ជាតិ
CDC ក្រើនរំលឹកដល់ពលរដ្ឋប្រុងប្រយ័ត្នជំងឺផ្ដាសាយបក្សីប្រភេទថ្មី ដែលកើតលើមនុស្ស ![](https://image.thmeythmey.com/pictures/2017/01/05/cdc.jpg)
×![]()
ភ្នំពេញ៖ នាយកដ្ឋានប្រយុទ្ធនឹងជំងឺឆ្លង CDC នៃក្រសួងសុខាភិបាល បានចេញសេចក្ដីណែនាំក្រើនរំលឹក ស្ដីពីការបង្ការ ការពារជំងឺផ្ដាសាយបក្សីលើមនុស្ស។ ជំងឺផ្ដាសាយបក្សីប្រភេទថ្មី បានសម្លាប់មនុស្សជាច្រើននាក់ នៅក្នុងប្រទេសចិន តែសម្រាប់កម្ពុជា មិនទាន់មានករណីជំងឺផ្ដាសាយបក្សីប្រភេទថ្មីនោះទេ។ នេះបើតាមសេចក្ដីណែនាំរបស់ CDC។
បច្ចុប្បន្ននេះ នៅក្នុងប្រទេសកម្ពុជា មិនទាន់មានករណីជំងឺផ្ដាសាយបក្សីប្រភេទ H7N9 និង H5N6 នៅឡើយទេ ប៉ុន្តែចាប់ពីឆ្នាំ២០០៥ រហូតដល់ឆ្នាំ២០១៤ កម្ពុជា ធ្លាប់មានករណីជំងឺផ្ដាសាយបក្សីប្រភេទ H5N1 ចំនួន ៥៦ ករណី ក្នុងនោះ ៣៧ ករណីបានស្លាប់។ ដោយឡែក នាពេលបច្ចុប្បន្ន កម្ពុជា មិនទាន់មានករណីជំងឺផ្ដាសាយបក្សីប្រភេទ H7N9 និង H5N6ក៏ដោយ តែប្រជាពលរដ្ឋគ្រប់រូបត្រូវតែថែរក្សា ការពារសុខភាពពីការចម្លងរោគ ជាពិសេសពលរដ្ឋដែលមានបំណងទៅក្រៅប្រទេស នារដូវបុណ្យចូលឆ្នាំចិន និងឆ្នាំខ្មែរ ខាងមុខនេះ។
បើផ្អែកតាម CDC បានបញ្ជាក់ថា ការរាលដាលនៃជំងឺផ្ដាសាយបក្សីថ្មីប្រភេទ H5N6 លើសត្វបក្សី ដែលបានបណ្ដាលឲ្យមានការសំលាប់សត្វបក្សីប្រមាណជិត ២០ លានក្បាលនៅប្រទេសកូរ៉េខាងត្បូង និងប្រទេសជប៉ុន។ ជាមួយគ្នានេះ នៅប្រទេសចិន មានរបាយការណ៍ពីករណីជំងឺផ្ដាសាយបក្សីលើមនុស្សដែលបង្កដោយវីរុសផ្ដាសាយបក្សីប្រភេទ H7N9 ចំនួន ៨០៧ នាក់ គិតក្នុងរយៈពេលពីឆ្នាំ២០១៣ ដល់ ២០១៦។
ដើម្បីបង្ការជំងឺផ្ដាសាយប្រភេទថ្មី ប្រជាពលរដ្ឋគួរមានការប្រុងប្រយ័ត្ន ដោយចៀសវាងការធ្វើដំណើរ ទៅកាន់ប្រទេស ឬទីកន្លែង ដែលស្គាល់ ឬដឹងថាមានករណីផ្ដាសាយបក្សី។ ជាពិសេស ការចូលទៅកន្លែងចិញ្ចឹមសត្វ ឬប៉ះពាល់ និងប្រលាក់ដោយលាមកសត្វ។ បន្ថែមលើនេះ ត្រូវលាងដៃឲ្យបានញឹកញាប់ជាមួយសាប៊ូ និងទឹកស្អាត ដោយប្រកាន់ខ្ជាប់នូវការអនុវត្តអនាម័យ និងចំណីអាហារដែលមានសុវត្ថិភាព។
គួរបញ្ជាក់ថា វីរុសជំងឺផ្ដាសាយបក្សី ជាធម្មតាចរាចរក្នុងចំណោមបសុបក្សី ដែលមានវីរុសនេះរួមមាន H5N1, H5N6, H7N3, H7N7,H7N9 និងH9N2 ដែលអាចឆ្លងទៅមនុស្ស និងនាំឲ្យមានជំងឺផ្ដាសាយបក្សី។ សព្វថ្ងៃនេះ ដោយសារតែវីរុសនៅតែបន្តចរាចរគ្មានដែនកំណត់ វាជាក្ដីកង្វល់ចំពោះសុខភាពសាធារណៈនៅក្នុងប្រទេស តំបន់ និងក្នុងសកលលោក។
ជាមួយគ្នានេះ រោគសញ្ញាជំងឺផ្ដាសាយបក្សី មានចាប់ពីគ្រុនផ្ដាសាយធម្មតាទៅជាជំងឺផ្លូវដង្ហើមធ្ងន់ធ្ងរ ហើយអ្នកជំងឺភាគច្រើនដែលមានការឆ្លងវីរុសនេះ មានជំងឺរលាកសួតធ្ងន់ធ្ងរ។ រោគសញ្ញាទូទៅរួមមាន គ្រុនក្ដៅលើសពី ៣៨,៥ អង្សា ក្អក និងពិបាកដកដង្ហើម ដែលអាចស្លាប់បាន។ ជំងឺផ្ដាសាយបក្សីប្រភេទ H5N1 H7N9 និងH5N6 គ្មានវ៉ាក់សាំងសម្រាប់ការពារទេ ចំណែកការព្យាបាលជំងឺ គឺមានការប្រើថ្នាំប្រឆាំងវីរុសគ្រុនផ្ដាសាយ ដែលអាចមានប្រសិទ្ធភាព ជាមួយការព្យាបាលរោគសញ្ញាផងដែរ៕
Tag:
សុខភាព
ផ្ដាសាយបក្សី
© រក្សាសិទ្ធិដោយ thmeythmey.com