អន្តរជាតិ
គុយបារាប់ពាន់នាក់នៅក្រុង Miami នាំគ្នាចេញអបអរតាមផ្លូវ ក្រោយមរណភាពលោក ហ្វីដែល កាស្ត្រូ ![](https://image.thmeythmey.com/pictures/2016/11/26/8060762-3x2-700x467.jpg)
×![]()
ពលរដ្ឋអាមេរិកដើមកំណើតគុយបារាប់ពាន់នាក់ បាននាំគ្នាស្រែកហ៊ោកញ្ជ្រៀវពេញដងផ្លូវនានានៅក្នុងក្រុង Miami សហរដ្ឋអាមេរិក ជាពិសេសនៅតំបន់ Little Havana ដែលមានពលរដ្ឋគុយបារស់នៅច្រើន។ បើតាមការផ្សាយរបស់ AP ភាពសប្បាយរីករាយនេះ កើតឡើង ក្រោយការប្រកាសពីមរណភាពរបស់អតីតមេដឹកនាំគុយបា លោក ហ្វីដែល កាស្ត្រូ ។
លោក រ៉ាអ៊ូល កាស្ត្រូ ប្រធានាធិបតីរបស់គុយបា បានចេញប្រកាសតាមទូរទស្សន៍រដ្ឋនៅថ្ងៃសៅរ៍នេះ ពីមរណភាពរបស់លោក ហ្វីដែល កាស្ត្រូ បងប្រុសបង្កើតរបស់ខ្លួន ក្នុងអាយុ៩០ឆ្នាំ។ លោក ហ្វីដែល កាស្ត្រូ បានដឹកនាំគុយបាចាប់តាំងពីឆ្នាំ១៩៥៩មក ដោយកាន់តំណែងជានាយករដ្ឋមន្ត្រីរហូតដល់ឆ្នាំ១៩៧៦ ហើយបន្ទាប់មកជាប្រធានាធិបតីរហូតដល់ឆ្នាំ២០០៨។ ដោយសារធ្លាក់ខ្លួនឈឺកាន់តែខ្លាំងនៅឆ្នាំ២០០៤ លោកបានប្រកាសផ្ទេរតំណែងទៅឲ្យប្អូនប្រុសបង្កើតរបស់ខ្លួន គឺលោក រ៉ាអ៊ូល កាស្ត្រូ ដែលបានកាន់អំណាចចាប់ពីឆ្នាំ២០០៨មក។
ខណៈដែលរដ្ឋាភិបាលគុយបា សោកស្តាយចំពោះការបាត់បង់មេដឹកនាំបដិវត្តរបស់ខ្លួន ពលរដ្ឋគុយបាដែលនិរទេសខ្លួននៅសហរដ្ឋអាមេរិក បែរជាសម្តែងនូវក្តីសប្បាយរីករាយទៅវិញ។ បើគិតចាប់តាំងពីលោក ហ្វីដែល កាស្ត្រូ ឡើងកាន់អំណាចនៅឆ្នាំ១៩៥៩ មក ពលរដ្ឋគុយបាជាច្រើននាក់ បានរត់ភៀសខ្លួនទៅកាន់ទីក្រុង Miami ដោយសារតែពួកគេទទួលរងនូវការគាបសង្កត់ក្រោមរបបកុំម្មុយនីស្ត។
អ្នកដែលផ្សងព្រេងភៀសខ្លួនមួយចំនួន បានស្លាប់នៅក្នុងមហាសមុទ្រក្នុងសំណើរទៅកាន់ភាគខាងត្បូងរដ្ឋហ្លរីដា។ បុរសវ័យ៤៨ឆ្នាំម្នាក់បានលើកឡើងថា៖ «ខ្ញុំមិនបានអបអរចំពោះការស្លាប់របស់អ្នកណាម្នាក់នោះឡើយ ប៉ុន្តែខ្ញុំគ្រាន់តែសង្ឃឹមថា លទ្ធិប្រជាធិបតេយ្យនឹងមាននៅគុយបា»៕
Tag:
គុយបា
ហ្វីដែល កាស្ត្រូ
© រក្សាសិទ្ធិដោយ thmeythmey.com