ជាតិ
អំពើហិង្សាលើកុមារនៅភូមិឃុនរាម ក្នុងខេត្តសៀមរាប ថយចុះ ក្រោយមានជំនួយរបស់EU
×
សៀមរាប៖ អាជ្ញាធរនៅក្នុងភូមិ ឃុនរាម ឃុំ ឃុនរាម ស្រុកបន្ទាយស្រី ខេត្តសៀមរាប និងអង្គការដែលធ្វើការទាក់ទងនឹងការការពារកុមារនៅក្នុងតំបន់នេះ បានឲ្យដឹងថា ស្ថានភាពភាពអំពើហិង្សាចំពោះកុមារនៅក្នុងភូមិនេះ បានកាត់បន្ថយប្រមាណ ៣០ ភាគរយ មកដល់បច្ចុប្បន្ននេះ។ អំពើហិង្សានៅក្នុងភូមិនេះ ថយចុះ ក្រោយពីអង្គការ Plan សហការជាមួយអាជ្ញាធរ ចុះពន្យល់ប្រជាជន ដោយមានការឧបត្ថមពីសហភាពអឺរ៉ុប។
មេឃុំ ឃុនរាម លោក ជូ សយ បានថ្លែងថា នៅក្នុងភូមិឃុនរាមនេះ ពីមុនមកសំបូរករណីអំពើហិង្សាលើកុមារ តែក្នុងរយៈពេលប៉ុន្មានឆ្នាំចុងក្រោយនេះ អំពើហិង្សាលើកុមារ ត្រូវបានកាត់បន្ថយច្រើន បន្ទាប់ពីមានការចុះពន្យល់ពីអង្គការ Plan អន្តរជាតិ ក្រោមជំនួយរបស់សភាពអឺរ៉ុប។ « យើងខ្ញុំពិតជាត្រេកអរខ្លាំងណាស់ ដែលនៅក្នុងភូមិ ឃុំ របស់ខ្ញុំ មិនសូវមានអំពើហិង្សាលើកុមារច្រើនដូចពីមុន»។ នេះជាការបញ្ជាក់របស់លោក ជូន សយ នៅចំពោះមុខលោកឯកអគ្គរដ្ឋទូតសហភាពអឺរ៉ុបប្រចាំកម្ពុជា លោក George Edgar ក្នុងអំឡុងពេលដែលលោកមន្ត្រីទូតរូបនេះ ចុះពិនិត្យមើលការអនុវត្តគម្រោងជាក់ស្តែងនៅក្នុងភូមិឃុនរាម ឃុំឃុនរាម ស្រុកបន្ទាយស្រី កាលពីថ្ងៃទី ២៩ ខែវិច្ឆិកា។
ភូមិឃុនរាម ឃុំឃុនរាម ស្រុកបន្ទាយស្រីមានប្រជាជនរស់នៅចំនួន ១,៧២៣ គ្រួសារ។ ភូមិនេះស្ថិតនៅ ចម្ងាយប្រហែល ៤៦ គីឡូម៉ែត្រ ខាងជើងក្រុងសៀមរាប ។ អ្នកភូមិជាង ៣០ ភាគរយ រស់នៅក្រោមបន្ទាត់ ក្រីក្រ។ ជាងនេះទៅទៀត ប្រជាជននៅភូមិនេះ ត្រូវបានកាត់ផ្តាច់ពីសង្គម រួមជាមួយនឹងការផ្តល់សេវាសង្គមមិន គ្រប់គ្រាន់ នៅតែជាមូលហេតុសំខាន់នៃភាពងាយរងគ្រោះរបស់កុមារចំពោះពលកម្មកុមារ ការជួញដូរ និងការកេងប្រវ័ញ្ចផ្លូវភេទ។
ដើម្បីធានាថា កុមារទាំងអស់ទទួលបានសិទ្ធិរបស់ខ្លួន និងត្រូវបានការពារពីអំពើហិង្សាគ្រប់ទម្រង់ក្នុងគ្រប់មជ្ឈដ្ឋាន សហភាពអឺរ៉ុបបានផ្តល់ដល់អង្គការផ្លែនអន្តរជាតិនូវមូលនិធិចំនួន ១,៥ លាន អឺរ៉ូ ដើម្បីអនុវត្តគម្រោងមួយ ដែលមានរយៈពេលបីឆ្នាំស្តីពី «ការលើកកម្ពស់សហគមន៍កុមារមេត្រីតាមរយៈការបង្កើតប្រព័ន្ធជាតិការពារកុមារនៅប្រទេសកម្ពុជា»នៅខេត្តសៀមរាប និងខេត្តត្បូងឃ្មុំ។ ភូមិឃុនរាមគឺជាតំបន់អនុវត្តគម្រោងមួយ ដែលទទួលបានអត្ថប្រយោជន៍ពីការគាំទ្រនេះ។ បើតាមសេចក្តីប្រកាសព័ត៌មានរបស់សហភាពអឺរ៉ុប។
