អន្តរជាតិ
នយោបាយអន្តរជាតិ
អ៊ីស្រាអែលទិញយន្តហោះចម្បាំង F-35 បន្ថែមពីអាមេរិក ![](https://image.thmeythmey.com/pictures/2016/11/28/30302370472_d838b21252_z.jpg)
×![]()
រដ្ឋាភិបាលអ៊ីស្រាអែលនឹងនាំចូលយន្តហោះចម្បាំងសេរ៊ីទំនើបបំបាំងកាយ F-35 បន្ថែមចំនួន ១៧ គ្រឿងបន្ថែមទៀត ដោយប្រទេសនេះនឹងមានយន្តហោះសរុបរហូតដល់ ៥០ គ្រឿងនៅប៉ុន្មានឆ្នាំខាងមុខទៀត។ ការបញ្ជាទិញយន្តហោះនេះស្ថិតក្រោមគម្រោងជំនួយយោធារបស់សហរដ្ឋអាមេរិកប៉ុណ្ណោះ។
មានសំឡេង
ការិយាល័យនាយករដ្ឋមន្ត្រីអ៊ីស្រាអែល បានប្រកាសថា រដ្ឋាភិបាលអ៊ីស្រាអែលនឹងបញ្ជាទិញយន្តហោះចម្បាំងបំបាំងខ្លួនម៉ាក F-35 ចំនួន ១៧ គ្រឿងពីអាមេរិកនៅពេលខាងមុខ។ ការទិញបន្ថែមយន្តហោះចម្បាំង ១៧គ្រឿងនេះ នឹងធ្វើឲ្យកងទ័ពជើងអាកាសអ៊ីស្រាអែលមានយន្តហោះប្រភេទនេះសរុបចំនួន ៥០គ្រឿង។
យោងតាមទីភ្នាក់ងារព័ត៌មាន AFP ការិយាល័យនាយករដ្ឋមន្ត្រីប្រកាសបែបនេះក្រោយពេលដែលគណៈកម្មាធិការសន្តិសុខព្រមផ្តល់ភ្លើងខៀវសម្រាប់ការនាំអាវុធចូលបន្ថែមនេះ។ ហើយគម្រោងទិញយន្តហោះចម្បាំងបន្ថែមនេះគឺស្ថិតនៅក្រោមគម្រោងជំនួយយោធារបស់ក្រុងវ៉ាស៊ីនតោនចំពោះអ៊ីស្រាអែលប៉ុណ្ណោះ។
សូមបញ្ជាក់បន្តិចថា កាលពីកញ្ញាកន្លងទៅ ប្រធានាធិបតីបារ៉ាក់ អូបាម៉ា បានចុះហត្ថលេខាលើឯកសារដែលកំណត់ពីកញ្ចប់ជំនួយយោធាសម្រាប់អ៊ីស្រាអែលរយៈពេល ១០ឆ្នាំ ដែលមានទំហំរហូតដល់ ៣៨ ពាន់លានដុល្លារអាមេរិកឯណោះ។ ហើយកញ្ចប់ជំនួយដែលចុះហត្ថលេខាដោយលោក បារ៉ាក់ អូបាម៉ា ផ្ទាល់នេះមានទំហំធំបំផុតមិនធ្លាប់មានក្នុងប្រវត្តិសាស្ត្រអាមេរិកឡើយ។
ត្រឡប់មកវិញ អ៊ីស្រាអែល នឹងទទួលបានយន្តហោះចម្បាំង F-35 ជាលើកដំបូងនៅខែក្រោយនេះ។ អ្វីដែលគួរឲ្យកត់សម្គាល់ ក្រុមហ៊ុនបច្ចេកវិទ្យាអ៊ីស្រាអែលបានចូលរួមជាមួយសហរដ្ឋអាមេរិកក្នុងការផលិតមួកមានបច្ចេកវិទ្យាទំនើបសម្រាប់អ្នកបើកបរយន្តហោះចម្បាំង F-35 នេះដែរ។ ហើយក្រុមហ៊ុនឧស្សាហកម្មយោធារបស់រដ្ឋអ៊ីស្រាអែល ក៏ចូលរួមផលិតផ្នែកខ្លះនៃយន្តហោះចម្បាំង F-35 នេះដែរ។
តាមពិតទៅ យន្តហោះចម្បាំងថ្មីនេះក្លាយជាប្រភេទយន្តហោះចម្បាំងចុងក្រោយដែលមានសមត្ថភាពខ្ពស់ដោយវាអាចបំបាំងកាយផុតពីរ៉ាដា,អាចហោះបានល្បឿនបំផុត និងអាចមានសមត្ថភាពប្រយុទ្ធខ្ពស់ផង។
ពាក់ព័ន្ធការនាំចូលអាវុធបន្ថែមនេះ មេដឹកនាំអ៊ីស្រាអែលបានអះអាងថា វាជាគោលនយោបាយពង្រឹងសន្តិសុខ និងសមត្ថភាពការពារជាតិដើម្បីទប់ទល់រាល់ការគំរាមកំហែងពីក្រៅ។ នាយករដ្ឋមន្ត្រីអ៊ីស្រាអែលលោក Benjamin Netanyahu បានលើកឡើងថា៖« អ៊ីស្រាអែលអាចការពារខ្លួន ឯងបានដោយប្រើប្រាស់កម្លាំងផ្ទាល់ខ្លួនដើម្បីប្រឆាំងសត្រូវទាំងអស់»។
យ៉ាងណាមិញគេដឹងច្បាស់ថា អ៊ីស្រាអែលព្យាយាមពង្រឹងសមត្ថភាពរបស់ខ្លួនដើម្បីទប់ទល់ការគំរាមកំហែងពីសំណាក់អ៊ីរ៉ង់។ ចាប់ពីពេលដែលមហាអំណាចប្រាំ បូកមួយចុះកិច្ចព្រមព្រៀងជាមួយអ៊ីរ៉ង់កាលពីខែកក្កដាឆ្នាំមុន អ៊ីស្រាអែលបន្តរិះគន់កិច្ចព្រមព្រៀង និងចាត់ទុកថា វាជាកំហុសឆ្គងប្រវត្តិសាស្ត្រមួយ។ ហើយអ៊ីស្រាអែលព្រមានម្តងជាពីរដងប្រើប្រាស់កម្លាំងយោធាជាលក្ខណៈឯកតោភាគីដើម្បីប្រឆាំងអ៊ីរ៉ង់បើសិនជាចាំបាច់នោះដើម្បីទប់ស្កាត់កុំឲ្យអ៊ីរ៉ង់ផលិតអាវុធនុយក្លេអ៊ែរបាននោះ៕
Tag:
Benjamin Netany
F-35
អ៊ីស្រាអែល
© រក្សាសិទ្ធិដោយ thmeythmey.com