ជាតិ
គ.ជ.ប ទទួលបណ្តឹងឲ្យលុបអ្នកចុះឈ្មោះបោះឆ្នោតជាង ១ពាន់នាក់ រយៈពេលតែ ៣ថ្ងៃ ![](https://image.thmeythmey.com/pictures/2017/01/17/nec1.jpg)
×![]()
ភ្នំពេញ៖ គណៈកម្មាធិការជាតិរៀបចំការបោះឆ្នោត (គ.ជ.ប) បានទទួលពាក្យបណ្តឹងឲ្យលុបឈ្មោះអ្នកបានចុះឈ្មោះក្នុងបញ្ជីបោះឆ្នោតថ្មីយ៉ាងហោចចំនួន ១១៨៩ នាក់ពីគណបក្សសង្គ្រោះជាតិពីថ្ងៃទី ១៤ ដល់ ១៦ ខែមករា។ នេះបើតាម លោក ហង្ស ពុទ្ធា អ្នកនាំពាក្យ គ.ជ.ប។
បណ្តឹងទាំងនេះ ធ្វើឡើងក្រោយពេល គ.ជ.ប បានបិទផ្សាយបញ្ជីឈ្មោះបោះឆ្នោតបណ្តោះអាសន្ន កាលពីថ្ងៃទី ៣ ដល់ថ្ងៃទី១៤ ខែមករា ដែលផ្តល់ឱកាស ដល់ប្រជាពលរដ្ឋ សម្រាប់ការប្តឹងតវ៉ា ឬប្តឹងជំទាស់។
លោក ហង្ស ពុទ្ធា អ្នកនាំពាក្យគណៈកម្មាធិការជាតិរៀបចំការបោះឆ្នោត បានប្រាប់ ក្រុមអ្នកសារព័ត៌មានថា ក្រុមប្រឹក្សាឃុំសង្កាត់ទូទាំងប្រទេស បានទទួលពាក្យបណ្តឹងចំនួន ១៤១២បណ្តឹង ក្នុងនោះ មានបណ្តឹងតវ៉ាឲ្យកែទិន្នន័យ ចំនួន ៦៥១បណ្តឹង និងបណ្តឹងជំទាស់ស្នើឲ្យមានការលុបឈ្មោះចំនួន ៧៦១បណ្តឹងដែលស្នើឲ្យលុបឈ្មោះអ្នកបោះឆ្នោតចំនួន ១១៨៩នាក់ ចាប់ពីថ្ងៃទី ១៤ ដល់ ១៦ ខែមករានេះ។
រីឯ គ.ជ.ប បានទទួលតែចំនួន ៦៤ បណ្តឹងប៉ុណ្ណោះ។ អ្នកនាំពាក្យរូបនេះ បានប្រាប់ក្រុមអ្នកសារព័ត៌មាន ក្រោយក្រុមប្រឹក្សាជំនុំជម្រះ គ.ជ.ប ប្រកាសរក្សាសេចក្តីសម្រេចរបស់ក្រុមប្រឹក្សាប្រជុំសម្រេចឃុំសង្កាត់លើសំណុំចំនួន ៧ នៅដដែល ជាលើកដំបូង នៅថ្ងៃទី១៦ មករានេះ។
ដើម្បីឲ្យទាន់នីតិវិធីបោះឆ្នោតដែល គ.ជ.ប បានកំណត់រួច លោក ហង្ស ពុទ្ធា បន្តបញ្ជាក់ថា គ.ជ.ប នឹងពិនិត្យបណ្តឹងជំទាស់ពីព្រឹក រហូតដល់ម៉ោង ១២ យប់ ពីនេះតទៅ ។ តាមអ្នកនាំពាក្យ នៅថ្ងៃទី១៧ មករានេះ គ.ជ.ប នឹងបើកសវនាការលើសំណុំរឿងចំនួន ១៦ ហើយ សំណុំរឿង ១៦ទៀត គេនឹងសវនាការនៅថ្ងៃទី១៨ និងនៅថ្ងៃទី១៩ មានសំណុំរឿងចំនួន ២៣ ជាបន្តបន្ទាប់ទៀត។
