ជាតិ
ព្រឹទ្ធសភាសម្ពោធអគារជំនួយចិនមួយខ្នងដែលមានតម្លៃជាង ៣លានដុល្លារ ![](https://image.thmeythmey.com/pictures/2017/01/20/senate.jpg)
×![]()
ភ្នំពេញ៖ ព្រឹទ្ធសភា បានបើកសម្ពោធអគារមួយខ្នង កម្ពស់ ៣ជាន់ ដែលជាជំនួយរដ្ឋាភិបាលចិនមានតម្លៃទឹកប្រាក់ចំនួន ២២,២០០,០០០យ័ន ស្មើនឹង ៣,៣៤៣,៣៧៥ ដុល្លារអាមេរិក នៅថ្ងៃទី២០ ខែមករានេះ ។
លោក អ៊ុំ សារឹទ្ធ អគ្គលេខាធិការព្រឹទ្ធសភា បានរាយការណ៍អំពី ដំណើរការសាងសង់អគារខុទ្ទកាល័យថ្នាក់ដឹកនាំព្រឹទ្ធសភាថា អគារខុទ្ទកាល័យថ្នាក់ដឹកនាំព្រឹទ្ធសភា១ខ្នងនេះ មានកម្ពស់ ៣ជាន់ មានទំហំ ១,៥០០ ម៉ែត្រការ៉េ ក្នុងនោះ រួមមាន ការបំពាក់សម្ភារ ឧបករណ៍អេឡិចត្រូនិក សម្ភារការិយាល័យ និងជណ្តើរយន្ត ដែលមានទឹកប្រាក់ចំនួន២២,២០០,០០០ យ័ន ស្មើនឹង៣,៣៤៣,៣៧៥ ដុល្លារអាមេរិក។
តាម លោក អ៊ុំ សារឹទ្ធ អគារនេះត្រូវបានសង់ឡើងដោយក្រុមហ៊ុនចិនចាប់ពីដើមខែមករា ឆ្នាំ២០១៦ រហូតបញ្ចប់ទៅតាមកិច្ចសន្យា នៅចុងខែ ធ្នូឆ្នាំ២០១៦ ក្រោមគោលការណ៍ពីរដ្ឋាភិបាលនៃប្រទេសចិន និងកម្ពុជា។
លោក ស្យុង ប៉ ឯកអគ្គរដ្ឋទូតចិនប្រចាំកម្ពុជា បានចាត់ទុកអង្គនីតិបញ្ញត្តិរួមចំណែកមួយយ៉ាងសំខាន់ តាមរយៈការផ្លាស់ប្តូរទស្សនកិច្ច និងទំនាក់ទំនងគ្នាទៅវិញទៅមករវាងសភា និងថ្នាក់ដឹកនាំរដ្ឋាភិបាលប្រទេសទាំងពីរ ដើម្បីផ្លាស់ប្តូរបទពិសោធន៍នៃការគ្រប់គ្រងនយោបាយ ការគ្រប់គ្រងប្រទេស ការបណ្តុះបណ្តាលធនធានមនុស្ស និងពង្រីកកិច្ចសហប្រតិបត្តិការលើគ្រប់វិស័យកាន់តែស៊ីជម្រៅ។
«សាធារណរដ្ឋប្រជាមានិតចិន និងព្រះរាជាណាចក្រកម្ពុជា គឺជាអ្នកជិតខាងប្រកបដោយមិត្តភាពជាប្រពៃណី និងជាដៃគូសហប្រតិបត្តិការយុទ្ធសាស្ត្រគ្រប់ជ្រុងជ្រោយ»។ លោក ស្យុង ប៉ បញ្ជាក់។
សម្តេច សាយ ឈុំ ប្រធានព្រឹទ្ធសភា បានសន្យាប្រើប្រាស់រាល់ជំនួយចិនឲ្យប្រកបដោយស្មារតីទទួលខុសត្រូវខ្ពស់ ហើយខិតខំបន្តពូនជ្រុំនូវទំនាក់ទំនង និងកិច្ចសហប្រតិបត្តិការដ៏ល្អជាប្រពៃណីជាង២ពាន់ឆ្នាំរវាងប្រទេស និងប្រជាជនយើងទាំងពីរកម្ពុជា-ចិន ឲ្យកាន់តែរឹងមាំថែមទៀត។
ប្រធានព្រឹទ្ធសភាសង្ឃឹមថា រដ្ឋាភិបាលចិននឹងបន្តជួយជាបន្តបន្ទាប់ទៀតដល់ព្រឹទ្ធសភា ជាពិសេស ការគាំទ្រក្នុងការជួយកសាងអគារសាលប្រជុំពេញអង្គថ្មីមួយ នាពេលខាងមុខ ដើម្បី តបនឹងតម្រូវការចាំបាច់ចំពោះមុខ និងយូរអង្វែងនៅក្នុងដំណើរការកសាងកម្ពុជាជានីតិរដ្ឋ ស្មើសិទ្ធិស្មើមុខជាមួយរដ្ឋដទៃនៅក្នុងក្របខ័ណ្ឌតំបន់ និងពិភពលោក។
តាមរបាយការណ៍លោក អ៊ុំ សារឹទ្ធ ចាប់តាំងពីឆ្នាំ១៩៩៩ រហូតមកដល់បច្ចុប្បន្ន ព្រឹទ្ធសភា បានទទួលជំនួយពីសាធារណរដ្ឋប្រជាមានិតចិនចំនួន ១៤លើក ស្មើនឹងទឹកប្រាក់សរុបចំនួន ១៥,៩១៥,២៣៥,១៤ ដុល្លារអាមេរិក៕
![](https://image.thmeythmey.com/pictures/2017/01/20/thumb2/senate1.jpg)
![](https://image.thmeythmey.com/pictures/2017/01/20/thumb2/senate.jpg)
Tag:
សាយ ឈុំ
ស្យុង ប៉
ព្រឹទ្ធសភា
ចិន
© រក្សាសិទ្ធិដោយ thmeythmey.com