អន្តរជាតិ
រុស្សីដាក់ខែលការពារនៅបាល់ទិក ដើម្បីឆ្លើយតបខែលការពារអាមេរិកនៅអឺរ៉ុបខាងកើត
× ត្រឹមមួយថ្ងៃក្រោយប្រធានាធិបតី វ្ល៉ាឌីមៀ ពូទីន លើកពីវិធានការណ៍សម្រាប់ឆ្លើយតបនឹងការគំរាមកំហែងពីសំណាក់អាមេរិកនៅអឺរ៉ុបខាងកើត រុស្សី ក៏បានបង្ហាញផែនការពង្រាយប្រព័ន្ធការពារមីស៊ីល S-400 ទៅកាន់ក្រុង Kaliningrad ដែលស្ថិតនៅតំបន់បាល់ទិក។ រុស្សីអះអាងថា ការបញ្ជូនខែលការពារនេះ គឺដើម្បីឆ្លើយតបការពង្រាយខែលការពារ THAAD របស់អាមេរិកនៅអឺរ៉ុបខាងកើត។
មិនយូរប៉ុន្មានក្រោយចល័តមីស៊ីល Iskandar អាចបំពាក់នុយក្លេអ៊ែរបានទៅកាន់ក្រុង Kaliningrad ដែលស្ថិតនៅចន្លោះប្រទេសប៉ូឡូញ និងលីទុយអានី រុស្ស៊ីក៏បញ្ចេញគម្រោងពង្រាយខែលការពារមីស៊ីលប្រភេទ S-400 ទៅកាន់តំបន់នេះទៀត។ រុស្សីបញ្ជាក់ច្បាស់ថា ខ្លួនបញ្ចូនប្រព័ន្ធការពារនេះទៅកាន់ Kaliningrad ព្រោះអាមេរិកក៏បានពង្រាយប្រព័ន្ធការពារមីស៊ីលរបស់ខ្លួនទៅកាន់អឺរ៉ុបខាងកើតដែរ។
នៅថ្ងៃទី២១ ខែវិច្ឆិកា លោក Viktor Ozerov ប្រធានគណៈកម្មធិការការពារជាតិនៃព្រឹទ្ធសភារុស្សី និយាយថា ក្រុងមូស្គូត្រូវបង្ខំចិត្តឆ្លើយតបផែនការរបស់អាមេរិក ដែលពង្រាយខែលការពារនៅក្បែរទឹកដីរុស្សី។ ដូច្នេះរុស្សីត្រូវបន្ថែមកម្លាំងដើម្បីទប់ទល់នឹងការគំរាមបែបនេះ។ លោក Ozerov បញ្ជាក់ថា៖ «កម្លាំងបន្ថែមនឹងរួមបញ្ចូលការពង្រាយខែលការពារ S-400 និងប្រព័ន្ធមីស៊ីល Iskandar »។
ក្រុងមូស្គូហាក់កំពុងព្យាយាមពង្រឹងកម្លាំងរបស់ខ្លួននៅតាមព្រំដែនជាពិសេសនៅជាប់បណ្តារដ្ឋបាល់ទិក ដោយមានគោលដៅរក្សាអំណាចនិងឥទ្ធិពលរបស់ខ្លួនដើម្បីគំរាមអឺរ៉ុប។
កាលពីឆ្នាំ ២០១៤ រុស្ស៊ីក៏ធ្លាប់ចល័តអាវុធប្រភេទនេះទៅកាន់តំបន់ Kaliningrad ដែរដើម្បីចូលរួមសមយុទ្ធយោធា។ តែវាជាសារមួយបង្ហាញទៅលោកខាងលិចថារុស្ស៊ីមិនពេញចិត្តចំពោះការបន្តកសាងកម្លាំងរបស់បក្សសម្ព័ន្ធយោធាណាតូនៅតាមព្រំដែនខ្លួនឡើយ។
ចាប់ពីជម្លោះអ៊ុយក្រែនកើតឡើងនៅដើមឆ្នាំ ២០១៤ បក្សសម្ព័ន្ធណាតូ ដែលដឹកនាំដោយអាមេរិកបន្តកសាងកម្លាំងទ័ពនៅជាប់ព្រំដែនរុស្ស៊ី ហើយសមយុទ្ធយោធាត្រូវបានគេរៀបចំឡើងជាញឹកញាប់ដើម្បីកំញើញរុស្ស៊ី។ អ្វីដែលគួរឲ្យកត់សម្គាល់អាមេរិកបានដំឡើងខែលការពារមីស៊ីលនៅប៉ូឡូញកាលពីប៉ុន្មានខែមុននេះថែមទៀត ដែលសកម្មភាពនេះធ្វើឲ្យរុស្ស៊ីនៅមិនសុខនិងខឹងសម្បារជាខ្លាំង។
ការពង្រាយខែលការពារនៅប៉ូឡូញនេះហើយ ជាដើមហេតុដែលធ្វើឲ្យរុស្សីសម្រេចចិត្តបញ្ចេញគម្រោងបញ្ជូនប្រព័ន្ធមីស៊ីលបំពាក់នុយក្លេអ៊ែរ និងប្រព័ន្ធការពារមីស៊ីល S-400 ទៅកាន់ទីក្រុង Kaliningrad ជាបន្តបន្ទាប់។ អាមេរិកអះអាងថា ខែលការពារនេះ គឺដើម្បីការពារការគំរាមពីមីស៊ីលអ៊ីរ៉ង់ប៉ុណ្ណោះ តែរុស្សីចោទវិញថា ខែលការពារនេះ គឺដាក់សំដៅលើខ្លួន ដូច្នេះខ្លួនត្រូវតែឆ្លើយតបវិញ៕
Tag:
រុស្សី
អាមេរិក
S-400
© រក្សាសិទ្ធិដោយ thmeythmey.com