ជប៉ុន ពន្យារពេល៣ខែទៀតក្នុងការអនុវត្តបទបញ្ជាស្វ័យការពារដើម្បីត្រៀមបាញ់ស្ទាក់មីស៊ីលកូរ៉េខាងជើង

អន្តរជាតិ

ជប៉ុន ពន្យារពេល៣ខែទៀតក្នុងការអនុវត្តបទបញ្ជាស្វ័យការពារដើម្បីត្រៀមបាញ់ស្ទាក់មីស៊ីលកូរ៉េខាងជើង

01, Nov 2016 , 9:59 pm

រូបភាព

ប្រព័ន្ធស្វ័យការពារជប៉ុន (ប្រភពរូបភាព៖ Kyodo)

ដោយ:

រដ្ឋាភិបាលក្រុងតូក្យូ បានបន្ថែមរយៈពេលបីខែទៀតក្នុងការអនុវត្ត «បទបញ្ជានៃការប្រើប្រាស់កងកម្លាំងស្វ័យការពារ»ដើម្បីបាញ់ស្ទាក់ ឬកម្ទេចចោលរាល់មីស៊ីលបាលីស្ទិកទាំងឡាយណា ដែលបាញ់ចេញពីកូរ៉េខាងជើង។ នេះបើយោងតាមសារព័ត៌មានជប៉ុន Kyodo នៅថ្ងៃទី០១ ខែវិច្ឆិកានេះ ដែលបានចុះផ្សាយដោយយោងតាមប្រភពមន្ត្រីរដ្ឋាភិបាលជប៉ុន។

សារព័ត៌មានដដែលនោះ បានបញ្ជាក់ថា ការសម្រេចបន្ថែមពេលនោះ ធ្វើឡើងដើម្បីរក្សាសមត្ថភាពបាញ់ស្ទាក់គ្រប់ពេលរបស់កងកម្លាំងស្វ័យការពាររបស់ខ្លួន ខណៈ សកម្មភាពកូរ៉េខាងជើង នារយៈពេលចុងក្រោយនេះ ត្រូវបានគេសង្ស័យថា កំពុងតែចល័តមីស៊ីលបាលីស្ទីក ដែលនឹងបាញ់សាកល្បងគ្រប់ពេលផងដែរ។

សូមជម្រាបផងដែរថា នៅខែសីហាកន្លងទៅ រដ្ឋមន្ត្រីការពារជាតិជប៉ុន លោកស្រី Tomomi Inada បានសម្រេចដំឡើង និងដាក់បញ្ជាដល់កងកម្លាំងស្វ័យការពារ (SDF) ក្នុងគោលដៅ ដើម្បីធានាថា កងកម្លាំងខ្លួន បានត្រៀមលក្ខណៈរួចជាស្រេចក្នុងការបាញ់ស្ទាក់រាល់បំណែកដែលចេញពីការបាញ់មីស៊ីលរបស់កូរ៉េខាងជើងនោះ។

ក្នុងរយៈពេលជិតមួយឆ្នាំនេះ កូរ៉េខាងជើង បានបាញ់សាកល្បងអាវុធនុយក្លេអ៊ែរ ដែលរួមទាំងមីស៊ីលបាលីស្ទីកជាច្រើនលើកច្រើនសារមកហើយ។ ក្នុងនោះ កូរ៉េខាងជើង ក៏ធា្លប់បាញ់សាកល្បងមីស៊ីល ធ្លាក់ចូលដែនទឹករបស់ជប៉ុន ដែលលោកនាយករដ្ឋមន្ត្រីជប៉ុន ស៊ិនហ្សូ អាបេ ចាត់ទុកថាជាសកម្មភាពព្រហើន និងព្រមានមិនលើកលែងឲ្យវិញផងដែរ៕