អន្តរជាតិ
តួកគីព្រមានអឺរ៉ុប «កុំហួសហេតុពេក» ![ប្រធានាធិបតីតួកគី Tayyip Erdogan](https://image.thmeythmey.com/pictures/2016/11/28/tayyip_erdogan.jpg)
ប្រធានាធិបតីតួកគី Tayyip Erdogan
×![]()
បន្ទាប់ពីសភាអឺរ៉ុបបោះឆ្នោតស្នើឲ្យផ្អាកដំណើរការចរចាលើការសុំចូលជាសមាជិកអឺរ៉ុបរបស់តួកគី ប្រធានាធិបតីតួកគី Recep Tayyip Erdogan បានប្រតិកម្មខ្លាំងៗតបតវិញនឹងការអំពាវនាវឲ្យផ្អាកនេះ។ ដំបូងនោះ ប្រធានាធិបតីតួកគី ព្រមានបើកទ្វារព្រំដែនឲ្យជនភៀសខ្លួនរាប់លាននាក់កំពុងរស់នៅតួកគី ធ្វើដំណើរទៅកាន់អឺរ៉ុប។ ហើយចុងក្រោយនេះ លោកក៏ប្រាប់អឺរ៉ុប កុំធ្វើអ្វីហួសព្រំដែនរបស់ខ្លួន។
ប្រមុខរដ្ឋតួកគី Recep Tayyip Erdogan ក្ដៅស្លឹកត្រចៀកយ៉ាងខ្លាំងនឹងការសម្រេចចិត្តរបស់សភាអឺរ៉ុប ដែលទទូចឲ្យព្យួរការចរចាជាមួយខ្លួននោះ។ លោក Erdogan បានព្រមានអឺរ៉ុប មិនត្រូវធ្វើអ្វីឲ្យហួសហេតុឡើយ ហើយក៏គ្មានតួនាទីអ្វីមកបង្ខំឲ្យអឺរ៉ុបធ្វើតាមការចង់បានរបស់ខ្លួនលើការប្រយុទ្ធប្រឆាំងភេរវកម្មឡើយ។
សេចក្ដីសម្រេចរបស់សភាអឺរ៉ុប ធ្វើឡើងដើម្បីឆ្លើយតបនឹងវិធានការខ្លាំងៗរបស់តួកគីលើគម្រោងរដ្ឋប្រហារមិនបានសម្រេចក្នុងខែកក្កដា។ សមាជិកសភាអឺរ៉ុប បានថ្កោលទោសវិធានការបង្ក្រាបដែលមិនសមរម្យលើអ្នកជាប់ពាក់ព័ន្ធផែនការរដ្ឋប្រហារនេះ។ ហើយសភាអឺរ៉ុប ចាត់ទុកសកម្មភាពនេះ ថារំលោភបំពានសិទ្ធិសេរីភាពមូលដ្ឋានដែលត្រូវការពារដោយច្បាប់រដ្ឋធម្មនុញ្ញ។
នៅក្នុងការឆ្លើយតបលើកនេះ ប្រធានាធិបតីតួកគី Erdogan បានប្រាប់សហភាពអឺរ៉ុបចំៗពីព្រំដែនដែលខ្លួនអាចធ្វើសកម្មភាពបាន។ ទីភ្នាក់ងារព័ត៌មាន Anadolu បានស្រង់សម្ដីលោក Erdogan ថា៖ «រដ្ឋាភិបាលនិងសភាតួកគី មានសិទ្ធិពន្យាររយៈពេលនៃការដាក់ប្រទេសក្នុងស្ថានការណ៍បន្ទាន់។ តើសភាអឺរ៉ុប ជាអ្នកគ្រប់គ្រងតួកគី ឬរដ្ឋាភិបាលតួកគី ជាអ្នកគ្រប់គ្រងតួកគី? ដឹងពីព្រំដែនរបស់ខ្លួនផង!»
ថ្លែងពីទីក្រុងអ៊ីស្តង់ប៊ុល លោក Erdogan បន្តថា ការប្រាប់ប្រទេសកំពុងប្រយុទ្ធភេរវកម្ម មិនឲ្យប្រឆាំងភេរវកម្ម គឺដូចជាប្រាប់ពួកគេមិនឲ្យធ្វើអ្វីសោះ។ ហើយលោកបញ្ជាក់ច្បាស់ថា តួកគីនឹងបន្តប្រយុទ្ធក្រុមភេរវកម្មទៅតាមគោលដៅរបស់ខ្លួន។ ក្នុងខែតុលា រដ្ឋាភិបាលតួកគី បានពន្យារពេលដាក់ប្រទេសក្នុងស្ថានភាពអាសន្នរយៈពេលបីខែទៀត ដើម្បីឆ្លើយតបរដ្ឋប្រហារខែកក្កដា។ មនុស្សជាច្រើនត្រូវបានសម្លាប់ ចាប់ខ្លួន និងបណ្ដេញពីតំណែង។
នៅថ្ងៃទី២៥ ខែវិច្ឆិកា លោក Erdogan បានប្រាប់មេដឹកនាំអឺរ៉ុបថា តួកគីអាចបើកព្រំដែន បើអឺរ៉ុបនៅតែរុញច្រានតួកគីទៀតនោះ។ លោកនិយាយថា តួកគីតែឯងជាអ្នកចិញ្ចឹមជនភៀសខ្លួនជាងបីលាននាក់ តែពេលនេះអឺរ៉ុបបែរជាក្បត់តួកគីទៅវិញ។ លោកព្រមានអឺរ៉ុបថា៖ «បើអឺរ៉ុបនៅតែបន្តសកម្មភាពរបស់ខ្លួន តួកគីនឹងបើកព្រំដែនរបស់ខ្លួនមិនខាន»៕
Tag:
តួកគី
អឺរ៉ុប
ជនភៀសខ្លួន
Recep Tayyip Erdogan
© រក្សាសិទ្ធិដោយ thmeythmey.com