នាយករដ្ឋមន្ត្រីឡាវ ចេញបទបញ្ជាមិនឲ្យមាន«ការធ្វើចម្ការចេកទ្រង់ទ្រាយធំ» ព្រោះខ្លាចប៉ះពាល់បរិស្ថាន

អន្តរជាតិ

នាយករដ្ឋមន្ត្រីឡាវ ចេញបទបញ្ជាមិនឲ្យមាន«ការធ្វើចម្ការចេកទ្រង់ទ្រាយធំ» ព្រោះខ្លាចប៉ះពាល់បរិស្ថាន

28, Nov 2016 , 9:19 pm

រូបភាព

លោកនាយករដ្ឋមន្ត្រីឡាវ Thongloun Sisoulith

ដោយ: ថ្មីៗ

នាយករដ្ឋមន្ត្រីឡាវ លោក Thongloun Sisoulith បានថ្លែងទៅកាន់សភាជាតិឡាវ ថា រដ្ឋាភិបាល បានហាមឃាត់មិនឲ្យមានការដាំដុះ ឬធ្វើចម្ការចេកក្នុងទំហំទ្រង់ទ្រាយធំទៀតឡើយ ដែលវិធានការនេះ ដើម្បីធានាពីការមិនប៉ះពាល់ដល់បរិស្ថាន។ លោកនាយករដ្ឋមន្ត្រី ក៏បានស្នើទៅកាន់សភាដើម្បីតាមដានពីបញ្ហានេះ ដ្បិត វា អាចប៉ះពាល់ទាំងបរិយាកាសវិនិយោគ និងប្រជាជនក្នុងតំបន់ដែលរងការប៉ះពាល់នៃការដាំដុះនោះផងដែរ។

នាកិច្ចប្រជុំពេញអង្គនៃសភាជាតិឡាវ លោកនាយករដ្ឋមន្ត្រី Thongloun Sisoulith បានជូនដំណឹងទៅកាន់សភា ថា រដ្ឋាភិបាលលោក បានចេញបទបញ្ជាមួយដើម្បីហាមមិនឲ្យមានការធ្វើការដាំដុះចម្ការចេកទ្រង់ទ្រាយធំ ក្រោយពីរដ្ឋាភិបាល បានសិក្សាពីផលប៉ះបាល់ដល់បរិស្ថាន ដែលបណ្តាលមកពីការប្រើប្រាស់សារធាតុគីមីនៅក្នុងចម្ការទាំងនេះ ដែលកំពុងតែគំរាមកំហែងដល់សហគមន៍រស់នៅខេត្តភាគខាងជើងនៃប្រទេសនោះ។ នេះបើយោងតាមការចុះផ្សាយរបស់សារព័ត៌មាន The Nation នៅថ្ងៃទី២៨ ខែវិច្ឆិកានេះ។

ចំណាត់ការរបស់រដ្ឋាភិបាលឡាវ បានធ្វើឡើងបន្ទាប់ពីមានបណ្តឹងពីអ្នកភូមិ ពាក់ព័ន្ធនឹងការប្រើប្រាស់សារធាតុគីមីរបស់ក្រុមហ៊ុនក្នុងចម្ការ ហើយ បានប៉ះពាល់ដល់ការរស់នៅប្រចាំថ្ងៃរបស់ពួកគេ។ បើតាម The Nation សារធាតុគីមីទាំងនោះ បានធ្លាយ និងហូរចូលទៅក្នុងទន្លេដែលនៅក្បែរហើយបានសម្លាប់បសុសត្វ និងធ្វើឲ្យអ្នកភូមិ មានការភ័យខ្លាចក្នុងការប្រើប្រាស់ទឹក។

ជុំវិញបញ្ហានេះ លោកនាយករដ្ឋមន្ត្រី ក៏បានជូនដំណឹងទៅកាន់សភាដែលថា ក្រោយពីរដ្ឋាភិបាលចេញបញ្ជាបញ្ឈប់ឲ្យធ្វើចម្ការ អ្នកវិនិយោគលើចម្ការទាំងនោះ ក៏បានអះអាងថាពួកគេ នឹងឈប់ធ្វើការដាំដុះ ប៉ុន្តែ សុំការអនុញ្ញាតរដ្ឋាភិបាលដើម្បីប្រមូលផលនៃដំណាំចេកចុងក្រោយរបស់ពួកគេឲ្យអស់ចិន។ នេះបើយោងតាមប្រភពព័ត៌មានដដែលនោះ ដែលបានដកស្រង់សម្តីលោកនាយករដ្ឋមន្ត្រី ដែលបានទទូចឲ្យសភាតាមដានឲ្យបានដិតដល់លើបញ្ហា ហើយលើកមកពិភាក្សាជារួមជាមួយនឹងអភិបាលខេត្តនានាថាតើមានការដាំដុះទៀតឬយ៉ាងណា ក្រោយរដ្ឋាភិបាល បានហាមឃាត់ហើយនោះ៕