រដ្ឋមន្ត្រីកសិកម្ម ចង់អញ្ជើញអ្នកពាក់ព័ន្ធវិស័យកសិកម្ម មកជជែកលើបញ្ហាប្រឈមក្នុងវិស័យមួយនេះ

ជាតិ

សេដ្ឋកិច្ច

រដ្ឋមន្ត្រីកសិកម្ម ចង់អញ្ជើញអ្នកពាក់ព័ន្ធវិស័យកសិកម្ម មកជជែកលើបញ្ហាប្រឈមក្នុងវិស័យមួយនេះ

05, Dec 2016 , 8:24 am

រូបភាព

រូបភាពពីក្រសួងកសិកម្ម

ដោយ:

លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ចង់អញ្ជើញសហគមន៍នានា ដែលពាក់ព័ន្ធនឹងវិស័យកសិកម្ម ព្រៃឈើ និងនេសាទ មកជជែកលើបញ្ហាប្រឈមរបស់សហគមន៍ និងរួមគ្នារកដំណោះស្រាយ។

ការបង្ហាញឆន្ទៈហៅអ្នកពាក់ព័ន្ធមកពិភាក្សាលើវិស័យកសិកម្មរបស់រដ្ឋមន្ត្រីក្រសួងកសិកម្មរូបនេះ ធ្វើឡើងក្នុងកិច្ចប្រជុំដោះស្រាយបញ្ហាស្រូវអង្ករ នៅទីស្ដីការក្រសួងកសិកម្ម នៅថ្ងៃទី៣០ ខែវិឆ្ឆិកា។ លោក វេង សាខុន ថ្លែងយ៉ាងដូច្នេះថា៖«ចំពោះខ្ញុំ ខ្ញុំចង់អញ្ជើញសហគមន៍ព្រៃឈើ សហគមន៍នេសាទ ហើយនិងសហគមន៍កសិកម្មទាំងអស់ មកជួបជុំគ្នា ដោយលើកអ្វីខ្លះ ដែលគាត់ប្រឈម ហើយយើងទាំងអស់គ្នារួមដោះស្រាយ»។

ក្រៅពីចង់ដោះស្រាយបញ្ហាប្រឈមរបស់សហគមន៍ លោក វេង សាខុន ក៏បង្ហាញឆន្ទៈកែលម្អវិស័យកសិកម្មទាំងមូល ដែលស្ថិតក្រោមការទទួលខុសត្រូវរបស់លោក ដោយលោកលើកឡើងយ៉ាងដូចនេះថា៖«យើងត្រូវបើកទូលាយ បើមិនដូច្នេះទេ យើងនៅស្រង៉ំម្នាក់ឯង គឺថាល្អរហូត»។

ការបង្ហាញបំណងរបស់រដ្ឋមន្ត្រីកសិកម្ម ដើម្បីលើកកម្ពស់វិស័យកសិកម្មនៅពេលនេះ គឺធ្វើឡើងបន្ទាប់ពីក្រសួងកសិកម្ម តែងទទួលរងការរិះគន់ពីមជ្ឈដ្ឋាននានា និងកាត្អូញត្អែររបស់កសិករ ជុំវិញវិស័យកសិកម្មនេះ។

វិស័យកសិកម្ម ត្រូវបានរដ្ឋាភិបាលចាត់ទុកជាវិស័យអាទិភាពក្នុងការអភិវឌ្ឍសេដ្ឋកិច្ចជាតិ។យ៉ាងណាមិញ ភាពរីកចម្រើននៃវិស័យនេះ បានទាញឲ្យជាប់ពាក់ព័ន្ធដល់ស្ថាប័នរដ្ឋជាច្រើនទៀត មានជាអាទិ៍ ក្រសួងពាណិជ្ជកម្ម ក្រសួងធនធានទឹក និងឧតុនិយម ក្រសួងសាធារណការ និងដឹកជញ្ជូន ស្ថាប័នផ្នែកហិរញ្ញវត្ថុ និងស្ថាប័នផ្នែកថាមពល៕