អន្តរជាតិ
បារាំង និងអាល្លឺម៉ង់ ពួតដៃគ្នារិះគន់ ដូណាល់ ត្រាំ
× ការនិយាយចំៗលើកិច្ចការផ្ទៃក្នុងអាល្លឺម៉ង់ និងការហៅសម្ព័ន្ធយោធាថាជាអង្គការហួសសម័យដោយលោក ដូណាល់ ត្រាំ ធ្វើឲ្យបណ្ដាសមាជិកអឺរ៉ុប និងណាតូ ប្រតិកម្មយ៉ាងខ្លាំង។ បារាំង និងអាល្លឺម៉ង់ ដែលជាបងធំរបស់អឺរ៉ុប ក៏បានរិះគន់ខ្លាំងៗតបនឹងការលើកឡើងរបស់ប្រធានាធិបតីជាប់ឆ្នោតអាមេរិក ដោយបានប្រាប់លោក ត្រាំ វិញថា អឺរ៉ុប នឹងចាត់ចែងវាសនាខ្លួនឯង ហើយអាមេរិក មិនចាំបាច់លូកដៃលូកមាត់ក្នុងកិច្ចការអឺរ៉ុបទៀតដែរ។
អធិការបតីអាល្លឺម៉ង់ អែនជេឡា មឺហ្កែល និងប្រធានាធិបតីបារាំង ហ្វ្រង់ស្វ័រ ហូឡង់ បានឆ្លើយតបយ៉ាងសោះកក្រោះនឹងពាក្យសម្ដីរបស់ប្រធានាធិបតីជាប់ឆ្នោតអាមេរិក ដែលបានបង្កើតភាពមិនច្បាស់លាស់លើទំនាក់ទំនងជាមួយណាតូ និងទំនងជាចង់ដកខ្លួនឈប់គាំទ្រអឺរ៉ុបទៀតនោះ។ លោក ត្រាំ ដែលជិតក្លាយជាប្រធានាធិបតីអាមេរិកទៅហើយនោះ បង្កការខឹងសម្បារយ៉ាងខ្លាំងក្នុងចំណោមសមាជិកអឺរ៉ុប និងណាតូ ជាមួយនឹងការប្រើពាក្យសម្ដីគ្រោតគ្រាតរបស់លោក។
អធិការបតីអាល្លឺម៉ង់ ប្រហែលជាអ្នកដែលមិនសប្បាយចិត្តជាងគេ ដ្បិតលោក ត្រាំ បានវាយប្រហារខ្លាំងលើរដ្ឋាភិបាលលោកស្រីលើរឿងជនភៀសខ្លួន។ លោកស្រី មឺហ្កែល នៅថ្ងៃទី១៦ ខែមករា បានប្រើពាក្យធ្ងន់ៗតបថា អឺរ៉ុប នឹងក្ដោបក្ដាប់អនាគតខ្លួនឯងផ្ទាល់ មិនចាំបាច់មាននរណាមកជួយឡើយ។ លោកស្រីបន្តថា ជាថ្មីម្ដងទៀត លោក ត្រាំ បានបង្ហាញជំហររបស់លោក ដែលគ្រប់គ្នាបានដឹងរួចស្រេចទៅហើយ តែលោកស្រីផ្ទាល់ ក៏មានជំហររបស់ខ្លួនឯង ហើយអ្នករាល់គ្នាក៏ដឹងពីជំហរនេះដែរ។
បើតាមសារព័ត៌មាន BBC ប្រធានាធិបតីបារាំង ហ្វ្រង់ស្វ័រ ហូឡង់ វិញ ក៏កើតទុក្ខមិនសុខចិត្តដោយសារសម្ដីប្រធានាធិបតីជាប់ឆ្នោតអាមេរិកដែរ និងបានប្រាប់ឲ្យលោក ត្រាំ ថា អឺរ៉ុបមិនត្រូវការដំបូន្មានពីអ្នកក្រៅឡើយ។ ថ្លែងក្នុងពិធីបំពាក់មេដាយឲ្យអគ្គរដ្ឋទូតអាមេរិកនៅថ្ងៃទី១៦ ខែមករា លោក ហូឡង់ បញ្ជាក់ច្បាស់ថា អឺរ៉ុបត្រៀមខ្លួនរូចរាល់ក្នុងការចូលរួមក្នុងកិច្ចសហប្រតិបត្តិការអន្តរអាត្លង់ទិក តែអឺរ៉ុប មិនចង់បានការណែនាំពីអ្នកដទៃឡើយ។
ក្នុងបទសម្ភាសន៍ជាមួយសារព័ត៌មានមកពីអង់គ្លេស និងអាល្លឺម៉ង់ លោក ត្រាំ បានអះអាងថា លោកស្រីអធិបការបតី អែនជេឡា មឺហ្កែល បង្កើតកំហុសឆ្គងមួយដ៏គ្រោះថ្នាក់រហូតបង្កឲ្យមានផលប៉ះពាល់ច្រើនដល់អឺរ៉ុប។ លោក បានបន្ទោសលោកស្រី អធិការបតីអាល្លឺម៉ង់ ដែលហ៊ានបើកទ្វារព្រំដែនទទួលយកជនភៀសខ្លួនកន្លងមករហូតបង្កឲ្យមានជាវិបត្តិ បញ្ហាអសន្តិសុខ និងជំរុញឲ្យប្រជាជនអង់គ្លេសបោះឆ្នោតចាកចេញពីសហភាពអឺរ៉ុបផង។
បន្ថែមពីលើនោះ រដ្ឋមន្ត្រីការបរទេសអាល្លឺម៉ង់ Frank-Walter Steinmeier អះអាងដែរថា ទាំងអឺរ៉ុប និងណាតូ សុទ្ធតែព្រួយបារម្ភជុំវិញការលើកឡើងរបស់ប្រធានាធិបតីជាប់ឆ្នោតអាមេរិក ដូណាល់ ត្រាំ ដែលមានជំហរដកខ្លួនឆ្ងាយពីអឺរ៉ុប និងងាកទៅរកភាពជិតស្និទ្ធជាមួយរុស្ស៊ីវិញនោះ។ លោក ត្រាំ ក៏បានរិះគន់សម្ព័ន្ធយោធាណាតូ និងសមាជិកសម្ព័ន្ធយោធានេះយ៉ាងខ្លាំងនាពេលកន្លងមក ជាពិសេសការមិនបង់ថ្លៃចំណាយរបស់ណាតូតែម្ដង៕
© រក្សាសិទ្ធិដោយ thmeythmey.com