អន្តរជាតិ
នយោបាយអន្តរជាតិ
រដ្ឋាភិបាល«ស៊ូជី» ប្តឹងតវ៉ាមន្ត្រីអង្គការសហប្រជាជាតិ ដែលនិយាយចោទយោធាបំពានលើ«ជនជាតិរ៉ូហ៊ីងយ៉ា» ![ប្រភពរូបភាព៖ AFP](https://image.thmeythmey.com/pictures/2016/11/29/afp.jpg)
ប្រភពរូបភាព៖ AFP
×![]()
រដ្ឋាភិបាលមីយ៉ាន់ម៉ា បានដាក់ញត្តិទៅកាន់អង្គការសហប្រជាជាតិដើម្បីប្តឹងតវ៉ាទៅនឹងការធ្វើអត្ថាធិប្បាយរបស់មន្ត្រីអង្គការសហប្រជាជាតិទទួលបន្ទុកជនភៀសខ្លួនលើបញ្ហាការធ្វើទុក្ខបុកម្នេញជនជាតិភាគតិចរ៉ូហ៊ីងយ៉ា។ រដ្ឋាភិបាលក្រុងរ៉ងហ្គូន ក៏បានចោទការធ្វើអត្ថាធិប្បាយនោះ ថា ល្មើសនឹងវិជ្ជាជីវៈ និងគោលការណ៍របស់អង្គការសហប្រជាជាតិទៀតផង។
តាមសេចក្តីប្រកាសរបស់ការិយាល័យទីប្រឹក្សារដ្ឋមីយ៉ាន់ម៉ាដែលមានលោកស្រីអ៊ុងសានស៊ូជីជាប្រមុខ ដែលដកស្រង់ដោយសារព័ត៌មាន Myanmar Times លោក Htin Linn តំណាងអចិន្ត្រៃយ៍មីយ៉ាន់ម៉ាប្រចាំអង្គការសហប្រជាជាតិក្នុងក្រុងហ្សឺណែវ បានដាក់បណ្តឹងតវ៉ាជាផ្លូវការទៅកាន់អង្គការសហប្រជាជាតិដើម្បីជំទាស់ទៅនឹងកិច្ចសម្ភាសន៍របស់មន្ត្រី UNHCR ជាមួយនឹងសារព័ត៌មានអង់គ្លេស BBC ពាក់ព័ន្ធនឹងបញ្ហាជនជាតិរ៉ូហ៊ីងយ៉ា ហើយ ក៏បានទាមទារឲ្យមានកិច្ចប្រជុំជាបន្ទាន់មួយជាមួយនឹងភ្នាក់ងារអង្គការសហប្រជាជាតិទទួលបន្ទុកជនភៀសខ្លួន។
តាមប្រភពដដែលនោះ រដ្ឋាភិបាលមីយ៉ាន់ម៉ា បានសង្កត់ធ្ងន់យ៉ាងដូច្នេះថា៖«កិច្ចសម្ភាសន៍របស់លោក McKissick មិនត្រឹមតែបំពានលើក្រមប្រតិបត្តិរបស់អង្គការសហប្រជាជាតិនោះទេ តែ ក៏បំផ្លាញសេចក្តីទុកចិត្ត និងទំនុកចិត្ត និងកិច្ចសហប្រតិបត្តិការរវាង UNHCR និងមីយ៉ាន់ម៉ាផងដែរ»។
ប្រតិកម្មទៅកាន់មន្ត្រីអង្គការសហប្រជាជាតិ គឺលោក John McKissick របស់រដ្ឋាភិបាលមីយ៉ាន់ម៉ា ក៏ព្រោះតែ មន្ត្រីរូបនេះ បានរិះគន់ពីការរំលោភសិទ្ធិមនុស្សធ្ងន់ធ្ងរពីក្រុមយោធាមីយ៉ាម៉ាទៅលើជនជាតិភាគតិចរ៉ូហ៊ីងយ៉ា។ ក្នុងកិច្ចសម្ភាសន៍ជាមួយនឹងBBCនៅថ្ងៃទី២៤ ខែវិច្ឆិកានោះ ប្រធានឧត្តមស្នងការអង្គការសហប្រជាជាតិទទួលបន្ទុកការិយាល័យជនភៀសខ្លួន លោក John McKissick បានអះអាងថា ទាហាន និងប៉ូលិសតម្រួតព្រំដែនមីយ៉ាន់ម៉ា បានចូលរួមអនុវត្ត«ទណ្ឌកម្មជាសមូហភាពទៅលើជនជាតិភាគតិចរ៉ូហ៊ីងយ៉ា»ចាប់តាំងពីថ្ងៃទី០៩ ខែតុលាមក។
ប្រធានការិយាល័យជនភៀសខ្លួនរូបនោះ បានបញ្ជាក់ថា កងកម្លាំងសន្តិសុខមីយ៉ាន់ម៉ា បានបាញ់សម្លាប់បុរស និងសម្លាប់ក្មេង រំលោភស្ត្រី ដុត និងលួចផ្ទះរបស់ជនជាតិទាំងនោះ និងកាន់តែធ្ងន់ធ្ងរនោះ បង្ខំប្រជាជនទាំងនោះឲ្យឆ្លងកាត់តាមទន្លេទៅកាន់ប្រទេស បង់ក្លាដែស ដែលជាប្រទេសជិតខាងរបស់មីយ៉ាន់ម៉ា។ លោក បានបន្ថែមទៀតថា នេះគឺជាដ៏រឿងលំបាកមួយសម្រាប់រដ្ឋាភិបាលបង់ក្លាដែស ដ្បិត បើមិនទទួលជនភៀសខ្លួនទាំងនោះ ពួកគេ គ្មានជម្រើសអ្វីក្រៅពីស្លាប់ និងរងការធ្វើទុកបុកម្នេញប៉ុណ្ណោះ តែចំហព្រំដែន នោះ វា ក្លាយជាការលើកទឹកចិត្តដល់ក្រុមយោធាទាំងនោះ ប្រព្រឹត្តសកម្មភាព។
តាមច្បាប់សញ្ជាតិមីយ៉ាន់ម៉ា មានតែជនជាតិ១៣៥ ដែលត្រូវបានទទួលស្គាល់ថាជាប្រជាជនស្របច្បាប់មីយ៉ាន់ម៉ា តែ មិនមានជនជាតិរ៉ូហ៊ីងយ៉ានៅក្នុងនោះឡើយ។ បើទោះបីជាជនជាតិភាគតិចរ៉ូហ៊ីងយ៉ា បានចូលទៅតាំងលំនៅភាគច្រើននៅក្នុងរដ្ឋ Rakhine ភាគខាងជើងនៃមីយ៉ាន់ម៉ារហូតដល់បង្កើតជាកូនតដល់ចៅហើយក៏ដោយចុះ ពួកគេ នៅតែត្រូវបានចាត់ទុកជាជនភៀសខ្លួនមកពីបង់ក្លាដែសប៉ុណ្ណោះសម្រាប់ប្រជាជនមីយ៉ាន់ម៉ាទូទៅ។ ប្រជាជនភាគតិចឥស្លាមរ៉ូហ៊ីងយ៉ាងរស់នៅដោយគ្មានសញ្ជាតិ ហើយត្រូវបានគេរំលោភបំពាននិងធ្វើទុក្ខបុកម្នេញដូចសត្វធាតុ។ គ្មានឡើយសិទ្ធិជាមូលដ្ឋាន កុំថាឡើយមានសិទ្ធិសាសនានិងជំនឿនោះ។ នេះក៏ដោយសារ ចាប់តាំងពីជម្លោះ សាសនាកើតឡើងឆ្នាំ ២០១២ មក ពួកគេក្លាយជាគោលដៅនៃការវាយប្រហាររបស់បណ្តាសង្ឃជ្រុលនិយមនិងប្រជាជនកាន់សាសនាព្រះពុទ្ធដែលជ្រុលនិយមមួយចំនួនផង៕
Tag:
មីយ៉ាន់ម៉ា
រ៉ូហ៊ីងយ៉ា
© រក្សាសិទ្ធិដោយ thmeythmey.com