សេដ្ឋកិច្ចអន្តរជាតិ
អន្តរជាតិ
អ្នកមានជាងគេនៅចិនថា សន្ទុះនៃវិស័យអចលនទ្រព្យប៉ោងឡើងខ្លាំងគួរឲ្យបារម្ភ ![](https://image.thmeythmey.com/pictures/2016/10/05/china-skyline-90642582.jpg)
×![]()
ក្នុងឆ្នាំ២០១៥ មហាយក្សចិន បានរងគ្រោះខ្លាំងដោយវិបត្តិផ្សារហ៊ុន បណ្ដាលមកពីការកើនឡើងតម្លៃហ៊ុនខ្លាំង។ វិបត្តិនេះ ប៉ះពាល់ដល់អ្នកវិនិយោគរាប់លាននាក់ ដែលបានរំពឹងថា អាជ្ញាធរចិននឹងមិនបណ្ដោយឲ្យតម្លៃផ្សារហ៊ុនធ្លាក់ចុះនោះ។ នៅពេលនេះ បន្ទាប់ពីស្ថានការណ៍បានធូរស្រាលបន្តិចនោះ មេដឹកនាំចិនទំនងជាត្រូវឈឺក្បាលម្ដងទៀត តែលើកនេះបញ្ហាអាចនឹងលេចចេញពីវិស័យអចលនទ្រព្យវិញម្ដង។
មហាសេដ្ឋីមានជាងគេនៅចិន លោក វ៉ាង ជានលីន (Wang Jianlin) បានចេញមកព្រមានពីវិបត្តិដែលអាចកើតចេញពីវិស័យអចលនទ្រព្យ ដែលកំពុងតែប៉ោងខ្លាំង ហើយអាចឈានដល់ដំណាក់កាលមិនអាចគ្រប់គ្រងបានទៀតផង។ លោក វ៉ាង ជានលីន ដែលរកស៊ីមានបានដោយសារវិស័យអចលនទ្រព្យនេះ អះអាងថា នេះជាពពុះសាប៊ូធំជាងគេបំផុត (សំដៅលើការកើនឡើងមួយឆាវនៃតម្លៃអចលនទ្រព្យ) ក្នុងប្រវត្តិសាស្ត្រ។
![](https://image.thmeythmey.com/pictures/2016/10/05/chinas_richest_man.jpg)
លោក Wang Jianlin មហាសេដ្ឋីមានជាងគេនៅចិន (រូបភាព Xinhua)
ក្នុងបទសម្ភាសន៍ជាមួយ CNNMoney កាលពីថ្ងៃទី២៩ ខែកញ្ញាកន្លងម អ្នកមានជាងគេនៅចិនរូបនេះនិយាយថា បញ្ហាធំនោះ គឺតម្លៃអចលនទ្រព្យនៅតែកើនឡើងនៅទីក្រុងធំៗដូចជាសៀងហៃជាដើម ខណៈដែលនៅតាមទីក្រុងតូចៗដែលមានអចលនទ្រព្យច្រើន បែរជាធ្លាក់ចុះតម្លៃទៅវិញ។ លោកបន្តថា៖«យើងមិនឃើញមានដំណោះស្រាយល្អឡើយ បើទោះជារដ្ឋាភិបាលដាក់ចេញវិធានការគ្រប់យ៉ាងក៏ដោយ តែបញ្ហានៅតែមិនអាចដោះស្រាយបាននៅឡើយដែរ។»
សន្ទុះកើនឡើងក្នុងវិស័យអចលនទ្រព្យ គឺជាបញ្ហាគួរឲ្យបារម្ភនៅចិន ដ្បិតសេដ្ឋកិច្ចប្រទេសនេះ មានកំណើនយឺត ស្របពេលដែលកម្រិតនៃបំណុលកើនឡើងយ៉ាងឆាប់រហ័ស។ ជាមួយគ្នានេះ ទឹកប្រាក់យ៉ាងច្រើន បែរជាប្រមូលផ្ដុំនៅទីផ្សារភាគហ៊ុនទៅវិញ។ បើតាមរបាយការណ៍របស់ Capital Economics ប្រាក់កម្ចីដោយផ្ទាល់មានដល់ទៅ២៤ ទ្រីលានយ័ន ស្មើនឹង៣.៦ទ្រីលានដុល្លារ នៅត្រឹមដំណាច់ខែមិថុនា។
សេដ្ឋីអចលនទ្រព្យរូបនេះនិយាយទៀតថា៖«អ្វីជាបញ្ហា គឺសេដ្ឋកិច្ចមិនបានធ្លាក់ចុះខ្លាំងឡើយ។ ក្នុងករណីនេះ ប្រសិនបើយើងដកយកប្រាក់កម្ចីទាំងនោះឆាប់ពេក សេដ្ឋកិច្ចនឹងកាន់តែអាក្រក់មិនខាន។ ហើយយើងត្រូវរង់ចាំដល់ពេលដែលសេដ្ឋកិច្ចត្រឡប់មករកស្ថានភាពដើមវិញ មុននឹងកាត់បន្ថយបំណុល»។ ប៉ុន្តែ លោក វ៉ាង ជានលីន ក៏មិនបានបង្ហាញការព្រួយបារម្ភលើការធ្លាក់ចុះនៃកំណើនសេដ្ឋកិច្ចនោះឡើយ។
តាមពិតទៅ មហាសេដ្ឋីប្រចាំប្រទេសចិនរូបនេះ ក៏ធា្លប់ព្រមានទុកមុនពីបញ្ហានេះជាយូរមកហើយដែរ។ ក្រុមហ៊ុន Dalian Wanda Group ដែលវិនិយោគលើអចលនទ្រព្យនោះ ក៏បានកាត់បន្ថយការរកស៊ីលើជំនួញនេះដែរ។ ក្រុមហ៊ុនយក្សនេះ បានបោះទុនរបស់ខ្លួនយ៉ាងច្រើនទៅលើវិស័យកំសាន្ត កីឡា និងទេសចរណ៍ ដែលកំពុងមានសក្តានុពលខ្លាំង។
នាពេលថ្មីៗនេះ លោក វ៉ាង ជានលីន បានទិញក្រុមហ៊ុនផលិតភាពយន្តល្បីៗរបស់ Hollywood ជាច្រើនមកដាក់ក្រោមចំណុះក្រុមហ៊ុនរបស់លោក ដែលបង្កើតទៅជាបណ្ដាញក្រុមហ៊ុនភាពយន្តដ៏ធំលើពិភពលោក។ មិនតែប៉ុណ្ណោះ លោក វ៉ាង ក៏បានងាកទៅវិនិយោគលើសួនកម្សាន្តធំៗលើទូទាំងប្រទេសចិនដែរ។
ចុងក្រោយនោះ មហាសេដ្ឋីមានប្រាក់ច្រើនជាងគេរបស់មហាយក្សចិន បញ្ជាក់ថា៖«យើងកំពុងរង់ចាំឱកាស។ ឱកាសអាចមកដល់ក្នុងពេលពីរ ឬបីឆ្នាំខាងមុខ ឬក៏អាចយូរជាងនេះ ប៉ុន្តែយើងត្រូវតែអត់ធ្មត់»៕
© រក្សាសិទ្ធិដោយ thmeythmey.com