សេចក្តីប្រកាសព័ត៌មានដដែលបន្តថា ចាប់តាំងពីពេលគម្រោងបានចាប់ផ្តើមនៅឆ្នាំ ២០១៤ អាជ្ញាធរមូលដ្ឋានក្នុងភូមិឃុនរាមបានដឹងពីរបៀបឆ្លើយតបឲ្យបានត្រឹមត្រូវទៅនឹងអំពើហិង្សាក្នុងគ្រប់ទម្រង់ទៅលើកុមារ។ លើសពីនេះទៀត ក្រុមសហគមន៍ដែលរួមមាន ក្រុមឪពុកម្តាយ ក្រុមជិតស្និទ្ធ និងក្លិបកុមារត្រូវបានបង្កើតឡើងរួមគ្នាដោយគម្រោង និងអាជ្ញាធរមូលដ្ឋាន ដើម្បីធានាថា កុមារគ្រប់រូបត្រូវបានការពារយ៉ាងល្អប្រសើរ។ ជាលទ្ធផល ករណីអំពើហិង្សាទៅលើកុមារត្រូវបានកាត់បន្ថយរហូតដល់ ៣០% បើប្រៀបធៀបនឹងទិន្នន័យមូលដ្ឋាន។
លោក ទី សុវណ្ណារី អ្នកឯកទេសផ្នែកសិទ្ធកុមារប្រចាំប្រទេសនៃអង្គការផ្លែនអន្តរជាតិកម្ពុជា បានមានប្រសាសន៍ថា អរអំណរគុណដល់សហភាពអឺរ៉ុបដែលបានផ្តល់ឲ្យយើងនូវការគាំទ្រផ្នែកហិរញ្ញវត្ថុដើម្បីអនុវត្តគម្រោងនេះ។ លោក បន្តថា គម្រោងនេះអនុញ្ញាតឲ្យអង្គការរបស់លោក កសាងសមត្ថភាពរបស់សហគមន៍មូលដ្ឋានរួមបញ្ចូល ទាំងកុមារ និងអាជ្ញាធរមូលដ្ឋានដើម្បីធ្វើការងារជាមួយគ្នា ក្នុងការធ្វើអន្តរាគមន៍ និងឆ្លើយតបចំពោះអំពើ ហិង្សាគ្រប់ទម្រង់ទៅលើកុមារ។ លើសពីនេះទៀត គម្រោងនេះក៏ត្រូវបានទទួលស្គាល់ផងដែរ នៅក្នុងផែនការសកម្មភាពជាតិអភិវឌ្ឍន៍កុមារ ៣ ឆ្នាំដំបូង ដែលផ្តល់ការណែនាំច្បាស់លាស់ដល់ស្ថាប័នរដ្ឋាភិបាលអំពីរបៀបលើកកម្ពស់សិទ្ធិកុមារ និងដោះស្រាយរាល់ការរំលោភសិទ្ធិកុមារនៅក្នុងប្រទេស កម្ពុជា។
លោក George EDGAR ឯកអគ្គរដ្ឋទូតសហភាពអឺរ៉ុបប្រចាំប្រទេសកម្ពុជា បានមានប្រសាសន៍ថា រូបលោកពិតជាសប្បាយចិត្ត នៅពេលដែលទទួលបានព័ត៌មានថា អត្រានៃអំពើហិង្សានៅក្នុងភូមិនេះ ត្រូវបានកាត់បន្ថយ បន្ទាប់ពីអង្គការPlan បានអនុវត្តគម្រោងក្រោមជំនួយរបស់សហភាពអឺរ៉ុប។ « ហើយអ្វីដែលកាន់តែពិសេសសម្រាប់ខ្ញុំនោះ នៅពេលដែលខ្ញុំបានចុះមកមើលផ្ទាល់ និងបានស្តាប់មតិយោបល់ ព័ត៌មានពីសំណាក់ប្រជាជនផ្ទាល់នៅក្នុងភូមិនេះអំពីស្ថានភាពជាក់ស្តែង ដែលវាប្រសើរជាងខ្ញុំអង្គុយតែនៅក្នុងការិយាល័យ»។ នេះជាការបញ្ជាក់របស់លោកឯកអគ្គរដ្ឋទូត។
Tag:
ភូមិឃុនរាម
កុមារ
© រក្សាសិទ្ធិដោយ thmeythmey.com