ភ្នំពេញ៖ អង្គភាពប្រឆាំងអំពើពុករលួយ (ACU) នឹងបង្កើតការិយាល័យប្រឆាំងអំពើពុករលួយក្នុងរាជធានីខេត្តប៉ូលសេដ្ឋកិច្ចចំនួន ៣ ជាលើកដំបូង ក្នុងឆ្នាំ ២០១៧នេះ ដើម្បីប្រឆាំងអំពើពុករលួយនៅថ្នាក់ក្រោមជាតិ។
លោកទេសរដ្ឋមន្ត្រី ឱម យ៉ិនទៀង ប្រធាន ACU បានបង្ហើបឲ្យដឹងថា រាជធានីខេត្តចំនួន ៣ ដែលនឹងមានការិយាល័យប្រឆាំងអំពើពុករលួយ និងមន្ត្រីប្រចាំការផ្ទាល់ ក្នុងឆ្នាំថ្មី ជាលើកដំបូង រួមមាន រាជធានីភ្នំពេញ ខេត្តព្រះសីហនុ និងខេត្តសៀមរាប។
មន្ត្រីជាន់ខ្ពស់របស់រដ្ឋាភិបាលរូបនេះ បន្តប្រាប់ក្រុមអ្នកសារព័ត៌មានថា មន្ត្រី ACU តាមការិយាល័យរាជធានីខេត្តមានតួនាទីដូចអង្គភាព ACU ទីស្នាក់ការកណ្តាល គឺពួកគេមានតួនាទីអប់រំ បង្ការទប់ស្កាត់ ទទួលពាក្យបណ្តឹង និងអធិការកិច្ចរួច ធ្វើសំណុំរឿងបញ្ជូនទៅតុលាការ តែលើកលែងករណីទំនាក់ទំនងជាមួយអន្តរជាតិ។
លោកទេសរដ្ឋមន្ត្រីដែលចង់ឲ្យរូបវន្តបុគ្គល និងនិតីបុគ្គលទុកចិត្តលើការងារប្រឆាំងអំពើពុករលួយរូបនេះ បានប្រាប់ពីមូលហេតុដែល ACU ជ្រើសរើសរាជធានីខេត្តទាំង ៣ ចំណោម ២៥មុនគេ ពីព្រោះវាស្ថិតក្នុងតំបន់សេដ្ឋកិច្ចដែលមានអ្នកវិនិយោគចាយវាយថវិកាច្រើន។
ក្រោយបញ្ចប់ពិធីសាទរទិវាបុណ្យជាតិ ៧មករា និងទិវាជាតិ-អន្តរជាតិប្រឆាំងអំពើពុករលួយ ៩ធ្នូ នៅថ្ងៃទី៦ ខែមករា ក្នុងសាលាតិចណូ លោកនិយាយដូច្នេះថា៖«យើងបានសិក្សាពិសោធន៍ការងាររយៈពេល ៣ឆ្នាំកន្លងមកនេះ តើបទល្មើសណាខ្លះ បានកើតឡើងដូចម្តេច? ស្ថាប័នណាខ្លះកើតច្រើន ឬណាខ្លះកើតតិច? ហើយ យើងត្រូវសិក្សាវិធានការថ្មីទៀត ឧទាហរណ៍ ការប្រឆាំងនឹងការលាងសម្អាតប្រាក់ដែលជាកិច្ចការមួយថ្មី សំខាន់ដែលទាមទារធ្វើក្នុងឆ្នាំ២០១៧ឲ្យបានល្អ»។
