ជាតិ
សម្ដេច ហ៊ុន សែន ស្នើឲ្យស្វីស បង្កើនទំហំពាណិជ្ជកម្មរវាងប្រទេសទាំងពីរ ![កម្ពុជា-ស្វីស](https://image.thmeythmey.com/pictures/2017/01/20/sc.jpg)
កម្ពុជា-ស្វីស
×![]()
ភ្នំពេញ៖ សម្ដេចនាយករដ្ឋមន្ត្រី ហ៊ុន សែន បានស្នើឲ្យភាគីស្វីស ពង្រីកទំហំពាណិជ្ជកម្មនៃប្រទេសទាំងពីរឲ្យមានកាន់តែធំជាងមុន ខណៈទំហំពាណិជ្ជកម្មបច្ចុប្បន្ននេះ មានជាង៣០លានដុល្លារ។
ទន្ទឹមនឹងនេះក្រុមការងារនៃប្រទេសទាំងពីរនឹងបន្តពិភាក្សាគ្នា លើកិច្ចព្រមព្រៀងពាណិជ្ជកម្មក្រៅប្រទេស (FTA) ជាពិសេសទិសដៅជំរុញឲ្យវិស័យឯកជនកម្ពុជា-ស្វីស ចូលរួមឲ្យបានច្រើនឡើង ដូចជាការនាំផលិតផលស្វីស ដែលមានគុណភាពចូលកម្ពុជា និងនាំផលិតផលកម្ពុជាដូចជាអង្ករចេញមកប្រទេសស្វីសផងដែរ។
ក្នុងជំនួបជាមួយសម្ដេច ហ៊ុន សែន លោកស្រី Doris Leuthard ប្រធានាធិបតីនៃសហព័ន្ធស្វីស សន្យាជំរុញទេសចរណ៍ស្វីសទៅទស្សនាកម្ពុជាឲ្យកាន់តែច្រើនឡើងថែមទៀត។ ហើយប្រទេសស្វីសនឹងបន្តជួយ ក្នុងការពង្រឹងសន្តិសុខស្បៀងដល់កសិករ ដោយជំរុញអោយកសិករខ្មែរដាំដំណាំផ្សេងៗបន្ថែមក្រៅពីស្រូវ។ ជាពិសេសជួយពង្រឹងសមត្ថភាពតួនាទីរបស់សភាកម្ពុជា តាមការស្នើសុំរបស់រដ្ឋាភិបាលទៀតផង។
ក្រៅពីនេះ សម្តេច ហ៊ុន សែន បានអញ្ជើញ លោកស្រីប្រធានាធិបតីស្វីសមកទស្សនៈកិច្ចកម្ពុជា នៅពេលវេលាដ៏សមរម្យមួយនាពេលខាងមុខ។ សម្ដេច ហ៊ុន សែន ស្នើឲ្យប្រធានាធិបតីស្វីស ជួយជំរុញ អ្នកវិនិយោគទុនស្វីស មកចូលរួមនៅក្នុងវេទិកាសេដ្ឋកិច្ចពិភពលោកស្តីពីអាស៊ាន ដែលនឹងធ្វើនៅកម្ពុជា នៅ ខែ ឧសភា ឆ្នាំ ២០១៧ នេះផងដែរ៕
Tag:
ហ៊ុន សែន
ស្វីស
ពាណិជ្ជកម្ម
© រក្សាសិទ្ធិដោយ thmeythmey.com