ជាតិ
តូបអាជីវករខ្មែរមួយនៅផ្សាររុងក្លឿឆេះ ដោយសារអ៊ុតខោអាវប្រហែស
× ភ្នំពេញ៖ អគ្គិភ័យបានលេបត្របាក់តូបលក់កាបូបរបស់អាជីវករខ្មែរក្នុងផ្សាររុងក្លឿចំនួន១តូប ទាំងស្រុង និងតូបលក់អីវ៉ាន់១តូបទៀត រងការឆាបឆេះតិចតួច នៅថ្ងៃទី៥ មករា។ នេះបើតាម ការផ្សាយរបស់អគ្គស្នងការដ្ឋាននគរបាលជាតិ។
អគ្គស្នងការនគរបាលជាតិ បានផ្សាយឲ្យដឹងថា អាជ្ញាធរខេត្តស្រះកែវ ប្រទេសថៃ បានប្រើពេលប្រមាណ ១ម៉ោងកន្លះ និងរថយន្តពន្លត់អគ្គិភ័យប្រមាណ ១០គ្រឿង ទើបអាចអន្តរាគមន៍ពន្លត់អគ្គិភ័យទាំងស្រុង។
នគរបាលជាតិស្រង់សេចក្តីរាយការណ៍ពីសមត្ថកិច្ចប្រចាំច្រកអន្តរជាតិប៉ោយប៉ែត ផ្អែកតាមការស្រាវជ្រាវរបស់អាជ្ញាធរថៃ ឱ្យដឹងនៅថ្ងៃនេះថា មូលហេតុនាំឲ្យមានអគ្គិភ័យ ព្រោះអាជីករខ្មែរម្ចាស់តូបជួរអក្សរ C បានអ៊ុតខោអាវ ហើយគេមិនបានដកឆ្នាំងអ៊ុតចេញពីលើខោអាវ ទើបឆាបឆេះ នៅព្រឹកថ្ងៃទី ៥ មករា តែម្តង។ តាមនគរបាលជាតិ អគ្គិភ័យខាងលើ បង្កឱ្យខូចខាតទ្រព្យសម្បត្តិរបស់អាជីករខ្មែររងគ្រោះ ឈ្មោះ ស្រី អូន ភេទស្រី អាយុ៣៨ឆ្នាំ រស់នៅក្រុងប៉ោយប៉ែត ខេត្តបន្ទាយមានជ័យ អស់រាប់ម៉ឺនដុល្លារ។ ប៉ុន្តែ វាពុំបង្កឱ្យមានអ្នករងរបួស ឬបាត់បង់អាយុជីវិតឡើយ។
តាមប្រភពដដែល រយៈពេលជាង១ឆ្នាំកន្លងទៅ អគ្គិភ័យបានឆេះតូបអាជីវករខ្មែរនៅផ្សាររុងក្លឿទឹកដីថៃចំនួន៣លើកមកហើយនាំខួចខាតទ្រព្យសម្បត្តិរាប់សែនដុល្លារ។ ប៉ុន្តែម្ចាស់ផ្សារ ឬរដ្ឋាភិបាលថៃពុំដែលជួយដោះស្រាយសំណងខូចខាតនោះទេ ស្របពេលអាជីវករខ្មែរបានបង់ពន្ធឲ្យម្ចាស់ផ្សារ និងរដ្ឋថៃបានត្រឹមត្រូវ៕
ផ្សាររុងក្លឿស្ថិតក្នុងស្រុកអារញ្ញ ខេត្តស្រះកែវ ជាប់ច្រកព្រំដែនអន្តរជាតិប៉ោយប៉ែត ខេត្តបន្ទាយមានជ័យ៕
Tag:
អាជីវករ
ផ្សាររុងក្លឿ
បន្ទាយមានជ័យ
ស្រះកែវ
© រក្សាសិទ្ធិដោយ thmeythmey.com