អន្តរជាតិ
នយោបាយអន្តរជាតិ
អឺរ៉ុបបន្ទោស អូបាម៉ា ដែលចាត់ទុករុស្សីត្រឹមជាមហាអំណាចតូចតាច
×
ប្រធានគណៈកម្មការអឺរ៉ុប Jean-Claude Juncker បានបង្ហាញជំហរមិនស្របគ្នាជាមួយប្រធានាធិបតីចាំផ្ទះ បារ៉ាក់ អូបាម៉ា ជុំវិញឥទ្ធិពលរបស់រុស្សីលើឆាកអន្តរជាតិ។ លោកអូបាម៉ា ធ្លាប់ចាត់ទុករុស្សីត្រឹមជាមហាអំណាចក្នុងតំបន់មួយប៉ុណ្ណោះ តែប្រមុខដឹកនាំអឺរ៉ុបរូបនេះអះអាងថា រុស្សី ជាប្រទេសធំមួយ ហើយមានរឿងរ៉ាវជាច្រើនដែលអឺរ៉ុបផ្ទាល់ ត្រូវរៀនសូត្រពីរុស្សី។
ប្រមុខស្ថាប័ននីតិប្រតិបត្តិអឺរ៉ុប លោក Jean-Claude Juncker នៅថ្ងៃទី២៦ ខែវិច្ឆិកា បាននិយាយថា ប្រធានាធិបតីចប់អាណត្តិ បារ៉ាក់ អូបាម៉ា បានបង្កើតកំហុសដ៏ធំមួយ ដែលហៅរុស្សីជាមហាអំណាចតូចតាច។ ជំនួសមកវិញនោះ អឺរ៉ុបចាត់ទុករុស្សីជាប្រទេសដ៏ធំ និងជាប្រទេសដែលមានមោទនភាពមួយ ហើយអឺរ៉ុបអាចរៀនតាមរុស្សីផងដែរ។
ក្នុងបទសម្ភាសន៍ជាមួយសារព័ត៌មាន Euronews លោក Juncker ក៏សារភាពដែរថា អឺរ៉ុបមិនដែលអើពើនឹងរុស្សីសោះឡើយ ហើយអឺរ៉ុបត្រូវរៀនច្រើនណាស់ពីរុស្សី។ លោកបន្តថា អឺរ៉ុបមានផ្ទៃដី៥,៥លានម៉ែតការ៉េ តែរុស្សីមានផ្ទៃដីដល់ទៅ១៧,៥លានម៉ែតការ៉េ ដូច្នេះរុស្សី ជាប្រទេសដ៏ធំ ប្រកបដោយមោទនភាព។ លោកក៏បានរិះគន់ចំៗលើការអធិប្បាយរបស់លោក បារ៉ាក់ អូបាម៉ា ដែលចាត់ទុករុស្សីជាមហាអំណាចតំបន់ ដែលគំរាមកំហែងអ្នកជិតខាងរបស់ខ្លួន។
លោក Juncker បញ្ជាក់ថា រុស្សីមិនមែនជាមហាអំណាចតំបន់ដូចការអះអាងរបស់លោក អូបាម៉ា ក្នុងឆ្នាំ២០១៤ឡើយ។ លោកចាត់ទុករឿងនេះ ជាការវាយតម្លៃដ៏ខុសឆ្គងមួយ។ ជាមួយគ្នានេះ ប្រធានគណៈកម្មការអឺរ៉ុបបារាំង ក៏ប្រកាសពីគោលនយោបាយឯករាជ្យរបស់អឺរ៉ុប និងមិនដើរតាមខ្សែញ៉ាក់របស់ក្រុងវ៉ាស៊ីនតោនឡើយ ជាពិសេសលើបញ្ហារុស្សីតែម្ដង។ ពោលគឺអឺរ៉ុបមានជំហរផ្ទាល់ខ្លួនក្នុងទំនាក់ទំនងជាមួយក្រុងមូស្គូ។
កាលពីថ្ងៃទី២៥ ខែវិច្ឆិកា រដ្ឋមន្ត្រីការបរទេសប្រទេសអឺរ៉ុបចំនូន១៥ បានប្រកាសចាប់ផ្ដើមការចរចាជាមួយរុស្សីឡើងវិញ ដើម្បីស្ដារទំនាក់ទំនងជាមួយរុស្សី និងចៀសវាងការរត់ប្រណាំងសព្វាវុធនៅអឺរ៉ុប។ ប្រមុខការទូតអាល្លឺម៉ង់ Frank-Walter Steinmeier បានលើកឡើងថា អឺរ៉ុបកំពុងស្ថិតក្នុងគ្រោះថ្នាក់ ហើយចំពេលដែលទំនាក់ទំនងជាមួយរុស្សីមិនល្អស្រាប់នោះ អឺរ៉ុបត្រូវការការចរចាឲ្យបានច្រើនបំផុត។
នារយៈពេលចុងក្រោយ បណ្ដាមេដឹកនាំសហភាពអឺរ៉ុប ហាក់បង្ហាញជំហរដកឃ្លាពីអាមេរិក ក្រោយការឈ្នះឆ្នោតរបស់សេដ្ឋីអចលនទ្រព្យ ដូណាល់ ត្រាំ ដែលមានជំហរជាតិនិយមខ្លាំង។ អឺរ៉ុបទំនងខិតទៅចរចាដោយផ្ទាល់ជាមួយរុស្សី ដើម្បីពង្រឹងទំនាក់ទំនងប្រសើរឡើងវិញ បើទោះជាវិស័យយោធាភាគីទាំងពីរនាំគ្នាបង្កើនចំនួនកងទ័ពក៏ដោយ។ យ៉ាងណាក្ដី បញ្ហាប្រឈមជាច្រើនរួមទាំងជម្លោះអ៊ុយក្រែនផងនោះ នឹងក្លាយជាឧបសគ្គនៃការព្យាយាមខិតជិតគ្នារវាងគូប្រជែងទាំងពីរនេះ៕
Tag:
អឺរ៉ុប
អាមេរិក
រុស្សី
Jean-Claude Juncker
© រក្សាសិទ្ធិដោយ thmeythmey.com