អន្តរជាតិ
នាវាល្បាតចិន ចាកចេញពីតំបន់វិវាទជាមួយនឹងហ្វីលីពីន ក្រោយមេដឹកនាំទាំងពីរចរចាត្រូវគ្នា ![លោកប្រធានាធិបតីហ្វីលីពីន(ខាងឆ្វេង) ចាប់ដៃលោកប្រធានាធិបធិបតីចិន(ខាងស្តាំ) (រូបភាពដោយ៖ Xinhua)](https://image.thmeythmey.com/pictures/2016/10/29/22222.jpg)
លោកប្រធានាធិបតីហ្វីលីពីន(ខាងឆ្វេង) ចាប់ដៃលោកប្រធានាធិបធិបតីចិន(ខាងស្តាំ) (រូបភាពដោយ៖ Xinhua)
×![]()
រដ្ឋាភិបាលក្រុងម៉ានីល បានអះអាងថា នាវាល្បាតសមុទ្ររបស់ចិន បានចាកចេញពីតំបន់ជម្លោះថ្មប៉ប្រះទឹក Scarborough នៃសមុទ្រចិនខាងត្បូងអស់ហើយ។ អវត្តមាននៃនាវាល្បាតទាំងនោះ ត្រូវបានមើលឃើញថា កើតឡើងក្រោយមានការចរចាគ្នារវាងមេដឹកនាំកំពូលចិន និងហ្វីលីពីន នាពេលដែលប្រធានាធិបតីហ្វីលីពីនបំពេញទស្សនកិច្ចទៅកាន់ចិនកាលពីពេលថ្មីៗនេះ។
«អ្វីដែលខ្ញុំអាចនិយាយនៅពេលនេះ នោះគឺ យើងអង្កេតឃើញថា មិនមានក្រុមនាវាល្បាតរបស់ចិននៅក្នុងតំបន់ជម្លោះ Scarborough នៃសមុទ្រចិនខាងត្បូងទៀតឡើយ»។ នេះគឺជាសេចក្តីថ្លែងការណ៍របស់អ្នកនាំពាក្យប្រធានាធិបតីហ្វីលីពីន Ernesto Abella នាសន្និសីទសារព័ត៌នៅថ្ងៃទី២៨ ខែតុលាម្សិលមិញនេះ។ នេះបើយោងតាមការចុះផ្សាយរបស់សារព័ត៌មាន AFP។
សូមជម្រាបផងដែរថា តំបន់ថ្មប៉ប្រះទឹក Scarborough ត្រូវបានចិនចូលទៅកាន់កាប់ និងល្បាតជានិច្ចដោយមិនឲ្យអ្នកណាចូលទៅបានឡើយ ចាប់តាំងពីឆ្នាំ២០១២មក។ សូម្បីតែសកម្មភាពនេសាទតាមបែបប្រពៃណីក៏ចិនមិនអនុញ្ញាតឲ្យចូលទៅដែរ។ ការណ៍ដែលចិន ធ្វើបែបនេះ ក្រោយមានភាពតានតឹងជាមួយនឹងហ្វីលីពីននៅក្នុងឆ្នាំ២០១២ ដោយហ្វីលីពីន ទាមទារដាក់តំបន់វិវាទនេះស្ថិតក្រោយអធិបតេយ្យរបស់ខ្លួន ខណៈចិន ក៏ចាត់ទុកតំបន់នោះថាជាកម្មសិទ្ធិរបស់ខ្លួនផងដែរនោះ។
អ្វីគួរកត់សម្គាល់នោះ អវត្តមានរបស់ក្រុមនាវាល្បាតសមុទ្ររបស់ចិននៅក្នុងតំបន់វិវាទនោះ ក៏មិនមែនជារឿងចៃដន្យដែរ ពោលគឺ នោះ ក៏ព្រោះតែរដ្ឋបាលថ្មីរបស់លោកប្រធានាធិបតីហ្វីលីពីន រ៉ូឌ្រីហ្គូ ឌើទើតេ ដែលបានកាន់អំណាចចាប់ពីថ្ងៃទី៣០ខែមិថុនាមក បានបន្ទន់ឥរិយាបថទៅរកចិន។ ហើយអវត្តមានកងល្បាតរបស់ចិននេះដែរ ក៏អាចជាការផ្តល់លទ្ធភាពសម្រាប់ឲ្យអ្នកនេសាទហ្វីលីពីន អាចចូលទៅនេសាទតាមបែបប្រពៃណីនៅក្នុងតំបន់នោះឡើងវិញផងដែរ។
នេះ ក៏ជាលទ្ធផលផ្លែផ្កាមួយនៃដំណើរទស្សនកិច្ចរបស់លោកប្រធានាធិបតីហ្វីលីពីន រ៉ូឌ្រីហ្គូ ឌើទើតេ ទៅកាន់ចិន ដែលជាកន្លែងដែលលោក ចរចារកផលប្រយោជន៍នៃសមុទ្រចិនខាងត្បូងផងដែរ។ ប្រធានាធិបតី រ៉ូឌ្រីហ្គូ ឌើទើតេ បានជួបពិភាក្សាជាមួយនឹងលោកប្រធានាធិបតីស៊ី ជិនពីងក្នុងអំឡុងទស្សនកិច្ចទៅកាន់ក្រុងប៉េកាំងរយៈពេល៤ថ្ងៃនាពេលថ្មីៗនេះ ដោយភាគីទាំងពីរបានព្រមព្រៀងបន្តចរចាគ្នា តែមិនបានលម្អិតថាតើមានកិច្ចព្រមព្រៀងណាខ្លះ ត្រូវបានសម្រេចពាក់ព័ន្ធនឹងសមុទ្រចិនខាងត្បូងនោះទេ។
តែអ្វីដែលគេនៅចាំនោះ មុនពេលចាកចេញទៅកាន់ក្រុងប៉េកាំង លោកប្រធានាធិបតីហ្វីលីពីន ដែលមានរហ័សនាមថា ជា«អ្នកដាក់ទណ្ឌកម្ម» ក៏ធ្លាប់ឲ្យដឹងពីរបៀបវារៈរបស់លោកដែលពាក់ព័ន្ធនឹងបញ្ហាសមុទ្រចិនខាងត្បូងក្នុងដំណើរទស្សនកិច្ចនេះដែរ។ នាពេលនោះលោក Duterte បានបញ្ជាក់ដែរថា លោក នឹងស្នើឲ្យចិនអនុញ្ញាតឲ្យអ្នកនេសាទហ្វីលីពីនអាចបន្តសកម្មភាពនេសាទតាមបែបប្រពៃណីរបស់ពួកគេឡើងវិញនៅក្នុងនៅក្នុងតំបន់កោះ Scarborough៕
Tag:
ហ្វីលីពីន
ចិន
សមុទ្រចិនខាងត្បូង
© រក្សាសិទ្ធិដោយ thmeythmey.com