អន្តរជាតិ
អ្នកដាក់ទណ្ឌកម្មហ្វីលីពីន «Duterte» សន្យា «ឈប់ប្រើពាក្យអសុរោះ និងជេរប្រមាថទៀតហើយ» ![លោកប្រធានាធិបតីហ្វីលីពីន Rodrigo Duterte](https://image.thmeythmey.com/pictures/2016/10/29/rodrigo_duterte.jpg)
លោកប្រធានាធិបតីហ្វីលីពីន Rodrigo Duterte
×![]()
លោកប្រធានាធិបតីហ្វីលីពីន ដែលគេស្គាល់ថាមេដឹកនាំមាត់គ្មានគម្រប រ៉ូឌ្រីហ្គូ ឌើទើតេ បានសន្យាថា លោក នឹងឈប់ប្រើពាក្យជេរប្រមាថ និងអសុរោះផ្សេងៗទៀតហើយ។ ការសន្យានេះ ត្រូវបានលោក ពន្យល់ថា ក្រោយពីលោកទទួលបានសារពីព្រះ ថាបើលោក មិនបញ្ឈប់ឥរិយាបថបែបនេះទេ លោក អាចនឹងជួបរឿងអកុសល។
នាសន្និសីទកាសែតទាំងយប់ថ្ងៃទី២៧ ខែតុលាកន្លងទៅ លោកប្រធានាធិបតី រ៉ូឌ្រីហ្គូ ឌើទើតេ បានថ្លែងថា ខណៈពេលដែលលោកកំពុងតែសំឡឹងទៅមើលពពកនៅលើយន្តហោះក្នុងដំណើរមាតុភូមិនិវត្តក្រោយបញ្ចប់ទស្សនកិច្ចនៅជប៉ុន ហើយអ្នកអមដំណើរលោក កំពុងតែដេកលង់លក់នោះ លោក បានលឺសំឡេងនិយាយថា «ប្រសិនបើអ្នកមិនបញ្ឈប់ ការប្រើប្រាស់ពាក្យអសុរោះនោះទេ, ខ្ញុំ នឹងធ្វើឲ្យយន្តហោះនេះធា្លក់តែម្តង»។
លោកប្រធានាធិបតីរូបនោះ បន្តថា ពេលនោះ លោក ក៏បានឆ្លើយតបទៅនឹងសំឡេងនោះយ៉ាងដូច្នេះថា «អ្នកជានរណា? គឺព្រះជាម្ចាស់។ ខ្ញុំ សូមសន្យាទៅកាន់ព្រះជាម្ចាស់ថា ... នឹងមិនប្រើប្រាស់ពាក្យចម្លែកៗ អសុរោះ និងជេរប្រមាថទៀតឡើយ»។ លោក ក៏បានបញ្ជាក់បន្ថែមទៀតថា ប្រជាជន នឹងលឺតែពាក្យដែលត្រឹមត្រូវ ដោយលោកពន្យល់ថា នោះក៏ព្រោះតែការសន្យាជាមួយនឹងព្រះ ក៏ជាការសន្យាទៅកាន់ប្រជាជនហ្វីលីពីនដែរ។
សូមជម្រាបផងដែរថា លោក រ៉ូឌ្រីហ្គូ ឌើទើតេ បានឡើងកាន់អំណាចជាប្រធានាធិបតីហ្វីលីពីនជាផ្លូវការថ្ងៃទី៣០ ខែមិថុនា។ ទាំងមុន និងក្រោយនៃការក្លាយជាប្រធានាធិបតីហ្វីលីពីន លោកតែងតែប្រើពាក្យអសុរោះ និងជេរប្រមាថទៅនឹងអ្វី ឬក៏បុគ្គលណាមួយដែលធ្វើឲ្យលោក មិនសប្បាយចិត្ត និងផ្ទុយទៅនឹងអ្វីដែលលោកចង់បាន។ កន្លងមកទាំងស្ថាប័នកំពូលអង្គការសហប្រជាជាតិ សហភាពអឺរ៉ុប សម្តេច ប៉ាប ប្រធានាធិបតីអាមេរិកលោក បារ៉ាក់ អូបាម៉ា អគ្គលេខាធិការអង្គការសហប្រជាជាតិលោក បាន គីមូន ជាដើមនោះ សុទ្ធសឹងតែត្រូវបានរងការរិះគន់ និងជេរប្រមាថដោយលោកប្រធានាធិបតីហ្វីលីពីន រ៉ូឌ្រីហ្គូ ឌើទើតេទាំងអស់៕
Tag:
ហ្វីលីពីន
Rodrigo Duterte
© រក្សាសិទ្ធិដោយ thmeythmey.com