អន្តរជាតិ
នយោបាយអន្តរជាតិ
របបសឹកថៃ បដិសេធសំណើដែល«ចង់ឲ្យយោធាសន្យាថាមិនធ្វើរដ្ឋប្រហារតទៅទៀត» ![លោកឧបនាយករដ្ឋមន្ត្រី និងជារដ្ឋមន្ត្រីការពារជាតិថៃ (ប្រភពរូបភាព៖ Chiangrai Times)](https://image.thmeythmey.com/pictures/2017/01/20/thai1.jpg)
លោកឧបនាយករដ្ឋមន្ត្រី និងជារដ្ឋមន្ត្រីការពារជាតិថៃ (ប្រភពរូបភាព៖ Chiangrai Times)
×![]()
រដ្ឋាភិបាលរបបសឹកថៃ បានច្រានសំណើរបស់បក្សនយោបាយ ដែលទទូចឲ្យយោធា ចូលរួមជាមួយនឹងបក្សនយោបាយនៅក្នុងកិច្ចព្រមព្រៀងអនុស្សារណៈយោគយល់ស្តីពីការផ្សះផ្សារជាតិ ដោយឲ្យក្រុមយោធា ត្រូវសន្យាថា នឹងមិនធ្វើរដ្ឋប្រហារទៀតនោះ។ ការច្រានចោលនេះ ដោយរបបសឹក អះអាងថា យោធា គ្មានបំណងធ្វើរដ្ឋប្រហារអ្វីឡើយ ប្រសិនបើប្រទេស ស្ថិតនៅក្នុងស្ថានភាពល្អនោះ។
លោកឧបនាយកមន្ត្រី និងជាប្រធានគណៈកម្មការនៃកិច្ចព្រមព្រៀងផ្សះផ្សារជាតិ Prawit Wongsuwon បានប្រតិកម្ម និងច្រានចោលសំណើដែលចង់ឲ្យយោធាចូលរួមចុះហត្ថលេខាជាមួយនឹងបក្សនយោបាយក្នុងការមិនធ្វើរដ្ឋប្រហារយោធាទៀតនោះ។ លោកឧបនាយករដ្ឋមន្ត្រី បានពន្យល់យ៉ាងដូច្នេះថា៖«យោធា មិនចាំបាច់ចុះហត្ថលេខា(លើកិច្ចព្រមព្រៀងផ្សះផ្សារជាតិ)នោះទេ។ ខ្ញុំ ចង់បញ្ជាក់អ្នកថា គ្មាននរណាម្នាក់(យោធា) ចង់ធ្វើរដ្ឋប្រហារនោះទេ លើកលែងតែប្រទេស ស្ថិតនៅក្នុងស្ថានភាពអាក្រក់ និងខ្វះការយោយល់គ្នា»។ នេះបើយោងតាមការចុះផ្សាយរបស់សារព័ត៌មានបាងកកប៉ុស្តិ៍នៅថ្ងៃទី១៩ មករា។
លោកឧបនាយករដ្ឋមន្ត្រី និងជារដ្ឋមន្ត្រីការពារជាតិផងដែរនោះ ក៏បានថ្លែងទៅកាន់អ្នកសារព័ត៌មានទៀតថា រដ្ឋប្រហារយោធាអាចធ្វើទៅបាន ក៏លុះត្រាតែមានការគាំទ្រពីប្រជាជនផងដែរ។ សម្រាប់លោក ក៏ទទួលស្គាល់ដែលថា រដ្ឋប្រហារយោធា ក៏មិនមានអ្វីល្អដែរ ដោយលោកបន្ថែមទៀតថា លោក មិនប្រកាន់ឡើយប្រសិន មាននរណាម្នាក់មកកាន់តំណែងលោកនោះ។ លោក សង្កត់ធ្ងន់ថា៖«មិនចាំបាច់មានការភ័យខ្លាចពីរដ្ឋប្រហារឡើយ ប្រសិនបើមិនមានការគាំទ្រឲ្យធ្វើពីប្រជាជននោះ»។ នេះបើយោងប្រភពព័ត៌មានដដែលនោះ។