សវនាការលើបណ្តឹងជំទាស់ទាំងនេះ នឹងធ្វើឡើងរហូតដល់ពេល គជប ផ្តល់សុពលភាព និងប្រកាសផ្សាបញ្ជីបោះឆ្នោតផ្លូវការ នៅថ្ងៃទី១២ ខែកុម្ភៈ ឆ្នាំ២០១៧ ។ លោក ហង្ស ពុទ្ធា បញ្ជាក់ពីប្រតិទិនដែល គ.ជ.ប បានកំណត់។
«គជប ធ្វើការប្រយ័ត្នប្រយែងបំផុតជាមួយស្ថាប័នសញ្ជាតិពាក់ព័ន្ធ ព្រោះអ្នកប្តឹងខ្លះ កត់ទិន្នន័យខុស ខ្លះឈ្មោះខុស ខ្លះខុសលេខអត្តសញ្ញាណបណ្ណ ជាដើម»។ អ្នកនាំពាក្យ និយាយបន្ថែមថា អ្នកប្តឹងជំទាស់ដែលមិនសុខចិត្តនឹងការសម្រេចរបស់ក្រុមប្រឹក្សា គ.ជ.ប អាចបន្តប្តឹងតវ៉ានៅក្រុមប្រឹក្សាធម្មនុញ្ញ រយៈពេល ៥ថ្ងៃ គិតចាប់ពីថ្ងៃគេសម្រេច ហើយក្រុមប្រឹក្សាធម្មនុញ្ញមានពេល ១០ថ្ងៃ ដើម្បីដោះស្រាយសំណុំរឿងបន្តទៀត។
«យើងនឹងបាយទឹកនៅទីនេះ (ទីស្នាក់ការគ.ជ.ប) ទាំងអស់។ យើងធ្វើការរហូតទល់ចប់ករណីបណ្តឹងទាំងអស់ ក្នុងមួយថ្ងៃៗ»។ លោក ហង្ស ពុទ្ធា បញ្ជាក់ពីការងារដោះស្រាយបណ្តឹងជំទាស់នឹងបញ្ជីឈ្មោះបោះឆ្នោត។
កន្លងទៅ លោកស្រី ម៉េង សុភារី ប្រធាននាយកដ្ឋានកិច្ចការបោះឆ្នោត និងនីតិកម្មនៃគណបក្សសង្គ្រោះជាតិ បាននិយាយថា គណបក្សសង្គ្រោះជាតិ បានរកឃើញជនជាតិវៀតណាមប្រមាណ ៥ពាន់នាក់ បានចុះឈ្មោះក្នុងបញ្ជីឈ្មោះបោះឆ្នោតឃុំ-សង្កាត់ ពីខែកញ្ញា ដល់ចុងខែតុលា កន្លងទៅ ។
គួរបញ្ជាក់ផងដែរ ក្រោយបញ្ចប់ការចុះឈ្មោះបោះឆ្នោតថ្មី ប្រជាពលរដ្ឋខ្មែរ ចំនួន ៧,៨៧៣,១៩៤ ស្នើនឹង៨១ភាគរយ បានទៅចុះឈ្មោះបោះឆ្នោត ក្នុងចំណោមប្រជាពលរដ្ឋដែលមានអាយុគ្រប់បោះឆ្នោតចំនួន ៩,៦៦៤,២១៦ លាននាក់។ ចំនួនដែលចុះឈ្មោះបានក្នុងបញ្ជីថ្មីនេះ ថយចុះជិត ២លាននាក់ ធៀបទៅនឹង ៩លាន ២ សែននាក់ដែល គ.ជ.ប បានចុះឈ្មោះសម្រាប់ការបោះឆ្នោតជ្រើសរើសក្រុមប្រឹក្សា ឃុំ-សង្កាត់ កាលពីឆ្នាំ២០១២ ៕
Tag:
ហង្ស ពុទ្ធា
គ.ជ.ប
© រក្សាសិទ្ធិដោយ thmeythmey.com