អន្តរជាតិ
ប្រមុខអង្គការសហប្រជាជាតិ ខកចិត្ត និងចង់ឲ្យអាហ្វ្រិកខាងត្បូងពិចារណាឡើងវិញពីការចាកចេញពីតុលាការព្រហ្មទណ្ឌអន្តរជាតិ ![លោក បាន គីមូន អគ្គលេខាធិការអង្គការសហប្រជាជាតិ](https://image.thmeythmey.com/pictures/2016/11/01/vvvfff.jpg)
លោក បាន គីមូន អគ្គលេខាធិការអង្គការសហប្រជាជាតិ
×![]()
ការតម្រង់ជួរគ្នាដើរចេញពីតុលាការព្រហ្មទណ្ឌអន្តរជាតិរបស់ប្រទេសតំបន់អាហ្វ្រិក បានធ្វើឲ្យពិភពលោកមើលឃើញពីកម្សោយនៃស្ថាប័ននោះ។ ដោយសារតែបញ្ហានេះ ក៏បានធ្វើឲ្យប្រមុខអង្គការសហប្រជាជាតិលោក បាន គីមូន មិនសប្បាយចិត្តប៉ុន្មាននោះទេ។ លោក បាន គីមូន ថែមទាំងបានទូរសព្ទទៅប្រធានាធិបតីអាហ្វ្រិកខាងត្បូងដើម្បីឲ្យពិចារណាឡើងវិញចំពោះចេតនាការចាកចេញពីតុលាការនោះទៀតផង។
អគ្គលេខាធិការអង្គការសហប្រជាជាតិជិតផុតអាណត្តិ លោក បាន គីមូន បានទូរសព្ទទៅលោកប្រធានាធិបតីអាហ្វ្រិកខាងត្បូង ជេកខប ហ្ស៊ូម៉ា (Jacob Zuma) ។ ក្នុងកិច្ចសន្ទននោះ លោក បានទទួលស្គាល់ពីភាពដឹកនាំរបស់អាហ្វ្រិកខាងត្បូង ក្នុងការដោះស្រាយលើបញ្ហាប្រឈមសកល ជាពិសេសពាក់ព័ន្ធនឹងសន្តិភាព និងសន្តិសុខនៅអាហ្វ្រិក និងកិច្ចព្រមព្រៀងបម្រែបម្រួលអាកាសផងដែរ។ នេះបើយោងតាមសេចក្តីថ្លែងការណ៍ដែលចេញផ្សាយដោយការិយាល័យរបស់លោកអគ្គលេខាធិការរូបនោះនៅថ្ងៃទី៣០ ខែតុលាកន្លងទៅ។
ទន្ទឹមនឹងការទទួលស្គាល់ពីតួនាទីរបស់អាហ្វ្រិកខាងត្បូង លោក បាន គីមូន ក៏ប្រាប់លោកប្រធានាធិបតី Jacob Zuma ថា លោក ពិតជាសោកស្តាយចំពោះការសម្រេចចិត្តរបស់រដ្ឋាភិបាលអាហ្វ្រិកខាងត្បូងក្នុងការដកខ្លួនចេញពីតុលាការព្រហ្មទណ្ឌអន្តរជាតិ ដោយលោក បានលើកឡើងពីកិច្ចប្រឹងប្រែងរបស់អាហ្វ្រិកខាងត្បូងក្នុងការដឹកនាំការចរចាដើម្បីអនុម័តលក្ខន្តិកៈក្រុងរ៉ូម និងជាហត្ថលេខីដំបូងគេនៃកិច្ចព្រមព្រៀងនោះផងដែរនោះ។
ប្រមុខអង្គការសហប្រជាជាតិរូបនោះ ក៏សង្ឃឹមថា អាហ្វ្រិកខាងត្បូង នឹងពិចារណាឡើងវិញចំពោះសេចក្តីសម្រេចរបស់ខ្លួន មុនពេល ដែលសេចក្តីសម្រេចនោះ ចូលជាធរមាននៅក្នុងរយៈពេល១២ខែក្រោយ។
សូមជម្រាបផងដែរថា នៅថ្ងៃទី២១ ខែតុលាកន្លងទៅ រដ្ឋមន្ត្រីយុត្តិធម៌អាហ្វ្រិកខាងត្បូងលោក Michael Masutha បានអះអាងថា រដ្ឋាភិបាលលោក បានដាក់សេចក្តីព្រាងច្បាប់ទៅកាន់សភាដើម្បីអនុម័តពីការចាកចេញពីតុលាការព្រហ្មទណ្ឌអន្តរជាតិ ដោយលោក បញ្ជាក់ហេតុផលថា តុលាការ មិនគោរពបុព្វសិទ្ធិការទូតរបស់ប្រទេសសមាជិក ក៏ដូចជាតុលាការ កាត់ទោសតែមេដឹកនាំអាហ្វ្រិកប៉ុណ្ណោះ។
ផែនការរបស់អាហ្វ្រិកខាងត្បូង ត្រូវបានធ្វើឡើងក្រោយប៊ូរុនឌី ដែលជាប្រទេសតំបន់អាហ្វ្រិកដូចគ្នានោះ បានអនុម័តច្បាប់ចាកចេញពីតុលាការរួចទៅហើយ។ សភាជាតិប៊ូរុនឌី បានបោះឆ្នោតផ្ទៃក្នុងដើម្បីសម្រេចចិត្តដើរចេញពីតុលាការព្រហ្មទណ្ឌអន្តរជាតិ ដែលបាននិងកំពុងតែបើកការស៊ើបអង្កេតលើរដ្ឋាភិបាលប៉ូរុនឌីលើការបំពានសិទ្ធិមនុស្សធ្ងន់ធ្ងរនោះ។ ការសម្រេចបោះឆ្នោតដើរចេញនេះ ក៏ស្របនឹងហេតុផលរបស់រដ្ឋាភិបាលប្រទេសអាហ្វ្រិកខាងកើតមួយនេះ អះអាងថា តុលាការដាក់គោលដៅកាត់ទោសតែប្រទេសតំបន់អាហ្វ្រិកប៉ុណ្ណោះ៕
Tag:
អាហ្វ្រិកខាងត្បូង
តុលាការព្រហ្មទណ្ឌអន្តរជាតិ
© រក្សាសិទ្ធិដោយ thmeythmey.com