ជាតិ
គ.ជ.ប ច្រានចោលបណ្តឹងឲ្យលុបឈ្មោះអ្នកចុះឈ្មោះក្នុងបញ្ជីបោះឆ្នោតថ្មីចំនួន ១៨១នាក់
× ភ្នំពេញ៖ ប្រធានក្រុមប្រឹក្សាជំនុំជម្រះគណៈកម្មាធិការជាតិរៀបចំការបោះឆ្នោត (គ.ជ.ប) បានច្រានចោលបណ្តឹងគណបក្សសង្គ្រោះជាតិដែលស្នើឲ្យលុបឈ្មោះអ្នកចុះឈ្មោះក្នុងបញ្ជីបោះឆ្នោតថ្មីចំនួន ១៨១នាក់ ក្នុងសំណុំរឿងចំនួន ៧ មកពី ៥ រាជធានីខេត្ត ជាលើកទីមួយ។
លោក ស៊ិក ប៊ុនហុក ប្រធានក្រុមប្រឹក្សាជំនុំជម្រះ គ.ជ.ប បានប្រកាសរក្សាសេចក្តីសម្រេចរបស់ក្រុមប្រឹក្សាប្រជុំសម្រេចឃុំសង្កាត់ នៅដដែល ក្រោយពីសនវការពិនិត្យសំណុំរឿងទាំង ៧ អស់ពេញមួយកាលពី ថ្ងៃទី១៦ ខែមករា។
ប្រធានក្រុមប្រឹក្សាជំនុំជម្រះរូបនេះ បានបញ្ជាក់ថា តំណាងដើមបណ្តឹងគណបក្សសង្គ្រោះជាតិ ដែលលើកឡើងថា ជនជាតិវៀតណាមមានឈ្មោះក្នុងបញ្ជីបោះឆ្នោតថ្មីនោះ ពុំឈរមូលដ្ឋានច្បាប់ត្រឹមត្រូវ។
លោកប្រកាសសេចក្តីសម្រេចបែបនេះ តបនឹងបណ្តឹងរបស់តំណាងគណបក្សសង្គ្រោះជាតិ ដែលបានប្រាប់ក្រុមប្រឹក្សាជំនុំជម្រះថា ពួកគេរកឃើញជនជាតិវៀតណាមមានអត្តសញ្ញាណបណ្ណសញ្ជាតិខ្មែរ បានចុះឈ្មោះក្នុងបញ្ជីបោះឆ្នោត ក្នុងការិយាល័យចុះឈ្មោះបោះឆ្នោតតាមមូលដ្ឋានពួកគេ។
លោក ស៊ិក ប៊ុនហុក បានអានសេចក្តីប្រកាសមួយៗខ្លាំងៗថា ការលើកឡើងរបស់ភាគីដើម បណ្តឹងមកពីគណបក្សសង្គ្រោះជាតិ មិនបានឈរលើគោលការណ៍ច្បាប់ឡើយ ដោយហេតុថា អ្នកចុះឈ្មោះក្នុងបញ្ជីបោះឆ្នោតទាំងនោះសុទ្ធតែមានអត្តសញ្ញាណបណ្ណសញ្ជាតិខ្មែរដែល ចេញដោយអាជ្ញាធរក្រសួងមហាផ្ទៃស្របច្បាប់។
ទន្ទឹមគ្នាដែរ លោកបានប្រកាសបើកផ្លូវឲ្យដើមបណ្តឹងដែលមិនព្រមទទួលយកសេចក្តីសម្រេច គ.ជ.ប អាចមានសិទ្ធិប្តឹងតវ៉ាបន្តទៅក្រុមប្រឹក្សាធម្មនុញ្ញរយៈពេល ៥ថ្ងៃយ៉ាងយូរ តាមច្បាប់។
ចំពោះការស្នើឲ្យស៊ើបអង្កេតជនបរទេសដែលទទួលអត្តសញ្ញាណបណ្ណសញ្ជាតិខ្មែរ លោក ស៊ិក ប៊ុនហ៊ុក បានបញ្ជាក់ថា គ.ជ.ប ពុំមែនជាអាជ្ញាធរអនុវត្តរឿងនេះទេ។
នេះគឺជាលើកដំបូងហើយ ដែលក្រុមប្រឹក្សាជំនុំជម្រះគណៈកម្មាធិការជាតិរៀបចំការបោះឆ្នោត បានបើកសវនាការលើសំណុំរឿងចំនួន ៧ មកពីរាជធានីខេត្តចំនួន ៥ ដែលគណបក្សសង្គ្រោះជាតិរៀបចំឡើង។ CNRP រកឃើញថា ជនជាតិវៀតណាមជាង ១០០នាក់នោះ បានចុះឈ្មោះក្នុងបញ្ជីឈ្មោះបោះឆ្នោតថ្មី តាមការិយាល័យមួយចំនួន រាជធានីខេត្តទាំង ៥ មាន រាជធានីភ្នំពេញ កំពង់ស្ពឺ ប៉ៃលិន កំពង់ឆ្នាំង និងខេត្តព្រះសីហនុ។
ប៉ុន្តែ ក្រោយការផ្ទៀងផ្ទាត់ជាមួយក្រសួងមហាផ្ទៃ គ.ជ.ប បញ្ជាក់ថា ពួកគេបានបំពេញតាមច្បាប់ត្រឹមត្រូវ៕
Tag:
ស៊ិក ប៊ុនហុក
គ.ជ.ប
បោះឆ្នោត
© រក្សាសិទ្ធិដោយ thmeythmey.com