ជាតិ
ការលុកលុយចូល (hack) វ៉ិបសាយ គ.ជ.ប បណ្តាលឲ្យមានក្តីបារម្ភអំពីការបោះឆ្នោត ![](https://image.thmeythmey.com/pictures/2017/01/05/nec.jpg)
×![]()
ភ្នំពេញ៖ អ្នកនាំពាក្យរបស់គណៈកម្មាធិការជាតិរៀបចំការបោះឆ្នោត(គ.ជ.ប) និយាយថា ការលុកលុយ ចូលទៅក្នុងវ៉ិបសាយ ដែលផ្សព្វផ្សាយបញ្ជីឈ្មោះបោះឆ្នោត ពីសំណាក់ក្រុមហែកឃើ (Hacker)មិនប៉ះពាល់ដល់បញ្ជីឈ្មោះបោះឆ្នោត និងទិន្នន័យផ្សេងៗនោះទេ។ ប៉ុន្តែ អ្នកឃ្លាំមើលការរៀបចំដំណើរការបោះឆ្នោតនៅកម្ពុជា បានចាត់ទុកការលួចចូលទៅកាន់គេហទំព័របែបនេះ គឺជាបញ្ហាដ៏ធំ ដែលអាចប៉ះពាល់ដល់ការបោះឆ្នោតនាពេលខាងមុខ។
ក្រោយវ៉ិបសាយ www.voterlist.org.kh ត្រូវបានដាក់ឲ្យដំណើរការ សាធារណជនបានរអ៊ូរទាំ ហើយសារព័ត៌មានមួយចំនួន ក៏បានចុះផ្សាយពីការលំបាកក្នុងការចូលទៅស្វែករកឈ្មោះ។ គ.ជ.ប ក៏បាន ប្រកាសថា មូលហេតុដែលគេហទំព័រនេះ ដំណើរទៅដោយរអាក់រអួល គឺដោយសារតែ ក្រុម Hacker លួចចូលទៅកាន់ ដើម្បីបង្កការរំខានណាមួយ។
លោក សម គន្ធាមី នាយកប្រតិបត្តិនៃគណៈកម្មាធិការអព្យាក្រឹត និងយុត្តិធម៌ដើម្បីបោះឆ្នោតដោយសេរី និងត្រឹមត្រូវនៅកម្ពុជា (NICFEC) និយាយថាលោកព្រួយបារម្ភយ៉ាងខ្លាំងពីសុវត្ថិភាពនៃការរក្សាបញ្ជីឈ្មោះបោះឆ្នោត បន្ទាប់ពីឮថា មានការលុកលុយចូល (Hacking) វ៉ិបសាយ www.voterlist.org.kh ដែលគ.ជ.ប ទើបនឹងបង្កើតឡើងដើម្បីផ្សព្វផ្សាយបញ្ជីឈ្មោះបោះឆ្នោតថ្មី។ លោក សម គន្ធាមី និយាយថា ការហែកចូលនេះ អាចនឹងប៉ះពាល់ដល់បញ្ជីឈ្មោះបោះឆ្នោត ហើយធ្វើឲ្យការបោះឆ្នោតថ្នាក់ឃុំ-សង្កាត់ ក៏ដូចជាការបោះឆ្នោតថ្នាក់ជាតិ នាពេលខាងមុខ ដំណើរទៅដោយខុសប្រក្រតី។
លោក បញ្ជាក់ដូច្នេះថា៖«ខ្ញុំព្រួយបារម្ភមែនទែន។ វាអាច មានបញ្ហាឈ្មោះរបស់ប្រជាពលរដ្ឋ ដូចជាការបាត់ឈ្មោះ ឬក៏ខុសឈ្មោះ ជាដើម។ បើបញ្ជីឈ្មោះមានបញ្ហា ការបោះឆ្នោត ក៏អាចមានបញ្ហាដែរ»។