ប្រតិបកម្មរបស់ប្រធានគណៈកម្មការរូបនេះ ធ្វើឡើងបន្ទាប់ពី អតីតរដ្ឋមន្ត្រីការបរទេស Kasit Piromya ដែលចេញពីបក្សប្រជាធិបតេយ្យ និងអតីតសមាជិកសភានៃបក្សភឿថៃ Worachai Hema បានស្នើឲ្យលោក បញ្ចូលយោធានៅក្នុងភាគីនៃកិច្ចព្រមព្រៀងផ្សះផ្សា ពិសេសនោះ ឲ្យយោធា សន្យាថា នឹងមិនធ្វើរដ្ឋប្រហារយោធាទៀតនោះ។ គិតចាប់ពីឆ្នាំ១៩៣២នៃការផ្លាស់របបដឹកនាំមក ថៃធ្លាប់រងនូវរដ្ឋប្រហារយោធាដោយជោគជ័យ១២លើកមកហើយ។
សូមបញ្ជាក់ផងដែរថា រដ្ឋាភិបាលរបបសឹកថៃ គ្រោងបង្កើតកិច្ចព្រមព្រៀង ឬបទបញ្ជាថ្មីមួយ ដោយទាមទារឲ្យមានការចុះហត្ថលេខាពីគណបក្សនយោបាយ និងអង្គការពាក់ព័ន្ធ។ បទបញ្ជាថ្មីនេះ ធ្វើឡើងក្នុងគោលដៅដើម្បីកសាងទំនុកចិត្ត និងផ្សះផ្សាជាតិ និងជាពិសេសនោះ ដើម្បីធានាឲ្យបានថា គណបក្សនយោបាយ មិនត្រូវរំខានការបោះឆ្នោតនាពេលអនាគត ឬបង្កើតចលនាប្រឆាំងរដ្ឋាភិបាលដែលកើតចេញពីការបោះឆ្នោតដែរនោះ។
នៅថ្ងៃទី១៧ មករាកន្លងទៅ លោកនាយករដ្ឋមន្ត្រី ប្រាយុទ្ធ នាឱកាសសង្ខេបព័ត៌មានប្រចាំសប្តាហ៍ បានពន្យល់ពីផែនការលម្អិតនៃការបង្កើតកិច្ចព្រមព្រៀងផ្សះផ្សារជាតិយ៉ាងដូច្នេះថា៖« បទបញ្ជានោះ គឺជាកិច្ចព្រមព្រៀងដែលផ្តល់ការទុកចិត្តដល់សង្គម ដែលក្រោមបទបញ្ជានេះ អ្នកត្រូវតែធ្វើអ្វីដែលអ្នកនិយាយ។ ឧទាហរណ៍នោះ (តាមរយៈកិច្ចព្រមព្រៀង) យើង នឹងមិនបង្កើតឲ្យមានជម្លោះទៀតនោះទេ, យើង នឹងមិនរំខានការបោះឆ្នោតនាពេលអនាគត ហើយ យើង នឹងទទួលរដ្ឋាភិបាលដែលចេញពីការបោះឆ្នោត»។
រដ្ឋាភិបាលរបបសឹក ដែលមានលោកឧត្តមសេនីយ៍ប្រាយុទ្ធ ចន្ទ អូចា ជាប្រមុខ បានឡើងកាន់អំណាចបន្ទាប់ពីលោក បានធ្វើរដ្ឋប្រហារទម្លាក់អតីតនាយករដ្ឋមន្ត្រីថៃ លោកស្រី យីងឡាក់ ស៊ីនណាវ៉ាត់ត្រា នៅថ្ងៃទី២២ ខែឧសភា ឆ្នាំ២០១៤ ក្រោមហេតុផលថារដ្ឋបាលរបស់លោកស្រី ធ្វើឲ្យសង្គមថៃ ត្រូវបែកបាក់ និងបែងចែកនិន្នាការនយោបាយ។ ក្នុងរដ្ឋបាលរបស់លោកឧត្តមសេនីយ៍ ប្រាយុទ្ធ លោក បានសន្យាផ្សះផ្សាជាតិឡើងវិញ តាមរយៈការបង្កើតរដ្ឋធម្មនុញ្ញថ្មី និងច្បាប់ពាក់ព័ន្ធមួយចំនួន រួមទាំងរៀបចំឲ្យមានការបោះឆ្នោតនៅចុងឆ្នាំ២០១៧ ឬដើមឆ្នាំ២០១៨ខាងមុខនេះ៕
© រក្សាសិទ្ធិដោយ thmeythmey.com