ការបណ្តេញកងកម្លាំងអាមេរិកពីហ្វីលីពីន៖ ប្រមុខរដ្ឋអ្នកវាយ ប្រមុខការទូតអ្នកអង្អែល

អន្តរជាតិ

នយោបាយអន្តរជាតិ

ការបណ្តេញកងកម្លាំងអាមេរិកពីហ្វីលីពីន៖ ប្រមុខរដ្ឋអ្នកវាយ ប្រមុខការទូតអ្នកអង្អែល

13, Sep 2016 , 5:59 pm

រូបភាព

ដោយ:

ក្រៅពីការរិះគន់ និងជេរប្រមាថរដ្ឋាភិបាលក្រុងវ៉ាស៊ីនតោន ប្រធានាធិបតីហ្វីលីពីន លោក រ៉ូឌ្រីហ្គូ ឌើទើតេ (Rodrigo Duterte) ចុងក្រោយនេះ បានប្រកាសចង់ឲ្យកងកម្លាំងពិសេសអាមេរិកដែលឈរជើងនៅភាគខាងត្បូងនៃប្រទេសហ្វីលីពីនដកចេញពីតំបន់គ្រប់គ្រងរបស់ខ្លួន។ តែភ្លាមៗនៃសេចក្តីថ្លែងការណ៍នេះ ប្រមុខការទូតហ្វីលីពីន ក៏បានចេញសេចក្តីថ្លែងការណ៍មួយដើម្បីសម្រាលទម្ងន់នៃសេចក្តីថ្លែងការណ៍លោកប្រធានាធិបតី ដោយបញ្ជាក់ថាទំនាក់ទំនងហ្វីលីពីនអាមេរិកនៅតែធម្មតាដដែល។

« ខ្ញុំ មិនចង់បែកបាក់ជាមួយនឹងអាមេរិកនោះទេ ក៏ប៉ុន្តែពួកគេ (កងកម្លាំង) ត្រូវតែទៅ។ ពួកគេត្រូវតែទៅ។ មានច្រើនណាស់ពួកក្រុមស្បែកស នៅក្នុងខេត្តមិនដាណាវ !»។ នេះគឺជាសេចក្តីថ្លែងការណ៍របស់លោកប្រធានាធិបតី Rodrigo Duterte នាឱកាសនៃការតែងតាំងមន្ត្រីជាន់ខ្ពស់នៅវិមានប្រធានាធិបតី Malacañang នៅថ្ងៃទី១២ ខែកញ្ញាម្សិលមិញ ដែលប្រតិកម្មទៅនឹងកងកម្លាំងពិសេសអាមេរិក ដែលបានបង្កឲ្យមានបញ្ហាជាមួយនឹងក្រុមឧទ្ទាម។

យ៉ាងណាក៏ដោយ មិនបានមួយថ្ងៃនៃការព្រមានរបស់លោកប្រធានាធិបតីរូបនេះស្រួលបួលផង រដ្ឋមន្ត្រីការបរទេសហ្វីលីពីន លោក Perfecto Yasay បានថ្លែងការណ៍បញ្ជាក់ថា ហ្វីលីពីននៅតែគោរព និងអនុវត្តកាតព្វកិច្ចជាមួយនឹងអាមេរិកដដែល។ ប្រមុខការទូតរូបនោះ សង្កត់ធ្ងន់ថា សេចក្តីថ្លែការណ៍របស់លោកប្រធានាធិបតី មិនមែនជាសញ្ញានៃការប្រែប្រួលគោលនយោបាយការបរទេសរវាងភាគីទាំងពីរឡើយ ដោយលោកបញ្ជាក់ពីបំណងរបស់លោកប្រធានាធិបតី គ្រាន់តែមិនចង់ឲ្យពលរដ្ឋអាមេរិក ក្លាយជាគោលដៅសម្រាប់ការចាប់ជំរិតរបស់ក្រុមឧទ្ទាមនោះទេ។

ក្នុងថ្ងៃដដែលនៃការចេញសេចក្តីថ្លែងការណ៍របស់ប្រមុខការទូត ខាងយោធាហ្វីលីពីន ក៏ចេញសេចក្តីថ្លែងការណ៍បញ្ជាក់ពីការមិនប្រែប្រួលរវាងកងទ័ពហ្វីលីពីន និងអាមេរិកស្រដៀងគ្នាដែរ។ អ្នកនាំពាក្យកងទ័ពហ្វីលីពីនលោក Restituto Padilla ថ្លែងថា ការប្រកាសនោះ នឹងសុពលភាពតែទៅលើកងទ័ពអាមេរិកមួយចំនួនតូចដែលកំពុងផ្តល់សេវាហ្វឹកហ្វឺនដល់យោធាហ្វីលីពីននៅក្រុង Zamaboanga ប៉ុណ្ណោះ ។ អ្នកនាំពាក្យរូបនោះសង្កត់ធ្ងន់ថា «យើង បញ្ជាក់ទៅកាន់ប្រជាជន និងសម្ព័ន្ធមិត្តរបស់យើងថា ទំនាក់ទំនងការពារជាតិហ្វីលីពីន-អាមេរិក នៅតែស្អិតល្មួតដដែល»។

យោងតាមសារព័ត៌មានហ្វីលីពីន Rappler កងកម្លាំងពិសេសហ្វីលីពីន-អាមេរិក បានចាប់ផ្តើមបង្កើត និងប្រតិបត្តិការរួមគ្នាដើម្បីប្រឆាំងនឹងភេរវកម្មហ្វីលីពីននៅឆ្នាំ២០០២។ តែប្រតិបត្តិការប្រយុទ្ធប្រឆាំងនៃកងកម្លាំងពិសេសនេះ ត្រូវបានផ្អាកនៅឆ្នាំ២០១៥ ។ ក្រៅពីប្រតិបត្តិការនេះ សម្ព័ន្ធមិត្តដែលចងភ្ជាប់គ្នាតាមកិច្ចព្រមព្រៀងទាំងពីរនេះ ក៏មានកិច្ចព្រមព្រៀងប្រតិបត្តិការការពារជាតិជាមួយគ្នាដែលកំពុងតែចូលជាធរមាន ហើយជាពិសេសនោះ រដ្ឋបាលហ្វីលីពីនដែលទើបផុតអាណត្តិ ក៏ទើបតែផ្តល់ទីតាំងប្រាំកន្លែងសម្រាប់អាមេរិកដើម្បីដាក់មូលដ្ឋានយោធាទ័ពអាកាសនៅហ្វីលីពីនទៀតផង។

នេះ ចង់មានន័យថា សេចក្តីថ្លែងការណ៍របស់លោកប្រធានាធិបតីហ្វីលីពីន គឺគ្រាន់តែជាអារម្មណ៍ឆេវឆាវមួយពេល។ មួយវិញទៀតនោះ ឥរិយាបថនេះ ក៏គ្រាន់តែចង់បង្ហាញខ្លួនថា ហ្វីលីពីន មានគោលនយោបាយការបរទេសឯករាជ្យមិនពឹងផ្អែករដ្ឋណាមួយ។ តែតាមពិតទៅ ទំនាក់ទំនងរវាងប្រទេសទាំងពីរ ជាពិសេសលើផ្នែកយោធា បានចងភ្ជាប់នឹងគ្នាយ៉ាងស៊ីជម្រៅ៕