អន្តរជាតិ
ប្រធានាធិបតីវេណេស៊ុយអេឡាគំរាមចាប់សមាជិកបក្សប្រឆាំងដាក់គុក បើហ៊ានប្រឆាំងលោក ![លោកប្រធានាធិបតីវេណេស៊ុយអេឡា Nocolas Maduro](https://image.thmeythmey.com/pictures/2016/10/29/nocolas_maduro.jpg)
លោកប្រធានាធិបតីវេណេស៊ុយអេឡា Nocolas Maduro
×![]()
ប្រធានាធិបតីវេណេស៊ុយអេឡាលោក នីកូឡា ម៉ាឌុយរ៉ូ (Nocolas Maduro) បានព្រមានចាប់ខ្លួនរាល់សមាជិកបក្សប្រឆាំងដាក់គុក ប្រសិនជាពួកគេហ៊ានប្រើអំណាចនីតិបញ្ញត្តិដើម្បីដកហូតតំណែងលោក។ ប្រធានាធិបតីរូបនេះអះអាងថា វាជាអំពើរំលោភរដ្ឋធម្មនុញ្ញដែលបក្សប្រឆាំងចង់ប្រើប្រាស់សវនាការនយោបាយកាត់ទោសលោកនោះ។
សមាជិកបក្សប្រឆាំងនឹងត្រូវចាប់ខ្លួនដាក់ពន្ធនាគារ បើសិនជាពួកគេហ៊ានប្រើប្រាស់ស្ថាប័ននីតិបញ្ញត្តិជាផ្លូវដើម្បីដកហួតតំណែងរបស់ប្រធានាធិបតី។ លោកប្រធានាធិបតីវេណេស៊ុយអេឡាដែលជាអ្នកនយោបាយសង្គមនិយម នីកូឡា ម៉ាឌុយរ៉ូ បានលើកឡើងបែបនេះនៅថ្ងៃសុក្រទី ២៨ តុលា។
យោងតាមទីភ្នាក់ងារព័ត៌មាន AFP ប្រធានាធិបតីរដ្ឋអាមេរិកឡាទីនរូបនេះបានព្រមានរាល់សមាជិកគណបក្សប្រឆាំងរួមទាំងបណ្តាសមាជិកសភាផងដែរ ពេលដែលពួកគេមានចេតនាទម្លាក់លោកពីតំណែង។ លោកអះអាងថា ការប្រើប្រាស់អំណាចនីតិបញ្ហាដកតំណែងលោក គ្មានចែងក្នុងរដ្ឋធម្មនុញ្ញទេ។
«ប្រសិនពួកគេចាប់ផ្តើមសវនាការនយោបាយ ដែលមិនមានកំណត់ក្នុងរដ្ឋធម្មនុញ្ញ ស្ថាប័នរដ្ឋអាជ្ញាក៏មានសិទ្ធិដាក់ពាក្យបណ្តឹងទៅតុលាការនិងចាប់ខ្លួនពួកគេដាក់គុក ព្រោះពួកគេរំលោភរដ្ឋធម្មនុញ្ញ។ ចាប់ខ្លួនទាំងអស់ ទោះជាពួកគេជាសមាជិកសភាក៏ដោយ»។នេះជាសារព្រមានរបស់លោក ម៉ាឌុយរ៉ូ ផ្ញើទៅបក្សប្រឆាំងនិងអ្នកដែលប្រឆាំងលោកគ្រប់គ្នា។
