កម្ពុជាបានពានរង្វាន់អន្តរជាតិពីអង់គ្លេសលើការងារសុវត្ថិភាពចរាចរណ៍

ជាតិ

កម្ពុជាបានពានរង្វាន់អន្តរជាតិពីអង់គ្លេសលើការងារសុវត្ថិភាពចរាចរណ៍

14, Dec 2016 , 4:37 pm

រូបភាព

ដោយ: ថ្មីៗ

សម្តេចឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោក បានទទួលពានរង្វាន់ Prince Michael International Road Safety Awards កាលពីថ្ងៃទី១៣ ខែធ្នូ នៅទីក្រុងឡុងដ៍ ចក្រភពអង់គ្លេស។

ពានរង្វាន់ Prince Michael International Road Safety Awards ត្រូវផ្តួចផ្តើមឡើងដោយព្រះអង្គម្ចាស់ Michael ដែលជាប្អូនជីដូនមួយរបស់ម្ចាស់ក្សត្រិយ៍អេលីហ្សាបែតទី២ នៃចក្រភពអង់គ្លេស។ ការផ្តល់ពានរង្វាន់នេះដល់កម្ពុជា ដោយសារតែមានការវាយតម្លៃខ្ពស់លើការងាររបស់គណៈកម្មាធិការជាតិសុវត្ថិភាពចរាចរណ៍ផ្លូវគោក (Cambodia National Road Safety Committee) ក្នុងការងារអប់រំ និងលើកកម្ពស់សុវត្ថិភាពចរាចរណ៍ផ្លូវគោក។

យោងតាម AKP សម្តេច ស ខេង បានមានប្រសាសន៍ថា ការទទួលពានរង្វាន់នេះគឺ បានមកពីការខិតខំ ប្រឹងប្រែងរួមគ្នាពីគ្រប់មជ្ឈដ្ឋាន ក្នុងនោះ មានការប្តេជ្ញាចិត្តរបស់រាជរដ្ឋាភិបាល ការខិតខំរបស់មន្ត្រី អនុវត្តន៍ច្បាប់ និងការចូលរួមរបស់ប្រជាពលរដ្ឋ អង្គការជាតិ អន្តរជាតិ ដែលទទួលបានជោគជ័យ ក្នុងការចូលរួមកាត់បន្ថយចំនួនអ្នកស្លាប់ និងអ្នករបួសដោយគ្រោះថ្នាក់ចរាចរណ៍ ក្នុងឆ្នាំ២០១៦នេះ។

ការខិតខំរឹតបន្តឹងការអនុវត្តច្បាប់ស្តីពីចរាចរណ៍ផ្លូវគោក រយៈពេល១១ខែ ឆ្នាំ២០១៦ បានធ្វើឱ្យមានការថយចុះគ្រោះថ្នាក់ចរាចរណ៍ចំនួន៤៥១លើក ចំនួនអ្នកស្លាប់ថយចុះ ២៥៩នាក់ របួសថយចុះចំនួន៥៩៦នាក់ ប្រៀបធៀបឆ្នាំ២០១៥។កតា្ដទាំងអស់នេះហើយ ដែលជាលក្ខណៈវិនិច្ឆ័យ ក្នុងការទទួលបានពានរង្វាន់នេះ៕

ប្រភពរូបភាព Roadsafetyawards