ជាតិ
ប្រធានាធិបតីសិង្ហបុរី ផ្តើមបំពេញទស្សនកិច្ចផ្លូវរដ្ឋនៅកម្ពុជា ![](https://image.thmeythmey.com/pictures/2017/01/08/singapore.jpg)
×![]()
លោក តូនី តាន់ កេងយាំ (Tony Tan Keng Yam) ប្រធានាធិបតីទី៧ នៃសាធារណរដ្ឋសិង្ហបុរី បានមកដល់កម្ពុជាហើយ នៅម៉ោងប្រមាណ ១ រសៀល ថ្ងៃទី ៨ ខែមករានេះ។
លោកប្រធានាធិបតីរូបនេះ បំពេញទស្សនកិច្ចផ្លូវរដ្ឋ រយៈពេល ៤ថ្ងៃ ចាប់ពីថ្ងៃទី ៨ ដល់ ១១ ខែមករា ឆ្នាំ២០១៧ នៅរាជធានីភ្នំពេញ និងខេត្តសៀមរាប។
នៅថ្ងៃទី ៨ ខែមករានេះ
លោក តូនី តាន់ កេងយាំ បានមកដល់កម្ពុជាហើយ។ បើតាមសេចក្តីប្រកាសព័ត៌មានក្រសួងការបរទេស កម្ពុជា អំឡុងពេលបំពេញទស្សនកិច្ចផ្លូវរដ្ឋនៅកម្ពុជារបស់ លោក Tony Tan Keng Yam ដែលតបនឹងការអញ្ជើញរបស់ព្រះបាទសម្តេចព្រះបរមនាថ នរោត្តម សីហមុនី នេះ លោក នឹងចូលក្រាបបង្គំគាល់ព្រះមហាក្សត្រ និងសម្តេចព្រះមហាក្សត្រី នរោត្តម មុនិនាថ សីហនុ នៅព្រះបរមរាជវាំង។
បន្ទាប់មកលោកប្រធានាធិបតីនឹងជួបពិភាក្សាការងារទ្វេភាគីជាមួយសម្តេចនាយករដ្ឋមន្ត្រី ហ៊ុន សែន និងធ្វើជាអធិបតីក្នុងពិធីចុះហត្ថលេខាលើឯកសារចំនួនពីរ។ ឯកសារទាំងពីរនោះ ទី ១ អនុស្សារណៈ ស្តីពី កិច្ចសហប្រតិបត្តិការលើវិស័យអប់រំ បណ្តុះបណ្តាលបច្ចេកទេស និងវិជ្ជាជីវៈ រវាងក្រសួងការងារ និងបណ្តុះបណ្តាលវិជ្ជាជីវៈនៃកម្ពុជា និងវិទ្យាស្ថានអប់រំបច្ចេក ទេសនៃសាធារណរដ្ឋសិង្ហបុរី និងទី២ អនុស្សារណៈរវាងមន្ទីរពេទ្យកាល់ម៉ែត្រនៃកម្ពុជា និងមន្ទីរពេទ្យ Tan Tock Seng នៃសិង្ហបុរី។ នេះបើតាមសេចក្តីប្រកាសព័ត៌មានក្រសួងការបរទេស និងសហប្រតិបត្តិការអន្តរជាតិកាលពីថ្ងៃទី ៤ ខែមករា។
ជាមួយគ្នានេះ សេចក្តីជូនដំណឹងក្រសួងការបរទេសកម្ពុជាដដែល បញ្ជាក់ថា លោកប្រធានាធិបតីសិង្ហបុរី នឹងទៅទស្សនាមន្ទីរពេទ្យកាល់ម៉ែត្រ និងប្រាសាទអង្គរវត្ត នៅខេត្តសៀមរាបផងដែរ។
Tag:
តូនី តាន់ កេងយាំ
សិង្ហបុរី
© រក្សាសិទ្ធិដោយ thmeythmey.com