ការព្រមាននេះធ្វើឡើងស្របពេលដែល បក្សប្រឆាំងបានអំពាវនាវឲ្យប្រជាជនចូលរួមដាក់សម្ពាធលើប្រធានាធិបតីដើម្បីបង្ខំឲ្យលោកចុះចេញពីតំណែង។ ហើយនៅថ្ងៃសុក្រនេះ គេឃើញមានចលនាកូដកម្មកើតឡើងដែរ ដោយចលនានេះធ្វើឡើងក្រោយពេលដែលរដ្ឋាភិបាលហាមផ្តាច់មិនឲ្យមានការធ្វើប្រជាមតិដើម្បីដកហូតតំណែងលោក ម៉ាឌុយរ៉ូនោះ។ ក្រុមប្រឆាំងកន្លងមក បានដើរប្រមែរប្រមូលស្នាមមេដៃប្រជាពលរដ្ឋដើម្បីបង្ហាញឲ្យឃើញពីការមិនពេញចិត្តចំពោះការដឹកនាំរបស់ប្រធានាធិបតីបច្ចុប្បន្ន ព្រោះរដ្ឋាភិបាលមិនបានដោះស្រាយបញ្ហាប្រឈមរបស់ប្រជាជនឡើយ។
វេណេស៊ុយអេឡាកំពុងប្រឈមវិបត្តិសេដ្ឋកិច្ចធ្ងន់ធ្ងរ ហើយតម្លៃប្រេងធ្លាក់ចុះខ្លាំងក៏រឹតតែធ្វើឲ្យរដ្ឋអាមេរិកឡាទីមួយនេះរងគ្រោះទ្វេដង។ តម្លៃទំនិញឡើងថ្លៃ ចំណីអាហារខ្វះខាត ហើយចលនាបាតុកម្មរបស់ប្រជាជនកើតឡើងជាបន្តបន្ទាប់។ អត្រាអតិផរណានៅត្រឹមឆ្នាំ នេះកើនឡើងដល់ ៤៧៥ ភាគរយ ហើយគេវាយតម្លៃថា វានឹងកើនឡើងដល់ ១៦៦០ភាគរយនៅឆ្នាំក្រោយនេះ។
ទាក់ទិននឹងវិបត្តិននេះប្រធានាធិបតីបច្ចុប្បន្នបានចោទថា វិបត្តិដែលកើតឡើងសុទ្ធតែជាផែនការកខ្វក់របស់ក្រុមមាននិន្នាការទៅរករបបមូលធននិយម ប៉ុន្តែក្រុមប្រឆាំងបានបន្ទោសថា វាមកពីគោលនយោបាយសេដ្ឋកិច្ចរបស់ប្រធានាធិបតីទៅវិញ។ ហើយកាលពីដើមសប្តាហ៍ សភាវេណេស៊ុយអេឡា បានបើកកិច្ចប្រជុំពិសេសមួយ ដើម្បីដាក់សម្ពាធលើប្រធានាធិបតី Nicolas Maduro ដោយគេចោទប្រកាន់ថា លោកបានរំលោភបំពានប្រជាធិបតេយ្យ និងបំពានច្បាប់ប្រទេស។ សភាវ៉េណេស៊ុយអេឡាដែលដឹកនាំដោយបក្សប្រឆាំង ក៏បានអនុម័តសេចក្ដីសម្រេចមួយចំនួនដែលស្នើឲ្យសហគមន៍អន្តរជាតិគាំទ្រក្រុមបក្សប្រឆាំងដែលមានចេតនាទម្លាក់លោក Maduro ពីតំណែងនោះ។
តាមពិតទៅវិបត្តិសេដ្ឋកិច្ចជារឿងមួយ តែនយោបាយធ្លាក់ក្នុងភាពចលាចលក្រោយពេលពេលក្រុមប្រឆាំងឈ្នះឆ្នោតសភាកាលពីចុងឆ្នាំមុន។ ជ័យជម្នះរបស់ក្រុមប្រឆាំងបង្ខំឲ្យប្រធានាធិបតីចែករម្លែកអំណាចខ្លះឲ្យសភាដែលកាន់កាប់ដោយបក្សប្រឆាំង ដែលវាជារឿងដំបូងបំផុតមិនធ្លាប់មានចាប់ពីអតីតមេដឹកនាំសង្គមនិយម Hugo Chavez ឡើងកាន់អំណាចឆ្នាំ ១៩៩៩មកនោះ៕
Tag:
វេណេស៊ុយអេឡា
Nocolas Maduro
© រក្សាសិទ្ធិដោយ thmeythmey.com