អន្តរជាតិ
របបសឹកថៃ បញ្ជាឲ្យកងកម្លាំងរឹតបន្តឹងសន្តិសុខខ្លាំង ក្រោយមានការគំរាមបំផ្ទុះគ្រាប់បែកអត្តឃាតនៅចុងខែនេះ ![](https://image.thmeythmey.com/pictures/2016/10/12/prayuth.jpg)
×![]()
ក្រុមប្រឹក្សាជាតិដើម្បីសន្តិភាព និងសណ្តាប់ធ្នាប់ថៃ (NCPO) បានដាក់បញ្ជាយ៉ាងតឹងរឹងទៅលើសន្តិសុខដើម្បីទប់ស្កាត់ និងឆ្លើយតបទៅនឹងការគំរាមកំហែងបំផ្ទុះគ្រាប់បែកអត្តឃាតនៅក្នុងក្រុងបាងកកជាថ្មីពីក្រុមមិនស្គាល់មុខ។ ជាមួយគ្នានេះ រដ្ឋាភិបាលរបបសឹកថៃ ក៏បានអំពាវនាវឲ្យប្រជាជនកុំមានភាពភ័យខ្លាច និងជឿជាក់លើការបំពេញការងាររបស់ប៉ូលិស។
អ្នកនាំពាក្យក្រុមប្រឹក្សាជាតិដើម្បីសន្តិភាព និងសណ្តាប់ធ្នាប់ថៃ លោក Piyapong Klinphan នៅថ្ងៃទី១១ ខែតុលាម្សិលមិញនេះ បានអះអាងថា ប្រមុខរដ្ឋាភិបាល បានដាក់បញ្ជាដល់កងកម្លាំងឲ្យធ្វើការឃ្លាំមើលរាល់សកម្មភាពសង្ស័យនានា, កំណត់កន្លែងត្រួតពិនិយ្យឲ្យបានច្រើន និងប្រតិបត្តិការរុករកផ្សេងៗដើម្បីទប់ស្កាត់ការរំខានសាធារណៈ។ នេះបើយោងតាមការចុះផ្សាយរបស់សារព័ត៌មានបាងកកប៉ុស្តិ៍នៅថ្ងៃទី១២ ខែតុលានេះ។
អ្នកនាំពាក្យរូបនោះ បានបន្ថែមថា ខែតុលា គឺជាខែមួយដែលធ្លាប់មានព្រឹត្តិការណ៍បញ្ហានយោបាយសំខាន់ ហើយ រដ្ឋាភិបាលត្រូវតែធានាពីសុវត្ថិភាពសាធារណៈ និងត្រៀមខ្លួនសម្រាប់ស្ថានភាពផ្សេងៗដែលអាចកើតឡើងគ្រប់ពេល ដែលរាប់បញ្ចូលទាំងការគំរាមកំហែងវាយប្រហារនៅចុងខែតុលាការនេះផងដែរ។ តែលោកអ្នកនាំពាក្យរូបនោះ មិនបានពន្យល់ថាតើមានព្រឹត្តិការណ៍នយោបាយអ្វីសំខាន់ធ្លាប់កើតនៅក្នុងខែតុលានេះនោះទេ។
សេចក្តីថ្លែងការណ៍របស់ក្រុមប្រឹក្សាជាតិដើម្បីសន្តិភាព និងសណ្តាប់ធ្នាប់ ត្រូវបានធ្វើឡើងស្របជាមួយនឹងសេចក្តីអំពាវនាវរបស់លោកនាយករដ្ឋមន្ត្រីថៃប្រាយុទ្ធ ចន្ទ អូចា ជុំវិញនៃការរឹតបន្តឹងសន្តិសុខជាតិផងដែរ។ លោក ប្រាយុទ្ធ ចន្ទ អូចា នៅថ្ងៃម្សិលមិញនេះ ក៏បានថ្លែងការណ៍អំពាវនាវឲ្យប្រជាជនមានការអត់ធ្មត់ បន្ទាប់ពីប៉ូលិស បានព្រមាន និងឲ្យដំណឹងពីគម្រោងបំផ្ទុះគ្រាប់បែកដោយក្រុមមិនស្គាល់អត្តសញ្ញាណនៅក្នុងរាជធានីបាងកកដែលរាប់បញ្ចូលទាំងព្រលានយន្តហោះផងដែរនោះ។
«សូមទុកកិច្ចការឲ្យមន្ត្រីប៉ូលិសជាអ្នកធ្វើ ហើយ សូមផ្តល់ការជឿជាក់ទៅឲ្យពួកគេ»។ នេះគឹជាសេចក្តីថ្លែងការណ៍របស់លោកនាយករដ្ឋមន្ត្រីថៃ ប្រាយុទ្ធ ចន្ទ អូចា ក្រោយពីប៉ូលិសថៃ បានព្រមាន និងបង្ហាញពីកំណត់ហេតុមួយថា មានក្រុមមិនស្គាល់មុខ បាននិងកំពុងរៀបផែនការ បំផ្ទុះគ្រាប់បែកនៅក្នុងរាជធានីបាងកកនោះ។
លោកនាយករដ្ឋមន្ត្រី បានបញ្ជាក់ដែរថា ផែនការបំផ្ទុះគ្រាប់បែក គឺគ្រាន់តែជាការព្រមានប៉ុណ្ណោះ ហើយ លោក អំពាវនាវឲ្យប្រជាជនកុំមានភាពភ័យខ្លាច ដោយលោក បន្ថែម ថា ប៉ូលិស ក៏កំពុងតែបើកការស៊ើបអង្កេតផងដែរនោះ។ នេះបើយោងតាមសារព័ត៌មាន The Strait Times។
បើតាមប្រភពព័ត៌មានដដែលនោះ នៅថ្ងៃទី១០ ខែតុលា ប៉ូលិសថៃ បានបង្ហាញអ្នកសារព័ត៌មានពីកំណត់ហេតុមួយនៃផែនការបំផ្ទុះគ្រាប់បែកនៅក្នុងក្រុងបាងកក។ កំណត់ហេតុនោះ បាននិយាយថា មានក្រុមមិនស្គាល់អត្តសញ្ញាណមួយក្រុម បានរៀបចំផែនការបំផ្ទុះគ្រាប់បែកនៅក្នុងរាជធានីបាងកក នៅក្នុងអំឡុងថ្ងៃទី២៥ដល់៣០ ខែតុលា ដែលបញ្ចូលទាំងព្រលានយន្តហោះផងដែរ៕
Tag:
សន្តិសុខ
ថៃ
អាស៊ាន
© រក្សាសិទ្ធិដោយ thmeythmey.com