លោក ឱម យ៉ិនទៀង បានលើកករណីប្រឆាំងអំពើពុករលួយតូចមួយដែលក្រុមហ៊ុនក្នុងតំបន់សេដ្ឋកិច្ច ប្តឹងឲ្យអង្គភាព ACU ស៊ើបអង្កេតដូច្នេះថា៖«ក្រុមហ៊ុនតំបន់សេដ្ឋកិច្ចខ្លះ គេយឺតឯកសារតែ ៦ម៉ោងទេណា គឺគាត់ប្តឹងមកយើង (ACU) ថាគាត់យឺតឯកសារ ៦ម៉ោង ឲ្យខ្ញុំដោះស្រាយ ហើយការដោះស្រាយមិនត្រូវឲ្យមានផលទំនាស់ដល់គាត់វិញទៀត។ តើខ្ញុំត្រូវធ្វើយ៉ាងម៉េច? ខ្ញុំបានបើកអធិការកិច្ច ហើយយើងសុំពិនិត្យមើលបញ្ជីកត់ត្រាការងារចេញចូលចំនួនប្រាំថ្ងៃមុន ទើបយើងដឹងរឿង ដូច្នេះយើងអាចដោះស្រាយជូនគាត់ដោយមិនប៉ះពាល់គាត់ (អ្នកប្តឹង)»។
ក្រៅពីការដាក់ការិយាល័យប្រឆាំងអំពើពុករលួយតាមរាជធានីខេត្តប៉ូលសេដ្ឋកិច្ចសំខាន់ៗ ប្រធានស្ថាប័នប្រឆាំងអំពើពុករលួយជាតិ បានបង្ហើបទៀតថា ACU នឹងដាក់ការិយាល័យតាមខេត្តដែលមានច្រកទ្វារព្រំដែនអន្តរជាតិ ដូចជា ស្វាយរៀង បន្ទាយមានជ័យ បាត់ដំបង កំពង់ចាម និងព្រៃវែងទៀត ដើម្បីប្រឆាំងអំពើពុករលួយតាមច្រកព្រំដែនជាបន្តបន្ទាប់។
ទន្ទឹមគ្នានឹងបង្កើតការិយាល័យប្រឆាំងអំពើពុករលួយនៅថ្នាក់ក្រោមជាតិ លោកថា ACU នឹងរើសមន្ត្រីជំនាញនគរបាលយុត្តិធម៌ជាង ២០០នាក់ទៀត បន្ថែមលើមន្ត្រីដែលមានជាង ៥០០នាក់ស្រាប់ ដើម្បីឆ្លើយតបតម្រូវការការងារប្រឆាំងអំពើពុករលួយថ្មីខាងលើ ក្នុងឆ្នាំ២០១៧ ។
លោកទេសរដ្ឋមន្ត្រី ជឿជាក់ថា ការបង្ខិតការិយាល័យប្រឆាំងអំពើពុករលួយទៅថ្នាក់ក្រោមជាតិ នឹងជំរុញការបោះទុនវិនិយោគផ្ទាល់ពីបរទេស នៅកម្ពុជាថែមទៀត។ ជាក់ស្តែង លោក ឱម យ៉ិនទៀង បង្ហើបឲ្យដឹងថា នាខែមករានេះ លោកនឹងចុះកិច្ចព្រមព្រៀងប្រឆាំងអំពើពុករលួយរវាង ACU ជាមួយនឹងក្រុមហ៊ុនវិនិយោគចិនជាង ២០០ ក្រុមហ៊ុន ជាលើកដំបូង បន្ទាប់ពីក្រុមហ៊ុនអាមេរិក និងអឺរ៉ុបជាង ១០ បានចុះកិច្ចព្រមព្រៀងរួចរាល់ ក្នុងឆ្នាំកន្លងទៅ។
ប៉ុន្តែ លោកទេសរដ្ឋមន្ត្រី ពុំទាន់អាចបញ្ជាក់កាលបរិច្ឆទចាប់ផ្តើមអនុវត្តវិធានការថ្មីឲ្យប្រាកដនោះទេ លោកគ្រាន់តែបញ្ជាក់ថា ACU កំពុងធ្វើផែនការចំណាយថវិកាសម្រាប់ឆ្នាំថ្មី៕