ជាតិ
បុណ្យចំបើង ដែលត្រូវបានរៀបចំកន្លងមកនៅខេត្តបន្ទាយមានជ័យ។ រូបថត TVK
×![]()
សៀមរាប៖ បុណ្យស្រូវ និងចំបើង លើកទី២ ដែលជាកិច្ចសហប្រតិបត្តិការរៀបចំដោយកម្ពុជា និងកូរ៉េ គ្រោងនឹងរៀបចំធ្វើនៅខែកុម្ភៈ ឆ្នាំ២០១៧ខាងមុខ។ រដ្ឋមន្ត្រីក្រសួងទេសចរណ៍ លោក ថោង ខុន បានបញ្ជាក់ថា គណៈកម្មការរៀបចំកំពុងជ្រើសរើសទីតាំង២កន្លែងនៅក្នុងខេត្តសៀមរាបសម្រាប់រៀបចំពិធីថ្មីមួយនេះ។
បុណ្យស្រូវ និងចំប៉ើង ដែលលោករដ្ឋមន្ត្រីក្រសួងទេសចរណ៍ ថោង ខុន ចាត់ទុកថាជាផលិតផលថ្មីមួយទៀត សម្រាប់ខេត្តសៀមរាប។ លោករដ្ឋមន្ត្រីរំពឹងថា ពិធីបុណ្យនេះនឹងអាចទាក់ទាញភ្ញៀវទេសចរកាន់តែច្រើនមកទស្សនាខេត្តសៀមរាប។
តាមគម្រោង បុណ្យស្រូវ និងចំបើង គ្រោងធ្វើនៅក្នុងខែកុម្ភៈខាងមុខនេះ។ បុណ្យនេះនឹងបង្ហាញឲ្យភ្ញៀវទេសចរដឹងថា ក្រៅពីប្រាសាទ ខេត្តសៀមរាបនៅមានវិស័យជាច្រើនទៀត រួមមាន កសិ-ទេសចរណ៍ អេកូទេសចរណ៍ សហគមន៍ទេសចរណ៍។ល។ ដែលសុទ្ធសឹងជាទីពេញចិត្តសម្រាប់ភ្ញៀវទេសចរ។ នេះបើតាមប្រសាសន៍របស់លោករដ្ឋមន្ត្រីទេសចរណ៍។
បុណ្យស្រូវ និងចំប៉ើងលើកទី១ ត្រូវបានរៀបចំធ្វើនៅខេត្តបន្ទាយមានជ័យ កាលពីដើមខែមករា ឆ្នាំ២០១៥។ បុណ្យស្រូវលើកទី១ ក្រោមប្រធានបទ «ស្រូវ ជីវិត វប្បធម៌ និងទេសចរណ៍» បានទាក់ទាញភ្ញៀវទេសចរជាច្រើន ជាពិសេសទេសចរក្នុងស្រុក។
គួរបញ្ជាក់ថា ក្នុងបទសម្ភាសដល់អ្នកសារព័ត៌មាន ក្រោយកិច្ចប្រជុំប្រចាំត្រីមាសរវាងក្រសួងទេសចរណ៍ និងវិស័យឯកជននៅថ្ងៃទី១២ ធ្នូ លោក ថោង ខុន បានឲ្យដឹងដែរថា គិតត្រឹមរយៈពេល១០ខែចុងឆ្នាំ២០១៦នេះ ប្រទេសកម្ពុជាទទួលបានតួលេខភ្ញៀវទេសចរជិត៤លាននាក់ ហើយរំពឹងថា នឹងកើនដល់ប្រមាណ៥លាននាក់ក្នុងរយៈពេល២ខែទៀត៕
Tag:
ថោង ខុន
បុណ្យស្រូវ
បុណ្យចំប៉ើង
© រក្សាសិទ្ធិដោយ thmeythmey.com
