អន្តរជាតិ
លោក ពូទីន ថាលោក ត្រាំ តំណាងឲ្យប្រយោជន៍ប្រជាជនដែលស្អប់សង្គមអភិជន ![](https://image.thmeythmey.com/pictures/2016/10/28/1putin.jpg)
×![]()
«លោក ដូណាល់ ត្រាំ ជាបេក្ខជនម្នាក់ដែលតំណាងឲ្យប្រយោជន៍ប្រជាជនអាមេរិកដែលធុញទ្រាន់នឹងក្រុមអភិជនដែលក្តោបក្តាប់អំណាចរាប់ទសវត្សរ៍ ហើយលោកជាតំណាងឲ្យប្រជាជនទូទៅ»។ នេះជាពាក្យសម្តីកោតសរសើររបស់ប្រធានាធិបតីរុស្ស៊ី វ្ល៉ាឌីមៀ ពូទីន ចំពោះលោក ដូណាល់ ត្រាំ ក្នុងវេទិកា Valdai club ដែលប្រារព្ធឡើងនៅក្នុងទីក្រុង Sochi ថ្ងៃ ២៧ តុលា។
ប្រធានាធិបតីរុស្ស៊ី វ្ល៉ាឌីមៀ ពូទីន បានឆ្លៀតឱកាសកោតសរសើរបេក្ខជនប្រធានាធិបតីបក្សសាធារណរដ្ឋលោក ដូណាល់ ត្រាំ ក្នុងការទាក់ទាញការគាំទ្រ ក្នុងពេលដែលលោកផ្តល់សុន្ទរកថានៅវេទិកា Valdai club នាទីក្រុង Sochi។
យោងតាមសារព័ត៌មានរុស្ស៊ី RT លោក វ្ល៉ាឌីមៀ ពូទីន ក៏យល់ឃើញថា លោក ដូណាល់ ត្រាំ ជាអ្នកនយោបាយដែលមានយុទ្ធសាស្ត្រពិសេសក្នុងការទាក់ទាញបេះដូងអ្នកគាំទ្រ ហើយមិនត្រឹមតែប៉ុណ្ណោះទេលោកជឿជាក់ថា លោក ដូណាល់ ត្រាំ ជាអ្នកនយោបាយម្នាក់ដែលតំណាងឲ្យផលប្រយោជន៍ប្រជាជនអាមេរិកទូទៅផង។
«លោក ដូណាល់ ត្រាំ ជ្រើសរើសវិធីសាស្ត្រមួយដែលឈោងចាប់បេះដូងអ្នកបោះឆ្នោត។ គាត់តំណាងឲ្យផលប្រយោជន៍សង្គមអាមេរិកនិងអ្នកដែលធុញទ្រាន់និងក្រុមអភិជនដែលកាន់អំណាចរាប់ទសវត្សរ៍មកហើយនោះ។ គាត់ជាអ្នកនយោបាយដែលតំណាងឲ្យមនុស្សទូទៅ ហើយលោកជាមនុស្សសាមញ្ញ»។
តាមពិតទៅលោក ដូណាល់ ត្រាំ ក៏បានលើកឡើងជាញឹកញយផងដែរថា លោកអាចធ្វើការងារជាមួយលោក ពូទីន បាន ហើយលោកក៏មានឆន្ទៈចង់សហការជាមួយរដ្ឋាភិបាលរុស្ស៊ីផងដែរ ក្នុងពេលដែលលោកក្លាយជាប្រធានាធិបតី។ មិនត្រឹមតែប៉ុណ្ណោះ កន្លងមកមក លោក ដូណាល់ ត្រាំ ធ្លាប់លើកឡើងថា លោកនឹងទទួលស្គាល់ទឹកដី Crimea ជាផ្នែកមួយរបស់រុស្ស៊ី ក្នុងពេលលោកជាប់ឆ្នោត ដោយលោកមិនអើពើចំពោះការរំលោភច្បាប់អន្តរជាតិរបស់រុស្ស៊ីឡើយ។
ដូច្នេះហើយ គេរំពឹងថាបើសិនជាលោក ដូណាល់ ត្រាំ ជាប់ឆ្នោតវិញនោះ ស្ថានភាពទំនាក់ទំនងរវាងអាមេរិកជាមួយរុស្ស៊ីប្រហែលជាប្រែប្រួលច្រើន ហើយមិនត្រឹមតែប៉ុណ្ណោះទេ មហាអំណាចទាំងពីរក៏ប្រហែលជានឹងអាចចាប់ដៃគ្នាដោះស្រាយបញ្ហាសាកលលោកផ្សេងទៀតជាច្រើនផងដែរ។
ផ្ទុយស្រឡះ បើសិនលោកស្រី ហ៊ីឡារី គ្លីនតុន ជាប់ឆ្នោតវិញ ទំនាក់ទំនងរវាងអាមេរិកនិងរុស្ស៊ី ប្រហែលជាអាក្រក់ជាពេលបច្ចុប្បន្នទៅទៀត។ លោក វ្ល៉ាឌីមៀ ពូទីន និងលោកស្រី ហ៊ីឡារី គ្លីនតុន ប្រៀបដូចជាសត្រូវស៊ីសាច់ហុតឈាមគ្នាដូច្នេះដែរ។ លោកស្រីបេក្ខជនប្រធានាធិបតីនេះ តែងទិតៀនមិនសំចៃមាត់ចំពោះលោកពូទីន និងគោលនយោបាយរុស្ស៊ី តាំងពីដើមមក។ ក្នុងឆ្នាំ ២០១២ លោកស្រី ហ៊ីឡារី គ្លីនតុន បានចោទប្រកាន់ថាលោក ពូទីន គេងបន្លំសន្លឹកឆ្នោតប្រធានាធិបតី ហើយដល់ឥឡូវនេះលោកស្រក៏បន្តចោទប្រកាន់រដ្ឋាភិបាលក្រេមឡាំងថា បានប្រព្រឹត្តបទឧក្រិដ្ឋសង្គ្រាមនៅក្រុង Aleppo ប្រទេសស៊ីរី ថែមទៀត៕
Tag:
ដូណាល់ ត្រាំ
វ្ល៉ាឌីមៀ ពូទីន
© រក្សាសិទ្ធិដោយ thmeythmey.com