ជាតិ
×![]()
ភ្នំពេញ៖ ពិព័រណ៍សៀវភៅនៅកម្ពុជាលើកទី៥ ប្រចាំឆ្នាំ២០១៦ ដែលប្រព្រឹត្តទៅនៅថ្ងៃទី០២-០៤ ខែធ្នូនេះ នៅបណ្ណាល័យជាតិ បានចាប់ផ្ដើមបើកពិព័រណ៍ ដោយមានការចូលរួមសំណាក់សិស្ស និស្សិត និងសាធារណជនទូទៅ។ «បង្កើនការអាន បង្កើតការសរសេរ» គឺជាប្រធានបទប្រចាំឆ្នាំ២០១៦ ក្នុងពិព័រណ៍នេះ។ ពិព័រណ៍នេះ អ្នករៀបចំរំពឹងថា នឹងមានអ្នកចូលរួមច្រើនជាងឆ្នាំកន្លងទៅ។
ពិព័រណ៍សៀវភៅនៅកម្ពុជាលើកទី៥នេះ បានចាប់ផ្ដើមបើកពិព័រណ៍ឲ្យសិស្ស និស្សិត និងសាធារណជនចូលរួមដោយសេរីភាពនៅថ្ងៃទី០២នេះ។ ពិព័រណ៍នេះ ដោយមានការចូលរួមបើកពិព័រណ៍ ពីសំណាក់លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន, លោក ជុច ភឿង រដ្ឋលេខាធិការក្រសួងវប្បធម៌ និងវិចិត្រសិល្បៈ និងលោក ហុក សុទ្ធិ ប្រធានសមាគមបណ្ណារក្ស និងឯកសារពិទូ។
លោក ហុក សុទ្ធិ ប្រធានសមាគមបណ្ណារក្ស និងឯកសារពិទូ បានលើកឡើងថា ពិព័រណ៍នេះរៀបចំជាលក្ខណៈថ្នាក់ជាតិ រយៈពេល៥ឆ្នាំមកហើយ។ ប្រធានសមាគមបណ្ណារក្ស និងឯកសារពិទូ បានបញ្ជាក់ថា ពិព័រណ៍សៀវភៅឆ្នាំនេះ អាចមានអ្នកចូលរួមរហូតដល់១ម៉ឺន៥ពាន់នាក់ ដែលកាលពីឆ្នាំ២០១៥កន្លងទៅ មានអ្នកចូលរួមប្រមាណ ១ម៉ឺន២ពាន់នាក់។ ម្យ៉ាងទៀត ពិព័រណ៍សៀវភៅលើកទី៥ គ្រោងនឹងចំណាយថវិកាប្រមាណ ១ម៉ឺន៧ពាន់ដុល្លារ។
ជាមួយគ្នានេះ លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន បានមានប្រសាសន៍ថា សៀវភៅក៏អាចជួយព្យាបាលជំងឺផងដែរ សម្រាប់នៅបរទេសមានការកំណត់នូវសៀវភៅណាដែលអាចជួយព្យាបាល។ បន្ថែមលើនេះ លោកបន្តថា នៅកម្ពុជាបច្ចុប្បន្ន ការអានសៀវភៅ មានការកើនឡើងច្រើនជាងមុន។ រដ្ឋមន្ត្រីក្រសួងព័ត៌មាន ក៏បានបញ្ជាក់ថា អ្នកនិពន្ធនៅកម្ពុជាខ្វះខាតការចំណាយក្នុងការបោះពុម្ភ និងការលើកទឹកចិត្តជាដើម ប៉ុន្តែបើមានការលើកទឹកចិត្តដល់អ្នកសរសេរ និងអ្នកនិពន្ធអាចធ្វើឲ្យវិស័យមួយនេះកើនឡើងផងដែរ។ លោក កាញារីទ្ធ ក៏បានបរិច្ចាគថវិកាផ្ទាល់ខ្លួនចំនួន ១ពាន់ដុល្លាផងដែរ។
គួរបញ្ជាក់ថា ពិព័រណ៍សៀវភៅឆ្នាំនេះ មានស្ដង់ចូលរួមប្រមាណ៦៥ ស្ដង់ ដែលកើនឡើងជាងឆ្នាំកន្លងទៅ ដោយមានតែ៥០ស្ដង់ប៉ុណ្ណោះ។ ដោយឡែក ក្នុងកម្មវិធីពិព័រណ៍សៀវភៅនេះ មានសៀវភៅរាប់ម៉ឺនក្បាល ដែលគ្រឺះស្ថានបោះពុម្ភផ្សាយ និងស្ថាប័នហើយ បានចុះឈ្មោះចូលរួមពិព័រណ៍សៀវភៅក្នុងឆ្នាំនេះ។ ម្យ៉ាងវិញទៀត អ្នកចូលរួមក៏អាចទស្សនាកម្មវិធីកម្សាន្តជាច្រើនដូចជា ការសម្ដែងរឿងខ្លី ល្ខោន និងចម្រៀង រួមទាំងកម្មវិធីកុមារផងដែរ៕
Tag:
ពិព័រណ៍សៀវភៅ
ខៀវ កាញារីទ្ធ
© រក្សាសិទ្ធិដោយ thmeythmey.com