គ.ជ.ប បានបិទផ្សាយបញ្ជីឈ្មោះបោះឆ្នោតដំបូង នៅតាមសាលាឃុំ-សង្កាត់ នៅទូទាំងប្រទេស ដែលដំណើរទៅពីថ្ងៃទី៣ ដល់ថ្ងៃទី១៤ ខែមករា ឆ្នាំ២០១៧។ បញ្ជីឈ្មោះបោះឆ្នោត ក៏ត្រូវបានបង្ហោះលើគេហទំព័រ www.voterlist.org.kh ផងដែរ។
ទាក់ទងនឹងបញ្ហានេះ លោក ហង្ស ពុទ្ធា អ្នកនាំពាក្យរបស់គ.ជ.ប បានបញ្ហាក់ថា ការលួចចូលទៅកាន់គេហទំព័រ ពីសំណាក់ក្រុម Hacker មិនបានបង្កផលប៉ះពាល់ដល់បញ្ជីឈ្មោះបោះឆ្នោតនោះទេ។ អ្នកនាំពាក្យដដែល បានអះអាងថា ក្រោយបញ្ហានេះកើតឡើងភ្លាម ក្រុមបច្ចេករបស់គ.ជ.ប ក៏ខ្នះខ្នែងដោះស្រាយយ៉ាងឆាប់រហ័ស ដើម្បីឲ្យគេហទំព័រ ដំណើរទៅជាធម្មតាវិញ។
លោក បន្តទៀតថា គ.ជ.ប ថែមទាំងសហការជាមួយនឹងក្រុមហ៊ុនអ៊ីនធើណិតផងដែរ ដើម្បីធ្វើយ៉ាងណាឲ្យគេហទំព័រខាងលើ ដើរលឿនជាងមុន នៅពេលដែលប្រជាពលរដ្ឋចូលទៅរកឈ្មោះរបស់ពួកគាត់។ លោក ហង្ស ពុទ្ធា បានប្រាប់សារព័ត៌មានថ្មីៗយ៉ាងខ្លីថា៖«ឥឡូងហ្នឹង លែងអីហើយ ។ គេហទំព័រ ដើរវិញហើយ»។
លោក ហង្ស ពុទ្ធា មិនបានបញ្ជាក់ថា ពួក Hacker នោះ នៅប្រទេសណាឡើយ ហើយលោក ក៏មិនទាន់ដឹងច្បាស់ថា ពួកគេ លួចចូលទៅកាន់គេហទំព័រនេះ ក្នុងគោលបំណងអ្វីឲ្យពិតប្រាកដ ដែរ។ បើតាមលោក ហង្ស ពុទ្ធា គ.ជ.ប នឹងសហការជាមួយនឹងសមត្ថកិច្ច ដើម្បីស្វែងជនល្មើស យកមកដោះស្រាយតាមផ្លូវច្បាប់។
បញ្ហាខាងលើនេះ ក៏ត្រូវបានលោក ហង្ស ពុទ្ធា លើកឡើងនៅក្នុងកិច្ចប្រជុំជាមួយនឹងភាគីពាក់ព័ន្ធផងដែរ នៅថ្ងៃទី៥ មករានេះ។ គ.ជ.ប បានបើកកិច្ចប្រជុំមួយ ជាមួយភាគីពាក់ព័ន្ធនានា ដើម្បីពិគ្រោះយល់បល់ លើសេចក្តីព្រាងស្តីពី បទបញ្ជា និងនីតិវិធីសម្រាប់ការបោះឆ្នោតជ្រើសរើសក្រុមប្រឹក្សា ឃុំ-សង្កាត់ ឆ្នាំ២០១៧។ កិច្ចប្រជុំនេះ មានរយៈពេលដល់ទៅ២ថ្ងៃ គឺចាប់ពីថ្ងៃ ទី៥ ដល់ថ្ងៃទី៦ ខែមករា ឆ្នាំ២០១៧ នៅ ដោយមានអ្នកចូលរួមប្រមាណជា៣០០នាក់៕
Tag:
គជប
សម គន្ធាមី
បោះឆ្នោត
© រក្សាសិទ្ធិដោយ thmeythmey.com