹកនាំយោធាថៃ ទៅកាន់ពិធីជួបជុំនៅឯ Sanam Luang ដែលផ្សាយដោយកាសែតបាងកកប៉ុស្តិ៍។
ចំណែកអង្គការប្រឆាំងអំពើពុករលួយថៃ (ACT) ក៏បានអំពាវនាវឲ្យពលរដ្ឋថៃ ចូលរួមឲ្យសកម្មក្នុងការបោសសម្អាតអំពើពុករលួយឲ្យអស់ពីថៃ។ ប្រធានអង្គការនេះ លោក Pramon Suthiwong និយាយថា ប្រជាជនទាំងអស់ ត្រូវតែចូលដៃគ្នាដើម្បីប្រយុទ្ធប្រឆាំងអំពើពុករលួយ ដែលស៊ីរូងសង្គមថៃ។
លោក Pramon បន្តថា យើងកំពុងធ្វើយុទ្ធនាការដើម្បីបង្កើនការយល់ដឹង។ យើងត្រូវតែរក្សាកិត្តិយស និងកាត្វកិច្ចរបស់យើង និងមិនត្រូវឱនក្បាលដាក់ទឹកប្រាក់ ដែលទិញសេចក្ដីថ្លៃថ្នូររបស់យើងឡើយ។
បើតាមសន្ទស្សន៍អំពើពុករលួយរបស់អង្គការតម្លាភាពអន្តរជាតិសម្រាប់ឆ្នាំ២០១៥ ប្រទេសថៃមានចំណាត់ទី៧៦ ក្នុងចំណោមប្រទេសទាំងអស់១៦៨។ និយាយពីតំបន់អាស៊ាន ប្រទេសថៃ មានចំណាត់នៅក្រោមប្រទេសពីរ គឺសិង្ហបុរី និងម៉ាឡេស៊ី តែមានចំណាត់ថ្នាក់លើប្រទេសសមាជិកដទៃទៀត ខណៈដែលព្រុយណេ មិនមានទិន្នន័យពាក់ព័ន្ធអំពើពុករលួយឡើយ៕
© រក្សាសិទ្ធិដោយ thmeythmey.com