ជាតិ
សេដ្ឋកិច្ច
×![]()
ភ្នំពេញ៖ រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន ជំរុញឲ្យក្រុមហ៊ុនឯកជន និងក្រុមកសិករ ធ្វើកិច្ចសន្យាកសិកម្ម (Farming Contact) ដោយមានភាគីរដ្ឋចូលរួម ដើម្បីឲ្យការលក់ស្រូវរបស់កសិករបានប្រសើរឡើង។ ស្របគ្នានេះដែរ ក្រុមហ៊ុន AMRU RICE ដែលកំពុងអនុវត្តកិច្ចសន្យាជាមួយកសិករបានបង្ហាញពីជោគជ័យនេះ។
បើតាម លោក វេង សាខុន អនុក្រឹត្យស្ដីពីកិច្ចសន្យាកសិកម្ម ត្រូវបង្កើតឡើងតាំងពីឆ្នាំ២០១១ ប៉ុន្តែការចុះកិច្ចសន្យារវាងក្រុមហ៊ុន និងសហគមន៍កសិកម្ម នៅតែមានចំនួនតិចតួច។ លោកបានថ្លែងក្នុងកិច្ចប្រជុំដោះស្រាយបញ្ហាស្រូវអង្ករនៅទីស្ដីការក្រសួងកសិកម្ម នៅថ្ងៃទី៣០ខែវិច្ឆិកាយ៉ាងដូច្នេះថា៖« មានគេផ្ដើមធ្វើខ្លះហើយ ប៉ុន្តែកន្លងទៅមានការភ័យខ្លាច ព្រោះអត់មានភាគីទីបី ពិសេសរដ្ឋាភិបាលជួយធ្វើសាក្សី»។
កិច្ចសន្យាកសិកម្ម គឺជាការសហការរវាងក្រុមហ៊ុនដែលវិនិយោគលើវិស័យកសិកម្ម និងក្រុមកសិករ ដែលភាគីទាំងពីរនឹងធ្វើការជាមួយគ្នាលើការងារជ្រើសរើសពូជ ការដាំដុះ និងការធានាទីផ្សារលក់កសិផល។ ចំពោះការកំណត់តម្លៃកសិផល លោក វេង សាខុន ប្រាប់ដូច្នេះថា៖«តម្លៃ ស៊ីសងភាគីទាំងពីរឯកភាពគ្នា។ ទាល់តែគេនិយាយត្រូវគ្នាហើយ បានយើង (ភាគីរដ្ឋ) ជួយសម្របសម្រួល ផ្សំផ្គុំឲ្យគេ»។
លោក សុង សារ៉ន អគ្គនាយកក្រុមហ៊ុន AMRU RICE បានថ្លែងប្រាប់សារព័ត៌មានថ្មីៗថា ក្រុមហ៊ុនលោកកំពុងអនុវត្តកិច្ចសន្យាកសិកម្មជាមួយកសិករចំនួន ១៨សហគមន៍នៅខេត្តព្រះវិហារ ដើម្បីដាំស្រូវសរីរាង្គ។ តាមកិច្ចសន្យា ដែលមានភាគីរដ្ឋចូលរួមនេះ ក្រុមហ៊ុនលោកធានាទិញស្រូវពីកសិករផ្អែកតាមតម្លៃទីផ្សារ និងបូកបញ្ចូលតម្លៃបន្ថែម។ បើតាមលោក សុង សារ៉ន AMRU RICE កំពុងទិញស្រូវផ្ការំដួលពីសហគមន៍ទាំងនោះ ក្នុងតម្លៃពី ១២០០រៀល ទៅ ១៥០០រៀល (តម្លៃនៅស្រែ) ក្នុង១គីឡីក្រាម អាស្រ័យគុណភាពស្រូវ។
លោក សុង សារ៉ន បញ្ជាក់ថា ការចុះកិច្ចសន្យាជាមួយកសិករ គេមិនអាចចែងពីតម្លៃថេរបានទេ ដែលនឹងនាំឲ្យក្រុមហ៊ុនបរាជ័យ។ លោកថ្លែងដូច្នេះថា៖«បើកំណត់តម្លៃថេរ ខ្ញុំជឿថា ការបរាជ័យខ្ពស់ណាស់ ព្រោះពេលទំនិញបានថ្លៃ កសិករលក់ឲ្យអ្នកផ្សេងហើយ តែបើតម្លៃចុះវិញកសិករសម្រុកលក់ឲ្យក្រុមហ៊ុន។ ក្រុមហ៊ុនបើធ្វើម៉ូដែលណឹង ដឹងបរាជ័យក្នុងស្ថានភាពទីផ្សារសព្វថ្ងៃ»។
តើក្រុមហ៊ុនអាចចាំទិញស្រូវពីកសិករពេលប្រមូលផលតែម្ដង ដោយមិនបាច់ធ្វើកិច្ចសន្យា បើក្រុមហ៊ុនបម្រុងនឹងទិញស្រូវពីកសិករលើសតម្លៃទីផ្សារដដែល?
«គេមិនជឿទេ! (អ្នកបញ្ជាទិញ)។ ការកំណត់តម្លៃគ្រាន់តែជារឿងមួយ តែសំខាន់បំផុតត្រូវការបណ្ដុះបណ្ដាល ការចូលរួមអនុវត្តគម្រោង ធ្វើជាមួយគ្នា។ ក្រុមហ៊ុនត្រូវចុះមើលកសិករជាប់រហូត»។ នេះការលើកឡើងរបស់ លោក សុង សារ៉ន មុននឹងលោកបន្តថា៖«បើក្រុមហ៊ុនចាំទិញថ្លៃ គ្មាននិរន្តរភាពទេ សួរថាទិញថ្លៃ លក់ឲ្យអ្នកណា?។ យើងត្រូវមានសូចនាករ មានរបាយការណ៍ឲ្យគេមើល។
អគ្គនាយកក្រុមហ៊ុន AMRU RICE រូបនេះអះអាងបន្តទៀតថា៖« ក្រុមហ៊ុនខ្ញុំអាចទិញថ្លៃ ព្រោះក្រុមហ៊ុន មានស្ដង់ដារសិទ្ធិមនុស្ស ស្ដង់ដារសរីរាង្គ និងស្ដង់ដារបរិស្ថានជាដើម»។ បើតាម លោក សារ៉ន ទីផ្សារអង្ករសរីរាង្គមានភាពរឹងមាំ បើធៀបនឹងទីផ្សារអង្ករទូទៅ។
បើតាមការអះអាងរបស់កសិករ និងរោងម៉ាស៊ីនកិនស្រូវ ទីផ្សារស្រូវផ្ការំដួល (ស្រូវសើម) សព្វថ្ងៃមានតម្លៃ ពី៩០០រៀល ទៅ ៩៥០រៀល ក្នុង១គីឡីក្រាម ដែលធ្លាក់ថ្លៃជាងរដូវប្រមូលផលឆ្នាំមុនដែលកសិករអាចលក់បានក្នុងតម្លៃពី ១១០០រៀល ទៅ១២០០រៀល៕
Tag:
ស្រូវអង្ករ
សុង សារ៉ន
© រក្សាសិទ្ធិដោយ thmeythmey.com
